বিগত লোকসভা নিৰ্বাচনত টিকটৰ পৰা শেষ মুহূৰ্তত বঞ্চিত, তাৰ পিছত ৰাজ্যসভাৰ প্ৰাৰ্থিত্বৰ পৰা বঞ্চিত আৰু শেষত মোদীৰ দ্বিতীয়খন মন্ত্ৰীসভাৰো বাহিৰত ৰৈ যোৱা “অতি সক্ৰিয়” মন্ত্ৰী ড০ হিমন্ত বিশ্ব শৰ্মা ২০২১ৰ বিধানসভাৰ নিৰ্বাচনৰ বাবে আজিৰ দিনটোৰ পৰাই পুনৰ এবাৰ সেনাপতিৰ ৰূপত অৱতীৰ্ণ হ’ল।
উল্লেখ্য যে, মহানগৰীৰ লখৰাস্থিত সৰুসজাই ষ্টেডিয়ামত বিজেপিৰ ৯গৰাকীকৈ লোকসভালৈ নিৰ্বাচিত সাংসদ আৰু ৰাজ্যসভাৰ এগৰাকী সাংসদক বিজেপি অসম প্ৰদেশৰ তৰফৰ পৰা অভিনন্দন জ্ঞাপন কৰা অনুষ্ঠানত ভাষণ প্ৰদান কৰি মন্ত্ৰীগৰাকীয়ে আগন্তুক দিনত বিজেপিয়ে অকলে ১০০ জন বিধায়ক জয়ী কৰোৱাৰ কথা ঘোষণা কৰে। লগতে দলৰ তৃণমূলৰ কাৰ্য্যকৰ্তাসকলকো আগন্তুক বিধানসভা নিৰ্বাচনত বিজেপিৰ মিছন-১০০ত উপনীত কৰাবলৈ পূৰ্বতকৈয়ো অধিক উৎসাহেৰে কাম কৰিবলৈ পৰামৰ্শ দিয়ে মন্ত্ৰীজনে।
হিমন্তই ভাষণৰ মাজত কয় ‘আশা কৰিম অসমত আন এটি সোণোৱালী দিন আহিব যিদিনাখন হয়তো অসমৰ বিধানসভাত ১০০ জন বিধায়ক ভাৰতীয় জনতা পাৰ্টিৰ হ’ব আৰু সংসদত ১০ জনতকৈয়ো অধিক সাংসদ ভাৰতীয় জনতা পাৰ্টিৰ হ’ব।‘
ইয়াৰোপৰি, লোকসভা নিৰ্বাচনত জয়ী হোৱা বিজেপিৰ সাংসদে সহজে জয়লাভ কৰা নাই বুলি উল্লেখ কৰি তেওঁ লগতে কয় ‘৯ গৰাকীকৈ সাংসদক ৰাতিৰ ভিতৰতে কোনেও নিৰ্মাণ কৰা নাই। ইয়াৰ সৈতে বহু কাৰ্য্যকৰ্তাৰ একান্ত পৰিশ্ৰম আৰু ত্যাগ জৰিত হৈ আছে।‘
ইপিনে, বৰ্তমানো ভাৰতীয় জনতা পাৰ্টিয়ে সফলতাৰ শীৰ্ষ পৰ্য্যায়ত ভৰি থ’ব পৰা নাই বুলি মন্তব্য কৰি হিমন্তই কয় ‘আজি আমি সফলতাৰ এটা পৰ্য্যায়ত উপনীত হৈছো। কিন্তু সফলতাৰ শীৰ্ষ পৰ্য্যায়লৈ এতিয়ালৈকে যোৱা নাই। এদিন সেই এভাৰেষ্টত থিয় হ’ম।‘
‘ৰাইজৰ মৰমে মোক এটা কথা সোঁৱৰাই দিছিল ৰাইজৰ বাবে কৰিবলগীয়া বহুত আছে। অসমৰ সংবাদ মাধ্যমৰ টক শ্ব’ত বহি থকা আৰু অ’পিনিয়ন প’ল দিয়া এজন মানুহেও কল্পনা কৰিব পৰা নাছিল যে বিজেপি ৯খন আসনত জিকিব পাৰিব। তেওঁলোকে ভাবিছিল যে বিজেপিয়ে অসমত ৫ খন আসনহে লাভ কৰিব।‘ হিমন্তই এইদৰে কয়।
ইয়াৰোপৰি, পূৰ্বৰ বিধানসভা নিৰ্বাচনে বিজেপিৰ কাৰ্য্যকৰ্তাসকলৰ দায়িত্ব ৫০ শতাংশ বঢ়াইছিল যদিও যোৱা লোকসভা নিৰ্বাচনে এই দায়িত্ব ১০০শতাংশ বঢ়ালে বুলি তেওঁ মন্তব্য কৰে।
দলৰ কাৰ্য্যকৰ্তালৈ হিমন্তৰ অনুৰোধ ‘ভাৰতীয় জনতা পাৰ্টিৰ কাৰ্য্যকৰ্তালৈ অনুৰোধ তেওঁলোকে দায়িত্বৰ প্ৰতি আগতকৈয়ো সচেষ্ট হ’ব লাগিব। আগতে যদি ৬ ঘন্টা ৰাইজৰ সেৱাত নিজকে ব্যস্ত কৰি ৰাখিছিল এতিয়া ৮ ঘন্টা যাতে ৰাইজৰ সেৱাত নিজকে ব্যস্ত ৰাখিব পাৰে, সেই চিন্তাৰে আগুৱাই যাব লাগিব।‘
হিমন্তই আৰু কয় ‘শিলচৰত নিৰ্বাচনী প্ৰচাৰ চলোৱাৰ সময়ত এগৰাকী ৮০ বছৰীয়া আইতাই আহি মোক কৈছিল মোৰ আৰু পাঁচবছৰ আয়ুস আছে, গোটেইখিনি আপোনালোকক দি দিলো, আপোনালোকে ৰাইজৰ হৈ কাম কৰক। মানুহে জীৱনৰ বাকী থৰা আয়ুসখিনিও বিজেপিৰ হাতত তুলি দিছে।’
আনহাতে, উক্ত সম্বৰ্ধনা অনুষ্ঠানত উপস্থিত থাকি অসমৰ মুখ্য মন্ত্ৰী সৰ্বানন্দ সোণোৱালে ভাষণ প্ৰদান কৰি কয় ‘ক্ষমতা পালে মানুহ দাম্ভিক হয়, সেই দাম্ভিকতা আমাৰ মাজত থাকিব নালাগিব। সেৱা-শ্ৰদ্ধাৰ মাজেৰে আমি আগবাঢ়িব লাগিব। আমি লোভ সামৰিব লাগিব।‘