আমেৰিকা যুক্তৰাষ্ট্ৰৰ সামৰিক বাহিনীয়ে ইৰাণৰ এটা সামৰিক ঘাটিত পুনৰ নিশাৰ ভাগত এক নতুন আক্ৰমণ সংঘটিত কৰিছে। হৰমুজ প্ৰণালীত আমেৰিকাৰ সেনা আৰু বাণিজ্যিক জাহাজৰ যাতায়াতৰ প্ৰতি ভাবুকি কঢ়িয়াই অনাৰ সন্দেহত এই আক্ৰমণ চলোৱা হৈছে বুলি ৰয়টাৰ্ছক জানিবলৈ দিছে এগৰাকী আমেৰিকান বিষয়াই। একে সময়তে আমেৰিকান সেনাই কেইবাখনো ইৰাণী ড্ৰোণো আকাশতে ধ্বংস কৰিছে। নাম প্ৰকাশত অনিচ্ছুক আমেৰিকাৰ চৰকাৰী বিষয়াগৰাকীৰ মতে, ধ্বংস কৰা ইৰাণী ড্ৰোণসমূহেও আমেৰিকাৰ নিৰাপত্তাৰ প্ৰতি অনুৰূপ ভাবুকি কঢ়িয়াই আনিছিল।
যোৱা ২৮ ফেব্ৰুৱাৰীৰ পৰা আমেৰিকা আৰু ইজৰাইলৰ আক্ৰমণৰ পিছতে আৰম্ভ হোৱা এই যুদ্ধত ইতিমধ্যে হেজাৰ হেজাৰ লোকৰ প্ৰাণহানি হোৱাৰ লগতে বিশ্বজুৰি ইন্ধনৰ মূল্য অস্বাভাৱিকভাৱে বৃদ্ধি পাইছে। যোৱা তিনিমাহ ধৰি চলি থকা এই সংঘাতৰ অন্ত পেলোৱাৰ উদ্দেশ্যে দুয়োপক্ষৰ মাজত আলোচনা অব্যাহত থকাৰ মাজতেই এই নতুন আক্ৰমণৰ খবৰে সমগ্ৰ বিশ্বত তীব্ৰ উদ্বেগ প্ৰকাশৰ কাৰণ হৈ পৰিছে। এই আক্ৰমণৰ খবৰ পূৰ্বতে প্ৰকাশ পোৱা নাছিল যদিও বৰ্তমানৰ পৰিস্থিতিয়ে শান্তি প্ৰক্ৰিয়াটোৰ ওপৰত এক নেতিবাচক প্ৰভাৱ পেলোৱাৰ আশংকা কৰা হৈছে।
ইপিনে, বুধবাৰে আমেৰিকাৰ ৰাষ্ট্ৰপতি ডনাল্ড ট্ৰাম্পে ইৰাণৰ চৰকাৰী সংবাদ মাধ্যমৰ এক প্ৰতিবেদন পোনছাটেই নাকচ কৰে। শান্তি চুক্তিৰ অংশ হিচাপে ইৰাণ আৰু ওমানে যুটীয়াভাৱে হৰমুজ প্ৰণালীৰ মাজেৰে জাহাজৰ চলাচল পৰিচালনা কৰিব বুলি প্ৰকাশ পোৱা বাতৰিটো খণ্ডন কৰি ট্ৰাম্পে স্পষ্ট কৰি দিয়ে যে এই গুৰুত্বপূৰ্ণ জলপথটো সকলোৰে যাতায়াতৰ বাবে সম্পূৰ্ণৰূপে মুকলি হৈ থাকিব। এই সন্দৰ্ভত আমেৰিকাই কোনো ধৰণৰ আপোচ নকৰে বুলিও তেওঁ ইংগিত দিয়ে।
