ৰাজ্যত আজিৰ পৰা আৰম্ভ হ’ব বহু প্ৰত্যাশিত হাইস্কুল শিক্ষান্ত পৰীক্ষা। ৮৫৭টা পৰীক্ষা কেন্দ্ৰত অনুষ্ঠিত হ’ব লগীয়া এইবাৰৰ পৰীক্ষাত মুঠ ৩,৫২, ১৪৩ গৰাকী ছাত্ৰ-ছাত্ৰীয়ে অৱতীৰ্ণ হ’ব।
ছেবা কৰ্তৃপক্ষই জনোৱা অনুসৰি ৩,৪২,৭০২গৰাকী পৰীক্ষাৰ্থীয়ে হাইস্কুল শিক্ষান্ত পৰীক্ষা আৰু ৯,৪৪১ গৰাকী পৰীক্ষাৰ্থীয়ে হাইমাদ্ৰাছা পৰীক্ষাত অৱতীৰ্ণ হ’ব।
উল্লেখ্য যে বিগত কিছু বছৰৰ পৰা নানা বিতৰ্কত সোমাই পৰা মেট্ৰিক পৰীক্ষা যাতে এইবাৰ সুকলমে সম্পন্ন হৈ যায় তাৰ বাবে সকলো প্ৰস্তুতি সম্পূৰ্ণ কৰি তুলিছে ছেবাই।
পৰীক্ষা কেন্দ্ৰসমূহৰ সুৰক্ষাৰ স্বাৰ্থত ২০০ মিটাৰ ব্যাসাৰ্ধৰ ভিতৰত ১৪৪ ধাৰা জাৰি কৰা কৰাৰ লগতে প্ৰতিটো পৰীক্ষা কেন্দ্ৰতে সংস্থাপন কৰা হৈছে চিচি টিভি। তদুপৰি স্পৰ্শকাতৰ পৰীক্ষা কেন্দ্ৰসমূহত বিশেষ নিৰীক্ষণৰো ব্যৱস্থা কৰিছে ছেবা কৰ্তৃপক্ষই।
আনহাতে নকল ৰোধ কৰাৰ বাবে পৰীক্ষা কেন্দ্ৰ সমূহ ফ্লায়িং স্কোৱাডৰ নিৰীক্ষণত থাকিব বুলিও জনায় ছেবা কৰ্তৃপক্ষই। প্ৰথমবাৰলৈ ছেবাই ১৩গৰাকী দৃষ্টিহীন পৰীক্ষাৰ্থীৰ বাবে ৰাজ্যৰ পাঁচটা পৰীক্ষা কেন্দ্ৰত ব্ৰেইল পদ্ধতিত প্ৰশ্নকাকতৰ ব্যৱস্থা কৰিছে।
উল্লেখ্য যে পৰীক্ষা কেন্দ্ৰত মোবাইল নিষিদ্ধ কৰাৰ লগতে পৰীক্ষাৰ্থীসকলে ক’লা চিয়াঁহীৰেহে উত্তৰ লিখিব লাগিব বুলি ছেবা কৰ্তৃপক্ষই নিৰ্দেশনা জাৰি কৰিছে। ইয়াৰ উপৰি দুঘণ্টাৰ পূৰ্বে পৰীক্ষা হল ত্যাগ কৰা পৰীক্ষাৰ্থীয়ে প্ৰশ্নকাকত নিব নোৱাৰিব বুলিও স্পষ্ট কৰি দিছে ছেবা কৰ্তৃপক্ষই।
