নেডাৰলেণ্ডৰ লেইডেন বিশ্ববিদ্যালয়ৰ সংৰক্ষণত থকা চোল যুগৰ ঐতিহাসিক তাম্ৰপত্ৰসমূহ ভাৰতলৈ ঘূৰাই দিয়া হৈছে। ২০২৬ চনৰ ১৬ মে‘ তাৰিখে দি হেগত অনুষ্ঠিত এখন বিশেষ অনুষ্ঠানত ভাৰতৰ প্ৰধানমন্ত্ৰী নৰেন্দ্ৰ মোদী আৰু ডাচ প্ৰধানমন্ত্ৰী ৰব জেটেনৰ উপস্থিতিত এই তাম্ৰপত্ৰসমূহ প্ৰদান কৰা হয়। অৱশ্যে পৰৱৰ্তী সময়ত আনুষ্ঠানিকভাৱে এইসমূহ ভাৰতলৈ হস্তান্তৰ কৰা হ‘ব।
আনৈমংগলম তাম্ৰপত্ৰ বুলি জনাজাত এই ঐতিহাসিক সামগ্ৰীসমূহ প্ৰায় ৩০০ বছৰৰ আগতে হেৰাই গৈছিল। ১৮৬২ চনৰ পৰাই এই তাম্ৰপত্ৰসমূহ লেইডেন বিশ্ববিদ্যালয়ৰ সংৰক্ষণত আছিল। দক্ষিণ ভাৰতৰ ৰাজকীয় ফৰমানৰ এক গুৰুত্বপূৰ্ণ উৎস হিচাপে পৰিচিত এই তাম্ৰপত্ৰসমূহে চোল আৰু শ্ৰীবিজয়া সাম্ৰাজ্যৰ মাজৰ সম্পৰ্কৰ বিষয়ে বহুতো মূল্যৱান ঐতিহাসিক তথ্য প্ৰদান কৰে। একেলগে এই তাম্ৰপত্ৰসমূহৰ ওজন প্ৰায় ৩০ কিলোগ্ৰাম।
এই ফৰমানখনত দুটা অংশ আছে, এটা সংস্কৃত আৰু আনটো তামিল ভাষাত। মুঠ ২১ খন তামৰ পাত ৰাজেন্দ্ৰ চোলৰ ৰাজকীয় মোহৰ থকা এটা বিশাল ব্ৰঞ্জৰ আঙঠিৰে একেলগে বান্ধি ৰখা হৈছে। ইয়াত চোল ৰাজবংশৰ বংশাৱলী আৰু ৰাজেন্দ্ৰ চোলৰ পিতৃ ৰজা প্ৰথম ৰাজাৰাজাৰ ৰাজত্বকালৰ কথা উল্লেখ আছে। কোৰমণ্ডল উপকূলৰ বন্দৰ চহৰ নাগাপট্টিনামত শ্ৰীবিজয়াৰ মালয় ৰজাই নিৰ্মাণ কৰা চুড়ামণিবৰ্মবিহাৰ নামৰ এটা বৌদ্ধ মন্দিৰৰ বাবে আনৈমংগলমৰ চাৰিওফালৰ ২৬ খন গাঁও দান কৰাৰ কথা ইয়াত লিপিবদ্ধ কৰা হৈছে।
২০২৩ চনৰ গ্ৰীষ্মকালত ভাৰত চৰকাৰে এই তাম্ৰপত্ৰসমূহ ঘূৰাই বিচাৰি লেইডেন বিশ্ববিদ্যালয়লৈ অনুৰোধ জনাইছিল। অনুসন্ধানৰ পিছত দেখা গ‘ল যে ডাচ ইষ্ট ইণ্ডিয়া কোম্পানীয়ে ১৬৮৭ চনৰ পৰা ১৭০০ চনৰ ভিতৰত নাগাপট্টিনামৰ পৰা এইসমূহ খান্দি উলিয়াই প্ৰকৃত গৰাকীৰ সন্মতি নোহোৱাকৈ ভাৰতৰ পৰা লৈ গৈছিল। উপনিৱেশিক সংগ্ৰহ সমিতিয়ে এইটো অন্যায়ভাৱে দখল কৰা বুলি সিদ্ধান্ত লয় আৰু কোনো চৰ্ত নোহোৱাকৈ ভাৰতক ঘূৰাই দিবলৈ পৰামৰ্শ দিয়ে। লেইডেন বিশ্ববিদ্যালয়েও এই পৰামৰ্শ মানি লয়।
