৩ জুনত যোৰাহাটৰ পৰা অৰুণাচল প্ৰদেশৰ মেচুকা অভিমুখে উৰা মৰা বায়ু সেনা বাহিনীৰ (এ এন-৩২) বিমানখন আকাশমাৰ্গৰ পৰা নিৰুদ্দেশ হোৱাৰ তিনি দিন উকলি যোৱাৰ পাছতো কোনো ধৰণৰ সন্ধান লাভ কৰিবলৈ সক্ষম হোৱা নাই উদ্ধাৰকাৰী দলে।
আজি ভাৰতীয় স্থল সেনাবাহিনী, বায়ু সেনা বাহিনী আৰু নৌ সেনা বাহিনীয়ে সন্মীলিতভাবে উদ্ধাৰ অভিযান চলালেও এতিয়ালৈ বিমানখনৰ কোনোধৰণৰ সন্ধান লাভ কৰিবলৈ সক্ষম হোৱা নাই।
ভাৰতীয় মহাকাশ গৱেষণা সংস্থাৰ বিশেষ ৰাডাৰ, দ্ৰোণ কেমেৰাও উদ্ধাৰ অভিযানত ব্যৱহাৰ কৰা হৈছে। সন্ধানহীন হৈ থকা বায়ুসেনা বাহিনীৰ বিমানখনত মুঠ ১৩ গৰাকী যাত্ৰী আছিল।
সন্ধানহীন হোৱা বায়ুসেনা বাহিনীৰ বিমানখনক লৈ ৰাষ্ট্ৰজুৰি চাঞ্চল্যৰ সৃষ্টি হৈছে। ভাৰতীয় বায়ু সেনা বাহিনীত ১৯৮৬ চনতে এ এন-৩২ শ্ৰেণীৰ বিমান অন্তৰ্ভূক্ত কৰা হৈছিল। বৰ্তমান সময়ত ইয়াৰ আধুনিকীকৰণৰ প্ৰয়োজনীয়তা আহি পৰাৰ পাছতো কিয় উত্তৰ-পূবৰ দৰে সেমেকা ৰাজ্যসমূহত এনে ধৰণৰ বিমান সমূহ বায়ু সেনা বাহিনীয়ে ব্যৱহাৰ কৰি আহিছে তাকে লৈ বিভিন্ন প্ৰশ্ন উত্থাপন হৈছে।
সমগ্ৰ দেশে সন্ধানহীন হৈ থকা বায়ু সেনাবাহিনীৰ বিমানখন উদ্ধাৰ হোৱাৰ লগতে ইয়াৰ ভিতৰত আৱদ্ধ হৈ থকা যাত্ৰী সকল কুশলে থকাৰ বাবে প্ৰাৰ্থনা কৰিছে।