ৰাজ্যপাল চি পি ৰাধাকৃষ্ণনে চৰকাৰ গঠনৰ বাবে আমন্ত্ৰণ জনোৱাৰ পাছতে বৃহস্পতিবাৰে সন্ধিয়া ঝাৰখণ্ড মুক্তি মৰ্চাৰ কাৰ্যকৰী সভাপতি হেমন্ত ছোৰেনে ঝাৰখণ্ডৰ ত্ৰয়োদশ মুখ্যমন্ত্ৰী হিচাপে শপত গ্ৰহণ কৰে। প্রায় পাঁচ মাহ কাৰাবন্দী হৈ থকাৰ পাছত শেহতীয়াকৈ ভূমি কেলেংকাৰিৰ গোচৰত জামিনত মুকলি কৰি দিয়া হৈছিল প্রাক্তন মুখ্যমন্ত্রী ছোৰেনে৷
হেমন্ত ছ’ৰেনক গ্ৰেপ্তাৰ হোৱাৰ পাছত ২ ফেব্ৰুৱাৰীত ঝাৰখণ্ডৰ দ্বাদশ মুখ্যমন্ত্ৰী হিচাপে শপত গ্ৰহণ কৰা চম্পাই ছোৰেনে পদত্যাগ কৰাৰ পাছতে বুধবাৰে জেএমএমৰ মুৰব্বীগৰাকীয়ে চৰকাৰ গঠনৰ দাবী বাজি উলিয়ালে।
ঝাৰখণ্ড উচ্চ ন্যায়ালয়ে ভূমি কেলেংকাৰীৰ সৈতে জড়িত ধন সৰবৰাহৰ গোচৰত জামিন মঞ্জুৰ কৰাৰ পাছত যোৱা ২৮ জুনত জে এম এমৰ চুপ্ৰেমো শিবু ছোৰেনৰ পুত্ৰ হেমন্ত ছোৰেনক জেলৰ পৰা মুকলি কৰি দিয়া হৈছিল। বুধবাৰে ৰাজ্যৰ জেএমএম নেতৃত্বাধীন মিত্ৰজোঁটে সৰ্বসন্মতিক্ৰমে তেওঁক বিধায়িনী দলৰ নেতা হিচাপে নিৰ্বাচিত কৰে।
৩১ জানুৱাৰীত বলবৎকাৰী সঞ্চালকালয়ে গ্ৰেপ্তাৰ কৰাৰ কিছু সময়ৰ পূৰ্বে মুখ্যমন্ত্ৰীৰ পদৰ পৰা পদত্যাগ কৰিছিল হেমন্ত ছোৰেনে।
ইফালে, নতুন দিল্লীৰ চৰকাৰী সূত্ৰই জনোৱা মতে, হেমন্ত ছোৰেনক জামিন প্ৰদান কৰা ঝাৰখণ্ড উচ্চ ন্যায়ালয়ৰ নিৰ্দেশক প্ৰত্যাহ্বান জনাই বলবৎকাৰী সঞ্চালকালয়ে অতি সোনকালে উচ্চতম ন্যায়ালয়ৰ কাষ চাপিব বুলি আশা কৰা হৈছে।
