যোৱা বছৰৰ নৱেম্বৰ মাহত বিহাৰ নিৰ্বাচনত এন ডি এৰ বিপুল জয়ৰ পিছত প্ৰধানমন্ত্ৰী নৰেন্দ্ৰ মোদীয়ে গংগা নদীৰ উপমা দি কৈছিল যে গংগা বিহাৰৰ পৰা বংগলৈ বৈ যায়। সেই কথাষাৰেই আজি যেন সঁচা প্ৰমাণিত হ‘ল। সুদীৰ্ঘ ১৫ বছৰৰ অন্তত পশ্চিমবংগত তৃণমূল কংগ্ৰেছৰ চৰকাৰৰ পতন ঘটিল আৰু বিজেপিয়ে এক ঐতিহাসিক জয় সাৱ্যস্ত কৰিলে। প্ৰায় দুশখন আসনৰ কাষ চাপি বিজেপিয়ে ৰাজ্যখনত নিজৰ আধিপত্য বিস্তাৰ কৰিবলৈ সক্ষম হৈছে, আনহাতে মমতা বেনাৰ্জীৰ দলৰ আসনৰ সংখ্যা অস্বাভাৱিকভাৱে হ্ৰাস পাইছে। দশক দশক ধৰি চেষ্টা কৰাৰ পিছত অৱশেষত পূব ভাৰতৰ এই গুৰুত্বপূৰ্ণ ৰাজ্যখনত গেৰুৱা দলটোৱে নিজৰ ভেটি সুদৃঢ় কৰিলে।
নিৰ্বাচনৰ ফলাফলে প্ৰমাণ কৰিছে যে পশ্চিমবংগৰ ৰাইজে এইবাৰ কেৱল পৰিৱৰ্তন বিচাৰিছে। যোৱা কেইবছৰমানৰ পৰা বিজেপিৰ দুৰ্গ হিচাপে পৰিচিত উত্তৰ বংগই এইবাৰো আশানুৰূপ ফলাফল দেখুৱাইছে। ইয়াৰ লগতে তৃণমূলৰ দখলত থকা কেইবাটাও দুৰ্গত বিজেপিয়ে ব্যাপক সফলতা অৰ্জন কৰিছে। মেদিনীপুৰত জনজাতীয় লোকসকলৰ বিপুল সমৰ্থন লাভ কৰি বিজেপিয়ে পঞ্চাশখনতকৈও অধিক আসনত আগবাঢ়ি থকাৰ বিপৰীতে তৃণমূল কংগ্ৰেছে মাত্ৰ পাঁচখন আসনতে আৱদ্ধ থাকিবলগীয়া হৈছে। একেদৰে বৰ্ধমান, কলকাতা আৰু হাওৰাৰ দৰে তৃণমূলৰ দুৰ্গসমূহতো বিজেপিয়ে একপ্ৰকাৰ সাঁচ বহুৱাবলৈ সক্ষম হৈছে।
ৰাজ্যখনৰ প্ৰেচিডেন্সি অঞ্চল আৰু মালদাহতো বিজেপিৰ প্ৰভাৱ বাৰুকৈয়ে পৰা দেখা গৈছে। অৱশ্যে ইয়াৰ মাজতো দক্ষিণ কলকাতাৰ ভৱানীপুৰ সমষ্টিত মুখ্যমন্ত্ৰী মমতা বেনাৰ্জীয়ে প্ৰায় ১৭ হাজাৰ ভোটত আগবাঢ়ি আছে। এই সমগ্ৰ নিৰ্বাচনী যুঁজখনৰ সন্দৰ্ভত প্ৰতিক্ৰিয়া প্ৰকাশ কৰি বিজেপিৰ ৰাজ্যিক সভাপতি সমীক ভট্টাচাৰ্যই কয় যে এইবাৰৰ নিৰ্বাচন হৈছে প্ৰত্যাখ্যানৰ নিৰ্বাচন। শিক্ষক নিযুক্তি কেলেংকাৰীৰ পৰা আৰম্ভ কৰি ৰাজ্যখনৰ তীব্ৰ নিবনুৱা সমস্যালৈকে বিভিন্ন কাৰণত ৰাইজে তৃণমূল কংগ্ৰেছক নাকচ কৰিছে বুলি তেওঁ মত প্ৰকাশ কৰে।
৩৪ বছৰীয়া শক্তিশালী বাওঁপন্থী শাসনৰ অন্ত পেলাই বাঘিনীৰ দৰে আৱিৰ্ভাৱ হোৱা মমতা বেনাৰ্জীৰ এই পতন সঁচাকৈয়ে আচৰিত ধৰণৰ। তেওঁৰ ১৫ বছৰীয়া শাসনকালত সংঘটিত হোৱা বিভিন্ন কেলেংকাৰী আৰু গুণ্ডাগিৰিয়েই এই পৰাজয়ৰ মূল কাৰণ বুলি ধাৰণা কৰা হৈছে। বিশেষকৈ কলকাতাত চলি থকা ইউনিয়ন সংস্কৃতি আৰু শেহতীয়া আৰ জি কৰ চিকিৎসালয়ৰ ঘটনাই সাধাৰণ মানুহৰ মনত তীব্ৰ ক্ষোভ আৰু ভয়ৰ সৃষ্টি কৰিছিল। ইয়াৰ লগতে সংখ্যালঘু তোষণৰ ৰাজনীতিয়েও ৰাজ্যখনৰ বৃহৎ সংখ্যক হিন্দু ভোটাৰক অসন্তুষ্ট কৰি তুলিছিল। এই সকলোবোৰ কাৰণেই বিজেপিৰ সপক্ষে এক শক্তিশালী জনমত গঢ়ি তোলাত সহায় কৰিলে।
নিৰ্বাচনী প্ৰচাৰৰ সময়ত তৃণমূল কংগ্ৰেছে বঙালী আৱেগক মূল অস্ত্ৰ হিচাপে ব্যৱহাৰ কৰিবলৈ চেষ্টা কৰিছিল। বংগই নিজৰ কন্যাকহে বিচাৰে বুলি শ্লোগান দিয়াৰ লগতে বিজেপিয়ে ক্ষমতালৈ আহিলে মাছ-মঙহ খোৱাত বাধা আৰোপ কৰিব বুলিও ৰাইজৰ মাজত ভয় সোমোৱাবলৈ চেষ্টা কৰিছিল। তৃণমূলৰ দাবী আছিল যে বিজেপিৰ আগমনে বঙালী ভাষা আৰু সংস্কৃতিলৈ ভাবুকি কঢ়িয়াই আনিব আৰু হিন্দী সংস্কৃতি জাপি দিব। কিন্তু ফলাফলে দেখুৱাই দিলে যে সাহিত্য, সংস্কৃতি আৰু চাহ-আড্ডাৰ এই ৰাজ্যখনৰ জনসাধাৰণে এতিয়া এইবোৰ অপপ্ৰচাৰত গুৰুত্ব নিদি কেৱল পৰিৱৰ্তন বিচাৰে। নিবনুৱা সমস্যা, ভয় আৰু দুৰ্নীতিৰ পৰা পৰিত্ৰাণ পাবলৈ ৰাইজে বিজেপিক আঁকোৱালি লৈছে। ইমানৰ পিছতো মমতা বেনাৰ্জীয়ে আশা এৰি দিয়া নাই আৰু দলীয় কৰ্মীসকলক হতাশ নহৈ ভোট গণনা শেষ হোৱালৈকে ধৈৰ্য্য ধৰিবলৈ আহ্বান জনাইছে।
