হোজাই সত্ৰ ন্যায়াধীশৰ আদালতে আজি এক ঐতিহাসিক ৰায় প্ৰদান প্রদান কৰে। আদালতখনে এটি সাত বছৰীয়া শিশুক বলাৎকাৰ কৰি হত্যা কৰাৰ অভিযোগত অভিযুক্তক ফাঁচিৰ ৰায় দিয়ে। কৃষ্ণ ৰাজগৌড় ওৰফে সাগৰক আদালতখনে প্ৰাণদণ্ডৰ নিৰ্দেশ দিয়ে।
উল্লেখযোগ্য যে ২০১৭ চনৰ ৫ ফেব্ৰুৱাৰিত লামডিঙৰ ২নং শাস্ত্ৰী গাঁৱৰ এটি কণমানি শিশুক বলাৎকাৰ কৰিছিল অভিযুক্ত কৃষ্ণ ৰাজগৌড়ে। পাষণ্ড ৰাজগৌড়ে শিশুটিক বলাৎকাৰ কৰি ডিঙি চেপি হত্যা কৰিছিল।
অভিযুক্ত ২৭ বছৰীয়া কৃষ্ণ ৰাজগৌড় দুৰ্ভগীয়া শিশুটিৰ ঘৰত বনকৰা হিচাপে আছিল। বলাৎকাৰী তথা হত্যাকাৰী কৃষ্ণৰ ওৰফে সাগৰৰ ঘৰ গোলাঘাট জিলাৰ সৰুপথাৰ থানাৰ অন্তৰ্গত বনগাঁৱত।
ঘটনা সন্দৰ্ভত কৃষ্ণৰ বিৰুদ্ধে লামডিং থানাত ২৩/১৭ নম্বৰত এটা গোচৰ ৰুজু হৈছিল। আদালতখনে ভাৰতীয় দণ্ডবিধিৰ ৩৬৩/৩০২/২০১ ধাৰাত অভিযুক্তক ফাঁচিৰ ৰায় দিয়ে।
উক্ত গোচৰত চৰকাৰী পক্ষৰ হৈ যুক্তি দৰ্শাইছিল অধিবক্তা অমৰজ্যোতি শইকীয়াই।