পাকিস্তানৰ খাইবাৰ পাখতুনখোৱা প্ৰদেশত এক ভয়ংকৰ ঘটনা সংঘটিত হৈছে। বুধবাৰে হোতি থানাৰ অন্তৰ্গত বাবু মহল্লা খাজা গঞ্জ বজাৰত থকা এখন গুৰুদ্বাৰৰ ভিতৰতে এক বৃদ্ধ শিখ দম্পতীক দুৰ্বৃত্তই গুলীয়াই হত্যা কৰে। নিহত লোক দুজনৰ নাম সত্তৰ বছৰীয়া জগন্নাথ আৰু তেওঁৰ পত্নী আছমা ৱাণ্টি বুলি জানিব পৰা গৈছে। তেওঁলোক উক্ত গুৰুদ্বাৰখনৰ তত্ত্বাৱধায়ক আছিল। ঘটনাৰ পিছৰে পৰা আক্ৰমণকাৰীসকল পলাতক অৱস্থাত আছে।
জানিব পৰা মতে, বুধবাৰে পুৱা বৃদ্ধ দম্পতীহাল গুৰুদ্বাৰলৈ গৈছিল। অভিযোগ অনুসৰি, সেই সময়তে এদল অচিনাকি যুৱকে গুৰুদ্বাৰৰ ভিতৰত প্ৰৱেশ কৰে আৰু বৃদ্ধ দম্পতীহালক লক্ষ্য কৰি নিৰ্বিচাৰে গুলীচালনা কৰিবলৈ আৰম্ভ কৰে। এই ঘটনাত গুৰুদ্বাৰৰ ভিতৰত এক আতংকময় পৰিৱেশৰ সৃষ্টি হয়। গুলীৰ আঘাতত তেজেৰে লুতুৰি-পুতুৰি হৈ দুয়োগৰাকী লোক সেই ঠাইতে ঢলি পৰে আৰু আক্ৰমণকাৰীসকলে লগে লগে সেই স্থানৰ পৰা পলায়ন কৰে।
অৱশ্যে বৃদ্ধ দম্পতীহালক কি কাৰণে হত্যা কৰা হ‘ল সেয়া এতিয়াও স্পষ্ট হোৱা নাই আৰু আৰক্ষীয়ে ইতিমধ্যে ঘটনাৰ তদন্ত আৰম্ভ কৰিছে। এই আক্ৰমণৰ ঘটনাক বিজেপিয়ে তীব্ৰ ভাষাৰে গৰিহণা দিছে। তেওঁলোকৰ মতে, এই হত্যাই পাকিস্তানত ধৰ্মীয় সংখ্যালঘুসকলৰ নিৰাপত্তাক লৈ উদ্বেগ বৃদ্ধি কৰিছে। আনহাতে, অকাল তখতৰ জঠেদাৰ অৰ্থাৎ প্ৰধান পুৰোহিত জ্ঞানী কুলদীপ সিং গৰ্গাজেও এই ঘটনাৰ গৰিহণা দিছে। তেওঁ পাকিস্তানৰ প্ৰধানমন্ত্ৰী শ্বাহবাজ শ্বৰীফ আৰু খাইবাৰ পাখতুনখোৱাৰ মুখ্যমন্ত্ৰী মহম্মদ ছোহেল খান আফ্ৰিদিক বিষয়টো গুৰুত্বসহকাৰে ল’বলৈ আহ্বান জনাইছে। ইয়াৰ লগতে তেওঁ দোষীক অতি সোনকালে গ্ৰেপ্তাৰ কৰি কঠোৰ শাস্তি প্ৰদানৰো দাবী জনাইছে।
