অসমীয়াৰ বাপতি সাহোন ৰঙালী বিহুতেই সন্দেহযুক্ত আলফা স্বাধীনে অ’ এন জি চিৰ লাকুৱা ৮নং তৈল ক্ষেত্ৰৰ অধীনস্থ বাগান তিনিআলিৰ ৰোমানিয়া ১০৩ নং ৱক অভাৰ ৰিগৰ পৰা তিনি অসমীয়া থলুৱা কৰ্মচাৰীক অপহৰণ কৰা কাৰ্যক তীব্ৰ গৰিহণা দিছে মানৱ অধিকাৰ তথা সমাজ কৰ্মী ডঃ দিব্যজ্যোতি শইকীয়াই।
ডঃ শইকীয়াই কয় যে অনাকাংক্ষিতভাবে তিনি অসমীয়া খিলঞ্জীয়া অ’ এন জি চি কৰ্মচাৰীক অপহৰণ কৰি সন্দেহযুক্ত আলফাই সমগ্ৰ অসমবাসীৰ লগতে বিশ্ব বাসীৰ ওচৰত স্বাৰ্থপৰ স্বৰূপ উদঙাই দেখুৱাইছে।
তেওঁ কয়, ‘’সততে বিপ্লৱৰ কথা কোৱাৰ লগতে থলিগিৰীৰ কথা কোৱা এই অপহৰণকাৰী সন্দেহযুক্ত আলফাই তৈল ক্ষেত্ৰ, প্ৰাকৃতিক সম্পদ আদিৰ অধিকাৰৰ কথা কোৱাৰ লগতে থলগিৰীৰ নিয়োগৰ কথা সময়ে সময়ে কৈ আহিছে, কিন্তু ধেমাজি কাণ্ডকে ধৰি এনে বহু উদাহৰণৰ লগতে শেহতীয়াকৈ তিনিজনকৈ অসমীয়া খিলঞ্জীয়াক অপহৰণ কৰি তেঁওলোকে পুনৰবাৰ সন্ত্ৰসবাদীৰ চৰিত্ৰ প্ৰকাশ কৰিছে।‘’
ডঃ শইকীয়াই লগতে কয়, ’’যদি তেওঁলোকৰ কেন্দ্রীয় চৰকাৰৰ বিৰুদ্ধে কিবা কৰিবলগীয়া আছে তেতিয়া হ’লে কেন্দ্ৰীয় চাৰকাৰলৈ বাৰ্তা প্ৰেৰণ কৰক। আলফাৰ এনেবোৰ কাৰ্য্য কলাপৰ পৰা থলুৱা যুৱপ্ৰজন্মই কি সাহসত অ’ এন জি চি বা তৈল ক্ষেত্ৰত চাকৰি কৰিবলৈ সাহস কৰিব, ই এক চিন্তাৰ বিষয়।‘’
বিশ্ব সংবিধান সংসদ সংস্থাৰ আন্তৰাষ্ট্ৰীয় সদস্য, অৰ্ধ শতাধিক ৰাষ্ট্ৰীয় তথা আন্তঃৰাষ্ট্ৰীয় মানৱতা তথা শান্তি বঁটা প্ৰাপক ডঃ শইকীয়াই আলফা স্বাধীনলৈ আহ্বান জনাই কয় যে তেওঁলোকে কেন্দ্ৰীয় চৰকাৰৰ সৈতে শান্তি আলোচনা কৰাৰ পৰিবেশ সৃষ্টি কৰক আৰু মানবীয় দৃষ্টিৰে শীঘ্ৰে তিনি অপহৃত ব্যক্তিক মুক্তি দিয়ক।
মানৱ অধিকাৰ কৰ্মীগৰাকীয়ে লগতে সংশ্লিষ্ট কৰ্তৃপক্ষৰ উপৰি কেন্দ্ৰ আৰু ৰাজ্য চৰকাৰে যাতে উক্ত অপহৰণ কাণ্ডৰ সন্দৰ্ভত উচিত ব্যৱস্থা গ্ৰহণ কৰে তাৰ বাবেও দাবী জনায়।
উল্লেখ্য যে যোৱা ২০ এপ্ৰিলৰ নিশা ২বজাত ৫/৬ জনীয়া অস্ত্ৰধাৰী দল এটাই লাকুৱা তৈলক্ষেত্ৰৰ এটা ৰিগত কাম কৰি থকা সময়ত অ’এনজিচিৰ তিনিগৰাকী কৰ্মচাৰী ক্ৰমে মেহিনী মোহন গগৈ, অলকেশ শইকীয়া আৰু ৰিতুল শইকীয়াক অপহৰণ কৰি নিয়ে।
অপহৃত তিনিজনৰ দুজন অ’এনজিচিৰ উৎপাদন বিভাগৰ কণিষ্ঠ অভিযন্তা আৰু এজন জুনিয়ৰ টেকনিচিয়ান বুলি অ’এনজিচিয়ে প্ৰকাশ কৰিছে।
অপহৰণকাণ্ডৰ সৈতে আলফা স্বাধীন জড়িত থকাটো ইতিমধ্যে নিশ্চিত হৈছে।