ইণ্ডিয়া প্ৰাইডৰ সহ-প্ৰতিষ্ঠাপক তথা সংস্কৃতি প্ৰেমী এছ. বিজয় কুমাৰে কয় যে তেওঁলোকে এক দশকৰো অধিক কাল ধৰি এই তাম্ৰপত্ৰসমূহ ঘূৰাই অনাৰ বাবে প্ৰচাৰ চলাই আহিছিল। ২০১৮ চনৰ জুন মাহত তেওঁ নিজ চকুৰে এই তাম্ৰপত্ৰসমূহ দেখাৰ সুযোগ পাইছিল। ইমান দিনে কিতাপত পঢ়ি অহা আৰু ঘূৰাই অনাৰ বাবে যুঁজ দিয়া বস্তুটো নিজৰ সন্মুখত দেখা পাই তেওঁ অত্যন্ত আৱেগিক হৈ পৰিছিল বুলিও ব্যক্ত কৰে।
তেওঁ লগতে কয় যে লেইডেনত থকা নথিপত্ৰসমূহে বহুতো প্ৰশ্নৰ উত্তৰ দিয়াত ব্যৰ্থ হৈছে। নথিপত্ৰত এই ফৰমানসমূহ ভাৰতৰ পৰা নেডাৰলেণ্ডলৈ নিয়াৰ কথা উল্লেখ আছে যদিও কি পৰিস্থিতিত এইবোৰ নিয়া হৈছিল সেয়া স্পষ্ট নহয়। এই তাম্ৰপত্ৰসমূহ অষ্টাদশ শতিকাৰ আৰম্ভণিতে বাটাভিয়াৰ ধৰ্ম মন্ত্ৰী ফ্লৰেণ্টিয়াছ কেম্পাৰে নেডাৰলেণ্ডলৈ নিছিল বুলি উল্লেখ আছে। কিন্তু তেওঁ এইবোৰ কাৰ পৰা, কেনেকৈ বা কাৰ সন্মতিত লাভ কৰিছিল তাৰ কোনো ব্যাখ্যা নাই।
এই তাম্ৰপত্ৰসমূহ নতুন দিল্লীৰ ভাৰতীয় পুৰাতত্ত্ব জৰীপ বা এএছআইক চমজাই দিয়া হ‘ব। কেন্দ্ৰীয় সাংস্কৃতিক মন্ত্ৰালয়ৰ অধীনত কাৰ্যনিৰ্বাহ কৰা এএছআইয়ে এই ঐতিহাসিক সামগ্ৰীসমূহ ভাৰতৰ ক‘ত আৰু কেনেকৈ প্ৰদৰ্শন কৰা হ‘ব সেই বিষয়ে সিদ্ধান্ত ল‘ব।
বিজয় কুমাৰে লগতে কয় যে এই নথিপত্ৰ কেৱল চোল ইতিহাসৰ বাবেই নহয়, ভাৰত মহাসাগৰৰ সংযোগৰ ইতিহাসৰ বাবেও গুৰুত্বপূৰ্ণ। এখন তামিল শৈৱ ৰাজ দৰবাৰে দক্ষিণ-পূব এছিয়াৰ ৰাজপৰিয়ালৰ সৈতে জড়িত এটা বৌদ্ধ প্ৰতিষ্ঠানক সহায় কৰাটোৱে একাদশ শতিকাৰ ধৰ্মীয় সহাৱস্থান, সামুদ্ৰিক কূটনীতি আৰু সাংস্কৃতিক বিনিময়ৰ প্ৰমাণ দিয়ে। সেয়েহে এই তাম্ৰপত্ৰসমূহ কেৱল পুৰণি সামগ্ৰী নহয়, বৰঞ্চ ই এখন সামুদ্ৰিক সাম্ৰাজ্যৰ তথ্যসমৃদ্ধ নথিপত্ৰ।
আনৈমংগলম তাম্ৰপত্ৰ ভাৰতলৈ ঘূৰি অহাৰ পিছত ছচিয়েল মিডিয়াত প্ৰতিক্ৰিয়া প্ৰকাশ কৰি প্ৰধানমন্ত্ৰী মোদীয়ে ইয়াক প্ৰতিগৰাকী ভাৰতীয়ৰ বাবে এক আনন্দৰ মুহূৰ্ত বুলি অভিহিত কৰে। লগতে তেওঁ নেডাৰলেণ্ড চৰকাৰ আৰু লেইডেন বিশ্ববিদ্যালয়ক আন্তৰিক ধন্যবাদ জ্ঞাপন কৰে।
