প্ৰথমবাৰৰ বাবে আদানি গোষ্ঠীয়ে তেওঁলোকৰ বিৰুদ্ধে উত্থাপিত অভিযোগ সম্পৰ্কত মুখ খুলি “ভাৰতৰ ওপৰত পৰিকল্পিত আক্ৰমণ” হোৱা বুলি অভিযোগ কৰিছিল। সোমবাৰে সেই মন্তব্যৰ উত্তৰত আমেৰিকান কোম্পানীটোৱে নিজৰ স্থিতিত অটল থাকি কয় যে আদানি গোটে জাতীয়তাবাদৰ নামত জালিয়াতি লুকুৱাব নোৱাৰিব।
হিণ্ডেনবাৰ্গ ৰিচাৰ্চ নামৰ আমেৰিকান বিনিয়োগ গৱেষণা প্ৰতিষ্ঠানটোৱে এক বিবৃতিত কয়, “আদানি ঔদ্যোগিক গোষ্ঠীয়ে সম্ভৱত: মুখ্য বিষয়বোৰৰ পৰা দৃষ্টি আঁতৰাই নিয়াৰ বাবে জাতীয়তাবাদক টানি আনিছে।‘’
একে সময়তে, সংস্থাটোৱে আদানিৰ ‘দেশৰ ওপৰত আক্ৰমণ’ৰ অভিযোগক উপহাস কৰি কয়, “আদানি গোষ্ঠীৰ মুৰব্বী গৌতম আদানিয়ে ভাৰতৰ সফলতাৰ সৈতে নিজৰ আৰু কোম্পানীৰ আকাশচুম্বী উত্থানক মিহলি কৰি পেলাইছে।”
হিণ্ডেনবাৰ্গে অৱশ্যে কয় যে ই ভাৰতক দুৰ্বল কৰিব নিবিচাৰে আৰু ইয়াৰ অভিযোগসমূহ এটা নিৰ্দিষ্ট সংস্থাৰ বিৰুদ্ধেহে। হিণ্ডেনবাৰ্গে কয় যে ভাৰতৰ গণতন্ত্ৰৰ ওপৰত তেওঁলোকৰ বিশ্বাস আছে। এইটোও লগতে জনোৱা হৈছে যে ভাৰত শীঘ্ৰেই বিশ্বৰ শক্তিশালী দেশসমূহৰ তালিকাত প্ৰৱেশ কৰিবলৈ গৈ আছে।
আনহাতে, একে সময়তে তেওঁলোকে আদানি গোষ্ঠীৰ বিৰুদ্ধে উত্থাপিত অভিযোগৰ সন্দৰ্ভত অটল থাকি কয়, “আমি বিশ্বাস কৰোঁ যে জালিয়াতি জালিয়াতিয়েই, সেয়া লাগিলে যিয়েই নকৰক কিয়।”
হিণ্ডেনবাৰ্গ ৰিচাৰ্চৰ এক প্ৰতিবেদনত শেহতীয়াকৈ দাবী কৰা হৈছে যে আদানি গোষ্ঠী ‘জালিয়াতি’ কৰি ধনী হৈছিল। ভাৰতীয় কোটিপতি গৌতম আদানীয়ে জালিয়াতি কৰি শ্বেয়াৰৰ মূল্য বৃদ্ধি কৰিছে। এই অভিযোগৰ পিছৰে পৰা শ্বেয়াৰ বজাৰত অস্থিৰতা আহিছে। সোমবাৰে বজাৰ খোলালৈকে আদানিৰ শ্বেয়াৰৰ মূল্য হ্ৰাস পাইছে। কোম্পানীটোৱে বৃহৎ লোকচানৰ সন্মুখীন হৈছে।
হিণ্ডেনবাৰ্গৰ প্ৰতিবেদনত যোৱা মঙলবাৰে আদানি গোষ্ঠীৰ বিৰুদ্ধে জালিয়াতিৰ অভিযোগ উত্থাপন কৰা হৈছিল। দেওবাৰে ৪১৩ পৃষ্ঠাৰ এক উত্তৰত আদানি গোষ্ঠীয়ে এই অভিযোগ অস্বীকাৰ কৰে। তেওঁলোকৰ প্ৰতিক্ৰিয়াত কোৱা হৈছে যে আমেৰিকা যুক্তৰাষ্ট্ৰৰ সংস্থাবোৰৰ ভাৰতীয় আইনব্যৱস্থাৰ বিষয়ে ভাল ধাৰণা নাই। কোম্পানীটোৱে এইটোও নাজানে যে ভাৰতীয় বজাৰত মূলধন সংগ্ৰহৰ প্ৰক্ৰিয়া কেনেদৰে আগবাঢ়িছে।
আদানিয়ে হিণ্ডেনবাৰ্গৰ ‘অজ্ঞতা’ৰ এটা উদাহৰণো দিছিল। হিণ্ডেনবাৰ্গে ইয়াৰ প্ৰতিবেদনত দাবী কৰিছিল যে যোৱা কেইবছৰমানত কেইবাটাও আদানি গোষ্ঠীৰ কোম্পানীৰ মুখ্য অৰ্থনৈতিক বিষয়াসকলে (চিএফঅ’) পদত্যাগ কৰিছে। এই তথ্য সম্পূৰ্ণ ভিত্তিহীন বুলি দাবী কৰা হৈছে। আদানি গোষ্ঠীয়ে কৈছিল যে বিষয়াসকল কোম্পানীটোৰ সৈতে জড়িত আছিল। তেওঁলোকে অধিক দায়িত্ব লৈছে। কোনেও পদত্যাগ কৰা নাছিল।
এছিয়াৰ আটাইতকৈ ধনী ব্যক্তি আৰু আদানি গোষ্ঠীৰ গৰাকী গৌতম আদানীয়ে হিণ্ডেনবাৰ্গৰ প্ৰতিবেদন পোহৰলৈ অহাৰ পিছত তেওঁৰ সম্পত্তি হেৰুৱাইছে। তেওঁ বিশ্বৰ আটাইতকৈ ধনী ব্যক্তিৰ তালিকাত চাৰিটা স্থান নামি সপ্তম স্থানলৈ অৱনমিত হৈছে।
