দীৰ্ঘদিন ধৰি চলি থকা সংঘাতৰ অন্ত পেলাই আমেৰিকা যুক্তৰাষ্ট্ৰ আৰু ইৰাণে এক ঐতিহাসিক পদক্ষেপ গ্ৰহণ কৰিছে। এই পৰিস্থিতিৰ মাজতে আমেৰিকাৰ ৰাষ্ট্ৰপতি ডনাল্ড ট্ৰাম্পে এক ডাঙৰ দাবী কৰিছে। তেওঁ জনাইছে যে ইৰাণে কেতিয়াও পৰমাণু অস্ত্ৰ তৈয়াৰ নকৰাৰ প্ৰতিশ্ৰুতি দিছে। দুয়োখন দেশৰ মাজত এক প্ৰাথমিক বুজাবুজি চুক্তি স্বাক্ষৰিত হৈছে, যাক দীৰ্ঘদিনীয়া শান্তিৰ দিশত এক গুৰুত্বপূৰ্ণ মাইলৰ খুঁটি বুলি গণ্য কৰা হৈছে।
ফ্ৰান্সত অনুষ্ঠিত জি-৭ সন্মিলনত অংশগ্ৰৰহণ কৰি ৰাষ্ট্ৰপতি ট্ৰাম্পে কয় যে ইৰাণে আৰু কেতিয়াও পৰমাণু অস্ত্ৰ নাৰাখিবলৈ সন্মত হৈছে। ট্ৰাম্পৰ এই দাবীক সমৰ্থন জনাই উপ-ৰাষ্ট্ৰপতি জেডি ভান্সেও কয় যে সংঘাতৰ সময়ত ইৰাণক পৰমাণু অস্ত্ৰ লাভ কৰাৰ পৰা বিৰত ৰখাটোৱেই আছিল তেওঁলোকৰ প্ৰশাসনৰ অন্যতম প্ৰধান লক্ষ্য। ভান্সে ছচিয়েল মিডিয়া এক্সযোগে জনাইছে যে ৰাষ্ট্ৰপতি ট্ৰাম্পে আৰম্ভণিৰে পৰাই স্পষ্ট স্থিতি গ্ৰহণ কৰিছিল যে ইৰাণৰ হাতত কেতিয়াও কোনো পৰমাণু অস্ত্ৰ থাকিব নোৱাৰিব। ইয়াৰ উপৰি এই চুক্তিক আমেৰিকা প্ৰশাসনৰ এক ডাঙৰ কূটনৈতিক সফলতা বুলি অভিহিত কৰি তেওঁ কয় যে আন্তৰ্জাতিক পৰমাণু শক্তি সংস্থা চমুকৈ আইএইএ-ৰ পৰিদৰ্শকসকল শীঘ্ৰেই ইৰাণলৈ ঘূৰি আহিব আৰু ইৰাণৰ ইউৰেনিয়ামৰ মজুত ধ্বংস কৰাৰ বিষয়টোও এই চুক্তিত অন্তৰ্ভুক্ত কৰা হৈছে।
অৱশ্যে এই শান্তি প্ৰক্ৰিয়াৰ আটাইতকৈ চৰ্চিত বিষয়টো হৈছে ৩০০ বিলিয়ন ডলাৰৰ অৰ্থনৈতিক পেকেজ। ট্ৰাম্প প্ৰশাসনে পোনপটীয়াকৈ কোনো ধন দিয়াৰ কথা অস্বীকাৰ কৰিছে যদিও ইৰাণৰ এক সংবাদ প্ৰতিষ্ঠানে দাবী কৰিছে যে যুদ্ধৰ বাবে হোৱা ক্ষয়-ক্ষতিৰ ক্ষতিপূৰণ হিচাপে ইৰাণে ৩০০ বিলিয়ন ডলাৰৰ সাহায্য বিচাৰিছে। তেহৰাণৰ মতে ইয়াৰ ভিতৰত ইৰাণৰ জব্দ কৰি থোৱা ২৪ বিলিয়ন ডলাৰৰ সম্পত্তি মুক্ত কৰাৰ বিষয়টোও সোমাই আছে। আনহাতে পশ্চিমীয়া সংবাদ মাধ্যমে এই ধনক পোনপটীয়া ক্ষতিপূৰণ নহয়, বৰঞ্চ আন্তৰ্জাতিক বিনিয়োগ আৰু পুনৰ্নিৰ্মাণ কাৰ্যসূচী হিচাপেহে ব্যাখ্যা কৰিছে।
ইফালে ইৰাণৰ ৰাষ্ট্ৰপতি মাছূদ পেজেশকিয়ানে এই বুজাবুজিক শান্তিৰ পথত এক গুৰুত্বপূৰ্ণ পদক্ষেপ বুলি অভিহিত কৰিছে। অৱশ্যে তেওঁ স্পষ্ট কৰি দিছে যে চূড়ান্ত শান্তি চুক্তিৰ সবিশেষ এতিয়াও আলোচনাৰ পৰ্যায়তে আছে। অহা সপ্তাহত জেনেভাত এই চুক্তিৰ আনুষ্ঠানিক প্ৰক্ৰিয়া সম্পন্ন হোৱাৰ কথা আছে। ইৰাণৰ সমৰ্থন পুষ্ট আঞ্চলিক সশস্ত্ৰ গোটসমূহৰ ভৱিষ্যত আৰু ইৰাণৰ ওপৰত থকা নিষেধাজ্ঞা প্ৰত্যাহাৰৰ চৰ্তসমূহেই এতিয়া আলোচনাৰ মূল কেন্দ্ৰবিন্দু হৈ পৰিছে। এই সমগ্ৰ বিষয়টোক লৈ ৰাজনৈতিক আৰু অৰ্থনৈতিক বিতৰ্ক চলি থাকিলেও, দীৰ্ঘদিনীয়া সংঘাতৰ অন্ত পেলাই দুয়োখন দেশে গ্ৰহণ কৰা এই প্ৰাথমিক ঐকমত্যই বিশ্ব ৰাজনীতিত এক নতুন সমীকৰণৰ সৃষ্টি কৰিছে।
