ৰাহুল গান্ধীৰ নেতৃত্বত চলি থকা ‘ভাৰত জোড়ো যাত্ৰা’ই আজি দিল্লীত প্ৰৱেশ কৰিছে। কেন্দ্ৰীয় স্বাস্থ্য মন্ত্ৰী মানসুখ মাণ্ডব্যই ৰাহুল গান্ধীলৈ পত্ৰ প্ৰেৰণ কৰি ক’ভিদ প্ৰট’কল মানি চলিবলৈ আহ্বান জনোৱাৰ মাজতে ৰাজধানীত প্ৰৱেশ কৰিছে কংগ্ৰেছৰ ভাৰত জোড়ো যাত্ৰাই।
দিল্লীত প্ৰৱেশ কৰাৰ পাছতে কংগ্ৰেছ নেতা ৰাহুল গান্ধীয়ে বিজেপি আৰু মোদী চৰকাৰৰ বিৰুদ্ধে আক্ৰমণ তীব্ৰতৰ কৰি তুলিছে। দেশৰ ৰাজধানীত উপস্থিত হৈ ৰাহুল গান্ধীয়ে বিজেপিক তীব্ৰ সমালোচনা কৰি কয় যে, “তেওঁলোকে ঘৃণা বিয়পাই দিয়ে, আমি প্ৰেম বিয়পাই দিওঁ, আমি সকলো ভাৰতীয়কে আকোৱালি লওঁ।”
কংগ্ৰেছ নেতাগৰাকীয়ে লগতে কয়, “ভাৰত জোড়ো যাত্ৰাই কন্যাকুমাৰী এৰি অহাৰ সময়ত এটা কথা গম পালোঁ যে এই দেশত আৰু কোনো ঘৃণা নাই, এই দেশত কেৱল প্ৰেমহে আছে।”
ৰাহুল গান্ধীয়ে লগতে সংবাদ মাধ্যমৰ বিৰুদ্ধেও এক গুৰুতৰ অভিযোগ উত্থাপন কৰিছে। গান্ধীৰ অভিযোগ মতে “কেৱল সংবাদ মাধ্যমেহে ঘৃণা দেখুৱায়। হিন্দু-মুছলমান-শিখ-খ্ৰীষ্টানকে ধৰি সকলো ধৰ্মৰ লোকে এই যাত্ৰাত একেলগে খোজ কাঢ়িছে। ধনী, দুখীয়া, খেতিয়ক, শ্ৰমিক সকলোৱে যাত্ৰাত ভাগ লৈছে।”
নিবনুৱা সমস্যা, মুদ্ৰাস্ফীতি, ভয় আৰু ঘৃণাৰ পৰিৱেশৰ বিৰুদ্ধে এই ‘ভাৰত জোডো যাত্ৰা’ বুলিও ৰাহুল গান্ধীয়ে পুনৰ এবাৰ দোহাৰে। কন্যাকুমাৰীৰ পৰা ৰাজধানীলৈ হাজাৰ হাজাৰ কিলোমিটাৰ খোজ কাঢ়ি দিল্লীত প্ৰৱেশ কৰাৰ লগে লগে ৰাহুল গান্ধীয়ে কেন্দ্ৰীয় চৰকাৰৰ প্ৰতি অধিক আক্ৰমণাত্মক হৈ পৰা দেখা গৈছে।
দেশৰ প্ৰতিটো জলন্ত সমস্যাকে এই যাত্ৰাকালত উন্মুক্ত কৰি কংগ্ৰেছ নেতাগৰাকীয়ে বিভিন্ন প্ৰশ্নবাণেৰে চৰকাৰক থকা সৰকা কৰা দেখা গৈছে। ভাৰত জোড়ো যাত্ৰাই দিল্লীত প্ৰৱেশ কৰা পূৰ্বে কেন্দ্ৰই এই যাত্ৰাক বন্ধ কৰিবলৈ ষড়যন্ত্ৰ কৰা বুলিও কংগ্ৰেছে মোদী চৰকাৰৰ বিৰুদ্ধে গুৰুতৰ অভিযোগ উত্থাপন কৰিছে।
উল্লেখ্য, কন্যাকুমাৰীৰ পৰা আৰম্ভ কৰা এই ‘ভাৰত জোডো যাত্ৰা’ই ১০৭ দিনত প্ৰায় তিনি হাজাৰ কিলোমিটাৰ যাত্ৰা সম্পূৰ্ণ কৰিছে। ১০৮ দিনৰ দিনা দিল্লীত প্ৰৱেশ কৰে এই যাত্ৰা। দিল্লীত প্ৰৱেশ কৰাৰ সময়ত হাজাৰ হাজাৰ লোকে লোকে ৰাহুল গান্ধীৰ সৈতে পদযাত্ৰা কৰা দেখা গৈছে।
