আমেৰিকান শ্বৰ্ট চেলাৰ প্ৰতিষ্ঠান হিণ্ডেনবাৰ্গ ৰিচাৰ্ছৰ প্ৰতিবেদন প্ৰকাশ পোৱাৰ পাছতে গৌতম আদানীৰ ব্যৱসায়িক সাম্ৰাজ্যত খহনীয়াৰ আৰম্ভ হয়। হিণ্ডেনবাৰ্গ প্ৰতিবেদনত দাবী কৰা হৈছিল যে আগন্তুক সময়ত আদানী গ্ৰুপৰ সকলো প্ৰতিষ্ঠানৰে শ্বেয়াৰৰ মূল্য প্ৰায় ৬০ৰপৰা ৮০ শতাংশলৈ নিম্নগামী হ’ব।
স্মৰ্তব্য যে যোৱা ২৪ জানুৱাৰীত এই প্ৰতিবেদন প্ৰকাশ পোৱাৰ পিছৰে পৰা আদানী গ্ৰুপৰ শ্বেয়াৰ ক্ৰমাগতভাৱে হ্ৰাস পাই আহিছে। আমেৰিকাৰ গৱেষণা সংস্থা হিণ্ডেনবাৰ্গে আদানী গ্ৰুপৰ বিৰুদ্ধে জালিয়াতি আৰু ষ্টক মেনিপুলেচনৰ অভিযোগ উত্থাপন কৰিছিল।
এই প্ৰতিবেদন প্ৰকাশ পোৱাৰ পিছতে আদানী গ্ৰুপৰ বিনিয়োগকাৰীৰ মাজত আতংকৰ সৃষ্টি হয় আৰু শ্বেয়াৰৰ মূল্য বৃহৎ পৰিমাণে হ্ৰাস হয়। এক প্ৰতিবেদন অনুসৰি বিশ্বৰ ধনী ব্যক্তিৰ তালিকাৰ শীৰ্ষ ২৫তো এতিয়া স্থান নাই আদানীৰ। বৃহস্পতিবাৰে প্ৰকাশ পোৱা অনুসৰি আদানীৰ স্থান এতিয়া ২৯।
হিন্দুস্তান টাইমছৰ এক প্ৰতিবেদন অনুসৰি হিণ্ডেনবাৰ্গৰ প্ৰতিবেদন ওলোৱাৰ পিছৰে পৰা আদানীৰ সম্পত্তিৰ পৰিমাণ প্ৰায় ৭৫ বিলিয়ন ডলাৰ হ্ৰাস পাইছে।
আমেৰিকান ৰিচাৰ্চ এজেন্সী হিণ্ডেনবাৰ্গৰ প্ৰতিবেদনক আদানী গ্ৰুপে ষড়যন্ত্ৰ বুলি আখ্যা দি এয়া ভাৰতৰ ৰাষ্ট্ৰীয়তাৰ ওপৰত আক্ৰমণ বুলিও অভিযোগ কৰিছিল। কিন্তু নিজকে ধোঁৱা তুলসী পাত সজালেও নিজৰ ব্যৱসায়িক সাম্ৰাজ্য ৰক্ষা কৰিবলৈ সক্ষম হোৱা নাই গৌতম আদানী।
ইফালে বিগত এমাহৰ ভিতৰত আদানী টোটেল গেছৰ বজাৰ মূল্যত ৩.৪৪ লাখ কোটি টকা লোকচান হৈছে। ২৪ জানুৱাৰীৰ পৰা এই তিনিওটা ষ্টকে ধাৰাবাহিকভাৱে হ্ৰাস পাইছে। আন এক প্ৰতিবেদন অনুসৰি চলিত বৰ্ষৰ আৰম্ভণিতে আদানী কোম্পানীসমূহৰ মুঠ বজাৰ মূল্য প্ৰায় ২০ ট্ৰিলিয়ন আছিল, যিটো এতিয়া ৭.৬ ট্ৰিলিয়নলৈ হ্ৰাস পাইছে। আদানী ট্ৰেন্সমিছনৰ লোকচান হৈছে ২.২৮ লাখ কোটি আৰু সেউজ শক্তিৰ ২.২৬ লাখ কোটি টকা। আদানী ট্ৰেন্সমিছনৰ ২.২৮ লাখ কোটি আৰু আদানী সেউজ শক্তিৰ ২.২৬ লাখ কোটি টকা হ্ৰাস পাইছে।
