‘হোৱেন হেৰী মেট চেলি’কে ধৰি কেইবাখনো জনপ্ৰিয় ছবিৰ পৰিচালক ৰব ৰেইনাৰ আৰু তেওঁৰ পত্নী মিচেল চিংগাৰ ৰেইনাৰৰ অস্বাভাৱিক মৃত্যু ঘটিছে। কেলিফৰ্ণিয়াৰ ব্ৰেণ্টউডৰ এটা বন্ধ ঘৰৰ পৰা উদ্ধাৰ হৈছে পৰিচালক আৰু তেওঁৰ পত্নীৰ ক্ষতবিক্ষত মৃতদেহ।
আৰক্ষীৰ সূত্ৰ অনুসৰি ৰব আৰু মিচেলৰ মৃতদেহত কিছু সন্দেহজনক আঘাত আছে। যিটো ছুৰীৰে আক্ৰমণ কৰা বুলি দাবী কৰা হৈছে। প্ৰাৰম্ভিক অনুমান অনুসৰি হলিউডৰ এই জনপ্ৰিয় পৰিচালক আৰু তেওঁৰ পত্নীক কোনো অজ্ঞাত আক্ৰমণকাৰীয়ে হত্যা কৰিছে।
জানিব পৰা মতে, দেওবাৰে বিয়লি লছ এঞ্জেলছৰ ব্ৰেণ্টউডৰ পৰা ফোন পোৱাৰ পিছতে আৰক্ষীয়ে ৰেইনাৰৰ ঘৰত উপস্থিত হয়। ঘৰৰ ভিতৰৰ পৰা সন্দেহজনক অৱস্থাত উদ্ধাৰ কৰে ৭৮ বছৰীয়া ৰব আৰু ৬৮ বছৰীয়া মিচেলৰ মৃতদেহ।
সংবাদ সংস্থাৰ এক প্ৰতিবেদন অনুসৰি ৰেইনাৰ দম্পতীহালৰ কন্যা ৰমীয়ে প্ৰথমে তেওঁলোকৰ মৃতদেহ দেখি আৰক্ষীক খবৰ দিয়ে। ১৪ ডিচেম্বৰত স্থানীয় সময় অনুসৰি বিয়লি ৩:৩০ বজাৰ পিছত তেওঁৰ পৰা ফোন পোৱাৰ পিছতে আৰক্ষীয়ে ঘৰটোত উপস্থিত হয়।
ৰেইনাৰৰ মুখপাত্ৰই দেওবাৰে সন্ধিয়া তেওঁলোকৰ মৃত্যুৰ খবৰ নিশ্চিত কৰে। এই ঘটনাৰ তদন্ত আৰম্ভ কৰিছে লছ এঞ্জেলছ আৰক্ষীয়ে। এই ঘটনাই হলিউডত শোকৰ ছাঁ পেলাইছে।
এলএপিডিৰ ডেপুটি-চীফ এলান হেমিল্টনে কয় যে, “হত্যাৰ সৈতে জড়িত সন্দেহযুক্ত লোকজনক এতিয়াও চিনাক্ত কৰিব পৰা নাই। তেওঁ লগতে কয় যে কোনো লোকক সন্দেহযুক্ত হিচাপে গ্ৰেপ্তাৰ বা সোধা-পোছা কৰা হোৱা নাই।” অৱশ্যে এটা সংবাদ মাধ্যমৰ বাতৰি অনুসৰি এই ঘটনাৰ সন্দেহযুক্ত ব্যক্তিজন হৈছে পৰিচালকগৰাকীৰ পুত্ৰ। যদিও এই খবৰ আৰক্ষীয়ে নিশ্চিত কৰা নাই।
এক বিবৃতিত লছ এঞ্জেলছৰ মেয়ৰ কেৰেন বেছে এই কাণ্ডক লৈ শোক প্ৰকাশ কৰে। ৰেইনাৰৰ মৃত্যুত মই স্তম্ভিত হৈছো আৰু এই কাণ্ড আমাৰ চহৰ আৰু দেশৰ বাবে এক বিৰাট ক্ষতি।
ৰব ৰেইনাৰ কেৱল হলিউডৰ জনপ্ৰিয় পৰিচালকে নহয়, এজন অভিনেতাও। যদিও পৰিচালক হিচাপে তেওঁ অধিক জনপ্ৰিয়তা লাভ কৰিছিল। ১৯৮০ চনত ৰবে ‘হোৱেন হেৰী মেট চেলী’, ‘দ্য প্ৰিন্সেছ ব্রাইড’ আৰু ‘ষ্টেণ্ড বাই মি’ আদি ছবি নিৰ্মাণ কৰি দৰ্শকৰ হৃদয় জয় কৰিছিল। পিছলৈ তেওঁ ‘এ ফিউ গুড মেন’ ছবিৰ বাবে অস্কাৰৰ মনোনয়ন লাভ কৰে। ৰব ৰেইনাৰে ‘স্লিপলেছ ইন ছিয়াটল’, ‘এভৰিৱান’ছ হিৰো’, ‘দ্য উলফ অৱ ৱাল ষ্ট্ৰীট’কে ধৰি কেইবাখনো ছবিত অভিনেতা হিচাপে কাম কৰিছে।
‘হোৱেন হেৰী মেট চেলী’য়ে ৰবক পৰিচালক হিচাপে জনপ্ৰিয়তা কঢ়িয়াই অনাই নহয়, তেওঁৰ ব্যক্তিগত জীৱনকো সলনি কৰি পেলাইছিল। সেই ছবিখনৰ চেটত ৰবে ফটোগ্ৰাফাৰ মিচেল চিংগাৰক লগ পাইছিল। সেই চিনাকি প্ৰেমৰ সম্পৰ্কলৈ পৰিণত হ’বলৈ বেছি সময় নালাগিল। ১৯৮৯ চনত বিবাহপাশত আবদ্ধ হয়।তেওঁলোকৰ তিনিটা সন্তান। দীৰ্ঘদিন ধৰি লছ এঞ্জেলছৰ ব্ৰেণ্টউডৰ সেই ঘৰটোতে চলি আহিছিল এই দম্পতীহালৰ সংসাৰ।
