অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে উত্থাপন হোৱা ঘৃণামূলক ভাষণৰ দিয়াৰ অভিযোগ সন্দৰ্ভত দাখিল কৰা কেইবাটাও জনস্বাৰ্থজনিত আবেদনৰ উত্তৰ দাখিল কৰিবলৈ অসম চৰকাৰক নিৰ্দেশ দিছে গুৱাহাটী উচ্চ ন্যায়ালয়ে। বুধবাৰে উচ্চ ন্যায়ালয়ৰ এখন ডিভিজন বেঞ্চে এই নিৰ্দেশ প্ৰদান কৰাৰ লগতে গোচৰটোৰ পৰৱৰ্তী শুনানি অহা ২৮ মে‘ত অনুষ্ঠিত হ’ব বুলি ঘোষণা কৰিছে। মুখ্য ন্যায়াধীশ আশুতোষ কুমাৰ আৰু ন্যায়াধীশ অৰুণ দেৱ চৌধুৰীৰ খণ্ড বিচাৰপীঠে চৰকাৰক নিৰ্ধাৰিত সময়ৰ ভিতৰত শপতনামা দাখিল কৰিবলৈ নিৰ্দেশ দিয়াৰ লগতে আবেদনকাৰীৰ অধিবক্তাক ইয়াৰ প্ৰতিলিপি প্ৰদান কৰিবলৈও স্পষ্ট কৰি দিছে।
ৰাজ্য চৰকাৰে উচ্চ ন্যায়ালয়ত নিজৰ স্থিতি স্পষ্ট কৰাৰ প্ৰতিশ্ৰুতি দিছে। চলিত বৰ্ষৰ ২৬ ফেব্ৰুৱাৰীত এই পিআইএলসমূহ পোনপ্ৰথমে বিচাৰলৈ অহাৰ সময়ত উচ্চ ন্যায়ালয়ে সমগ্ৰ বিষয়টোক লৈ গভীৰ উদ্বেগ প্ৰকাশ কৰিছিল। সেই সময়তে আদালতৰ বেঞ্চে বিষয়টোৰ ক্ষেত্ৰত এক প্ৰকাৰৰ বিভাজনকাৰী প্ৰৱণতা লক্ষ্য কৰি মুখ্যমন্ত্ৰী হিমন্ত বিশ্ব শৰ্মা, কেন্দ্ৰীয় চৰকাৰ, ৰাজ্য চৰকাৰ আৰু আৰক্ষী সঞ্চালক প্ৰধানক জাননী জাৰি কৰিছিল। ইয়াৰ পূৰ্বে ভাৰতৰ উচ্চতম ন্যায়ালয়েও সমগ্ৰ বিষয়টোৰ গুৰুত্ব বিবেচনা কৰি আবেদনকাৰীসকলক গুৱাহাটী উচ্চ ন্যায়ালয়ৰ কাষ চাপিবলৈ নিৰ্দেশ দিছিল আৰু অতি সোনকালে শুনানি গ্ৰহণ কৰিবলৈ অনুৰোধ জনাইছিল।
বিশিষ্ট বুদ্ধিজীৱি ড° হীৰেন গোহাঁই, প্ৰাক্তন আৰক্ষী সঞ্চালক প্ৰধান হৰিকৃষ্ণ ডেকা আৰু জ্যেষ্ঠ সাংবাদিকপৰেশ মালাকাৰৰ লগতে ভাৰতীয় কমিউনিষ্ট পাৰ্টি (চিপিআই) আৰু চি পি আই (এম)-এ এই পিআইএলসমূহ দাখিল কৰিছে। আবেদনকাৰীসকলৰ অভিযোগ অনুসৰি, মুখ্যমন্ত্ৰীৰ ভাষণসমূহে সমাজে বিভাজনৰ সৃষ্টি কৰিব পাৰে আৰু ইয়াৰ ফলত সাম্প্ৰদায়িক সম্প্ৰীতি বিনষ্ট হোৱাৰ সম্ভাৱনা আছে। তেওঁলোকে অভিযোগ কৰিছে যে সাংবিধানিক পদত অধিষ্ঠিত হৈও মুখ্যমন্ত্ৰীয়ে একাংশ সংখ্যালঘু সম্প্ৰদায়ৰ বিৰুদ্ধে ঘৃণাভাষণ প্ৰদান কৰিছে আৰু এক বিশেষ সম্প্ৰদায়ক লক্ষ্য কৰি চৰকাৰী প্ৰশাসনিক প্ৰক্ৰিয়াৰ অপব্যৱহাৰ কৰাৰ প্ৰয়াস কৰিছে। আবেদনকাৰীসকলে এই সমগ্ৰ ঘটনাৰ তদন্তৰ বাবে অৱসৰপ্ৰাপ্ত ন্যায়াধীশৰ নেতৃত্বত এখন বিশেষ তদন্তকাৰী দল (SIT) গঠনৰ দাবী উত্থাপন কৰিছে।
