হলিউডৰ প্ৰবীণ অভিনেতা জেমছ হেণ্ডিৰ মৰ্মান্তিক মৃত্যুৰ খবৰে বিনোদন জগতখনত শোকৰ ছাঁ পেলাইছে। ‘টপ গান: মেভেৰিক’, ‘জুমানজী’, ‘লোগান’কে ধৰি কেইবাখনো জনপ্ৰিয় ছবি আৰু টেলিভিছন ধাৰাবাহিকত তেওঁক দেখা গৈছে।
লছ এঞ্জেলছৰ ঘৰত ছুৰীবিদ্ধ অৱস্থাত উদ্ধাৰ হৈছে অভিনেতাজনৰ মৃতদেহ। এই ঘটনাত অভিনেতাজনৰ প্ৰেয়সীৰ পুত্ৰক গ্ৰেপ্তাৰ কৰা হৈছে।
আৰক্ষী সূত্ৰৰ মতে, বুধবাৰে পুৱা লছ এঞ্জেলছৰ টাৰ্জানা অঞ্চলৰ জেমছ হেণ্ডিৰ ঘৰৰ পৰা ৯১১ নম্বৰত ৰহস্যজনক ফোন আহিছিল। তেওঁ নিজকে ‘মই ঈশ্বৰৰ পুত্ৰ, মই এজন পাপীক হত্যা কৰিলোঁ’ বুলি পৰিচয় দিছিল। সেই ফোনটোৰ পিছতে ঘটনাস্থলীত উপস্থিত হয় আৰক্ষী।
আৰক্ষীয়ে ঘৰটোলৈ গৈ ৮১ বছৰীয়া অভিনেতাজনক অচেতন অৱস্থাত উদ্ধাৰ কৰে। তেওঁৰ বুকুত সোমাই আছিল এখন ছুৰী। ততাতৈয়াকৈ তেওঁক চিকিৎসালয়লৈ লৈ যোৱা হয় যদিও চিকিৎসকে তেওঁক মৃত বুলি ঘোষণা কৰে।
তদন্তত প্ৰকাশ পাইছে যে অভিযুক্তজন হৈছে জেমছ হেণ্ডিৰ প্ৰেমিকাৰ পুত্ৰ ৪৪ বছৰীয়া মাইকেল গ্লেডিল। তেওঁ মাকৰ সৈতে একেখন ঘৰতে থাকিছিল।
আৰক্ষীয়ে দাবী কৰা মতে, সেই স্থানত উপস্থিত হোৱাৰ পিছত মাইকেল গ্লেডিলে নিজেই হত্যাকাণ্ডৰ কথা স্বীকাৰ কৰে। তেওঁক গ্ৰেপ্তাৰ কৰি সোধা-পোছাৰ বাবে অনা হয়। তেওঁৰ বিৰুদ্ধে হত্যাৰ গোচৰ ৰুজু কৰা হৈছে। আদালতে তেওঁৰ জামিনৰ মূল্য ২০ লাখ ডলাৰ নিৰ্ধাৰণ কৰিছে। অৱশ্যে হত্যাৰ কাৰণ এতিয়াও স্পষ্ট হোৱা নাই। ঘটনাৰ তদন্ত অব্যাহত আছে।
জেমছ হেণ্ডিয়ে দশক দশক ধৰি হলিউডত কাম কৰি আহিছে। প্ৰায় পাঁচ দশকৰ অভিনয় জীৱনত তেওঁ ১৪০ খনতকৈও অধিক ছবি আৰু টেলিভিছন প্ৰডাকচনত অভিনয় কৰিছে। তেওঁৰ কিছুমান উল্লেখযোগ্য ছবিৰ ভিতৰত আছে ‘জুমানজী’, ‘আৰাকনোফ’বিয়া’, ‘লোগান’ আৰু ‘টপ গান: মেভেৰিক’। ২০২২ চনত মুক্তি পোৱা ‘টপ গান: মেভেৰিক’ ছবিখনত তেওঁ বাৰটেণ্ডাৰ জিমিৰ চৰিত্ৰত অভিনয় কৰিছিল।
কেৱল ছবিতে নহয়, টেলিভিছনতো তেওঁৰ দীৰ্ঘদিনীয়া উপস্থিতি দেখা গৈছিল। ‘এনচিআইএছ: লছ এঞ্জেলছ’, ‘দ্য ক্ল’জাৰ’, ‘কল্ড কেছ’, ‘ল এণ্ড অৰ্ডাৰ’, ‘ক্ৰিমিনেল মাইণ্ডছ’ আৰু ‘দ্য এক্স-ফাইলছ’ আদি জনপ্ৰিয় ধাৰাবাহিকত তেওঁ অভিনয় কৰিছে।
