যিখন অভিজাত হোটেলত এসময়ত দেশ-বিদেশৰ পৰ্য্যটক, নামী-দামী তাৰকাৰ পৰা আৰম্ভ কৰি বিভিন্ন ক্ষেত্ৰৰ আগশাৰীৰ ব্যক্তিয়ে বাহৰ পাতিছিল সেই হোটলখন আজি পৰিত্যক্ত। এবছৰতকৈ অধিক সময় হোটেলখন বন্ধ হৈ আছে। আনকি তাত থকা নিৰাপত্তৰক্ষীয়ে সাংবাদিককো প্ৰৱেশৰ অনুমতি নিদিয়ে।
মন কৰিব লগীয়া যে এসময়ত ৰাজ্যৰ বিভিন্ন গুৰূত্বপূৰ্ণ সভা-সমিতি, আলোচনা-বিলোচনা, ৰাজনৈতিক কুচকাৱাজৰ স্থান হিচাপে ব্যৱহৃত এই অভিজাত হোটেলখন এতিয়া ৰাজ্য চৰকাৰে সম্পূৰ্ণৰূপে অৱহেলিত কৰি ৰাখিছে।
চৰকাৰী তথ্য মতে, ৰাজহুৱা খণ্ডৰ অন্তৰ্গত হোটেলখন ২০১৭ চনৰ ১ ছেপ্টেম্বৰৰ পৰাই বন্ধ হৈ আছে। অসম পৰ্যটন উন্নয়ন নিগম লিমিটেডে এখন জাননীযোগে হোটেলখন উক্ত তাৰিখৰ পৰা বন্ধ কৰি ৰাখিছে। জানিব পৰামতে, সেই সময়ত হোটেল ব্ৰহ্মপুত্ৰ অশোকক এক ৰাজ্যিক অতিথিশালালৈ ৰূপান্তৰ কৰাৰ সিদ্ধান্ত লৈছিল ৰাজ্য চৰকাৰে।
ৰাজ্যৰ ৰাজধানী গুৱাহাটী মহানগৰীত ৰাজ্যিক অতিথিশালাৰ অভাৱ পূৰণৰ বাবেই হোটেলখনক অতিথিশালালৈ ৰূপান্তৰ কৰাৰ সিদ্ধান্ত লৈছিল বুলি জানিব পৰা গৈছিল।
উল্লেখযোগ্য যে কেইমাহমানৰ আগলৈকে প্ৰাক্তন মুখ্য মন্ত্ৰী তৰুণ গগৈয়ে কইনাধৰাৰ ৰাজ্যিক অতিথিশালা দখল কৰি থকাৰ দৰেই ৰাজভৱনৰ ওচৰত থকা ব্ৰহ্মপুত্ৰ ৰাজ্যিক অতিথিশালা দখল কৰি আছে মুখ্য মন্ত্ৰী সৰ্বানন্দ সোণোৱালে। গতিকে ৰাজ্যৰ ৰাজধানীত বিশিষ্ট অতিথিৰ বাবে খালী নাই ৰাজ্যিক অতিথিশালা।
কিন্তু আজি এটা বছৰ পাৰ হৈ যোৱাৰ পাছতো হোটেল ব্ৰহ্মপুত্ৰ অশোকক ৰাজ্যিক অতিথিশালা হিচাপে গঢ় দিয়াৰ ক্ষেত্ৰত কোনো কাৰ্য্যকৰী ব্যৱস্থা ল’ব নোৱাৰিলে ৰাজ্য চৰকাৰখনে। তাৰ পৰিৱৰ্তে এতিয়া ‘ভূত বঙলা’ হ’বলৈ এৰি দিছে এসময়ৰ বিলাসী হোটেলখনৰ সুন্দৰ অট্টালিকাটোক।
হোটেলখনৰ ৰখীয়া হিচাপে কেইজনমান গৃহৰক্ষী জোৱানক পৰ্যটন বিভাগে হোটেলখনত নিয়োগ কৰি থৈছে। তেওঁলোকে সকলো সময়তে হোটেলখনৰ মূল প্ৰৱেশদ্বাৰত তলা লগাই থয়।
আমাৰ সাংবাদিকে হোটেলখনৰ ভিতৰৰ অৱস্থাৰ বুজ লোৱাৰ চেষ্টা চলাইছিল যদিও বিভাগীয় অনুমতি নথকাৰ দোহাই দি নিৰাপত্তাৰক্ষীয়ে সাংবাদিকক ভিতৰলৈ প্ৰৱেশ কৰিবলৈ নিদিলে।
ব্ৰহ্মপুত্ৰৰ পাৰত অতি সুন্দৰ পৰিৱেশত অৱস্থিত এই হোটেলখনৰ সুন্দৰ অট্টালিকাটোৰ বেৰবোৰ ঠায়ে ঠায়ে উৱলি যোৱাৰ উপৰি খহি পৰাও দেখা গৈছে। চৰকাৰৰ অৱহেলাৰ বাবেই হোটেলখনৰ পিছফালৰ লনত, য’ত এসময়ত বিভিন্ন পাৰ্টি অনুষ্ঠিত হৈছিল, সেই স্থান এতিয়া জংঘলেৰে আৱৰা।
পৰিৱৰ্তনৰ শ্ল’গানেৰে শাসনলৈ অহা চৰকাৰখনে ৰাজ্যত পৰ্যটনৰ বিকাশৰ কথা কৈ ‘নমামি ব্ৰহ্মপুত্ৰ’, ‘নমামি বৰাক’কে ধৰি বিভিন্ন উৎসৱ পাতি ৰাজকোষৰ কোটি কোটি টকা শৰাধ কৰি থকাৰ বিপৰীতে পৰ্যটকৰ বাবে সুন্দৰ আৱাসস্থল এটা মাহৰ পাছত মাহ ধৰি বন্ধ কৰি ৰখাটোৱে চৰকাৰৰ নিষ্ঠাৰ ক্ষেত্ৰত প্ৰশ্নচিহ্নৰ সৃষ্টি কৰিছে।
