দেশৰ গৃহমন্ত্ৰী অমিত শ্বাহে ক’ৰ’না বিৰোধী যুঁজৰ নেতৃত্ব প্ৰধানমন্ত্ৰী নৰেন্দ্ৰ মোদীক অভিনন্দন জনাইছে।
দেশত ক’ৰ’নাতংক অব্যাহত থকাৰ মাজতে গৃহমন্ত্ৰী অমিত শ্বাহে ক্ৰমাগতভাৱে দ্বিতীয়খন দলীয় ভাৰ্চুৱেল ৰেলীত অংশগ্ৰহণ কৰিছে।
যোৱা দেওবাৰে অমিত শ্বাহে বিহাৰত দলীয় ভাৰ্চুৱেল ৰেলীত অংশগ্ৰহণ কৰাৰ পিছত আজি ওড়িশাত অন্য এক ভাৰ্চুৱেল ৰেলীত অংশগ্ৰহণ কৰি প্ৰধানমন্ত্ৰীক এইদৰে অভিনন্দন জনাইছে।
‘কোভিড১৯ আতংকৰ সময়ত চৰকাৰে ১৩০ কোটি ভাৰতীয়ক লগত লৈ যুঁজিছে। আৰু সেই কাৰণেই ক’ৰ’না বিৰোধী যুঁজত ভাৰতে বিশ্বৰ ভিতৰতে সফল দেশসমূহৰ ভিতৰত আছে। প্ৰধানমন্ত্ৰী নৰেন্দ্ৰ মোদীৰ নিৰ্দেশত ১৩০ কোটি মানুহে নিজৰ গৃহত আৱদ্ধ আছিল আৰু মহামাৰীৰে মোকাবিলা কৰিবলৈ চৰকাৰক সহযোগিতা কৰিছিল।’ ওড়িশাত জন সদ্ভাৱনা ভাৰ্চুৱেল ৰেলীত অংশগ্ৰহণ কৰি গৃহমন্ত্ৰী অমিত শ্বাহে এইদৰে কয়।
‘যেতিয়া এই মহামাৰীৰ ইতিহাস লিখা হ’ব, জনতা কাৰ্ফিউক ইতিহাসৰ পাতত সোণালী আখৰেৰে লিপিৱদ্ধ কৰা হ’ব। কোনো ৰাজহুৱা কাৰ্ফিউতে জনতাৰ এনে সহযোগিতা মই দেখা নাই।’ গৃহমন্ত্ৰী গৰাকীয়ে জনতা কাৰ্ফিউ সম্পৰ্কে এইদৰে কয়।
তেওঁ স্বীকাৰ কৰে যে ওড়িশাৰ প্ৰৱাসী শ্ৰমিকসকলে উভতি আহোতে বহু কষ্ট ভুগিবলীয়ৈ হৈছিল আৰু চৰকাৰে অৱশেষত তেওঁলোকক ঘৰত উপস্থিত হোৱাত সহায় কৰিছে।
কেন্দ্ৰই চাৰি ঘণ্টাৰ ভিতৰতে ল’কডাউন ঘোষণা কৰিবলগীয়া হোৱাৰ বাবে প্ৰৱাসী শ্ৰমিকৰ বাবে ব্যৱস্থা কৰাত চৰকাৰৰ বিলম্ব হ’ল বুলিও কৌশলী মন্তব্য কৰে গৃহমন্ত্ৰী অমিত শ্বাহে।
শ্বাহে আৰু কয় যে প্ৰধানমন্ত্ৰীয়ে নিয়মিতভাৱে ৰাজ্যৰ মুখ্যমন্ত্ৰীসকলৰ সৈতে আলোচনাত মিলিত হৈ কোভিড১৯ক প্ৰতিৰোধ কৰিবলৈ নীতি নিৰ্ধাৰণ কৰি আহিছে।
