দিল্লীৰ যুৱ প্ৰতিবাদৰ সময়ত ছাত্ৰ-কৰ্মী নিশু আজাদৰ পিতৃ সঞ্জয় কুমাৰক আক্ৰমণ কৰাৰ অভিযোগত অভিযুক্ত হিন্দুত্ববাদী স্বতন্ত্ৰ ভৰদ্বাজে তিনিসপ্তাহৰ অন্তৱৰ্তীকালীন জামিন লাভ কৰিছে। মঙলবাৰে দিল্লীৰ আদালতে তেওঁক এই অন্তৱৰ্তীকালীন জামিন মঞ্জুৰ কৰে বুলি লাইভ ল’য়ে প্ৰকাশ কৰিছে।
উল্লেখ্য, নীট পৰীক্ষাত হোৱা অনিয়মৰ বিৰুদ্ধে ২৩ জুলাইত দিল্লীৰ যন্তৰ-মন্তৰত প্ৰতিবাদ অনুষ্ঠিত হৈছিল। এই প্ৰতিবাদৰ মাজতে ছাত্ৰ-কৰ্মী নিশু আজাদৰ পিতৃ সঞ্জয় কুমাৰক আক্ৰমণ কৰাৰ অভিযোগ উঠিছিল স্বতন্ত্ৰ ভৰদ্বাজৰ বিৰুদ্ধে।
১ ছেপ্টেম্বৰত আপলোড হোৱা ‘দ্য কেজুৱেল টক’ নামৰ এটা প’ডকাষ্টত তেওঁ নিশু আজাদৰ পিতৃক আক্ৰমণ কৰি মূৰ ফালি দিছিল বুলি নিজেই উল্লেখ কৰে। প’ডকাষ্টটোত ভৰদ্বাজে বিজেপিৰ ৰাজনৈতিক নেতাৰ সৈতে নিজৰ ঘনিষ্ঠতাৰ কথাও দাবীও কৰে। দিল্লীৰ মন্ত্ৰী তথা বিজেপি নেতা কপিল মিশ্ৰক তেওঁ জ্যেষ্ঠ ভাতৃ বুলি দাবী কৰে। ইয়াৰ উপৰি চিৰাগ পাছৱান আৰু প্ৰধানমন্ত্ৰী নৰেন্দ্ৰ মোদীকো একে ধৰণে সম্বোধন কৰি তেওঁলোকে ভৰদ্বাজৰ অপৰাধক সমৰ্থন কৰে বুলিও তেওঁ দাবী কৰে।
এই অভিযোগৰ ভিত্তিত যোৱা ৪ ছেপ্টেম্বৰত ভৰদ্বাজক আটক কৰা হৈছিল। ইয়াৰ পূৰ্বে প্ৰচাৰিত এটা ভিডিঅ’ক লৈ তেওঁক লৈ তীব্ৰ বিতৰ্কৰ সৃষ্টি হৈছিল।
ভিডিঅ’টো ব্যাপকভাৱে প্ৰচাৰিত হোৱাৰ পাছত ভৰদ্বাজৰ বিৰুদ্ধে সাধাৰণ আঘাত কৰা আৰু বলপূৰ্বকভাৱে কাৰোবাক ৰখাই থোৱাৰ অভিযোগত গোচৰ ৰুজু কৰা হৈছিল। ঘটনাটোক লৈ ক্ষোভ বৃদ্ধি পোৱাৰ মাজতে ৪ ছেপ্টেম্বৰত ‘কক্ৰ’চ জনতা পাৰ্টি’ৰ সদস্যসকলে দিল্লীৰ পাৰ্লামেণ্ট ষ্ট্ৰীট আৰক্ষী থানাৰ বাহিৰত প্ৰতিবাদ সাব্যস্ত কৰে। অভিযুক্তৰ বিৰুদ্ধে ৰুজু হোৱা গোচৰত হত্যাৰ চেষ্টা সম্পৰ্কীয় ধাৰা সংযোজনৰ দাবী জনাইছিল প্ৰতিবাদকাৰীসকলে।
এই প্ৰতিবাদৰ পাছত আৰক্ষীয়ে অনুসূচিত জাতি আৰু অনুসূচিত জনজাতি নিৰ্যাতন প্ৰতিৰোধ আইন আৰু অপৰাধমূলক ভাবুকি সম্পৰ্কীয় ধাৰাও গোচৰত সংযোজন কৰে বুলি লাইভ ল’য়ে প্ৰকাশ কৰিছে।
ইফালে, স্বতন্ত্ৰ ভৰদ্বাজে আত্মপক্ষত দাবী কৰিছে যে তেওঁ আত্মৰক্ষাৰ বাবেই এই কাৰ্য কৰিছিল। তেওঁ দাবী কৰিছে যে তেনে নকৰিলে উত্তেজিত জনতাই তেওঁক আক্ৰমণ কৰি হত্যা কৰিব পাৰিলেহেঁতেন।
ভৰদ্বাজে নিয়মীয়া জামিনৰ বাবে কৰা আবেদন সন্দৰ্ভত সোমবাৰে পাটিয়ালা হাউছ আদালতে সিদ্ধান্ত সংৰক্ষিত ৰাখিছিল। তাৰ পাছতে মঙলবাৰে আদালতে তেওঁক তিনিসপ্তাহৰ অন্তৱৰ্তীকালীন জামিন প্ৰদান কৰে।
