ইংলেণ্ডৰ বিৰুদ্ধে সদ্যসমাপ্ত টেষ্ট শৃংখলাত উজ্জীৱিত প্ৰদৰ্শন দাঙি ধৰা ভাৰতৰ তাৰকা অফ স্পিনাৰ ৰবিচন্দ্ৰন অশ্বিনে পুনৰ আৰোহন কৰিছে টেষ্টৰ বলিং ৰেংকিঙৰ শীৰ্ষস্থান। দলীয় সতীৰ্থ যশপ্ৰীত বুমৰাহক পিছলৈ ঠেলি ৰেংকিঙৰ শীৰ্ষস্থানত উপনীত হৈছে অশ্বিন।
আই চি চিয়ে ঘোষণা কৰা শেহতীয়া ৰেংকিং অনুসৰি ৮৭০ ৰেটিং পইণ্টেৰে শীৰ্ষস্থানত আছে। আনহাতে অৱনমন ঘটা বুমৰাহে অষ্ট্ৰেলিয়ান পেচাৰ জ’ছ হেজলউডৰ সৈতে ৮৪৭ ৰেটিং পইণ্টেৰে যুটীয়াভাৱে দ্বিতীয় স্থানত আছে।
ৰেংকিঙৰ শীৰ্ষ দহত থকা আনগৰাকী ভাৰতীয় বলাৰ হৈছে ৰবীন্দ্ৰ জাদেজা। বাওঁহতীয়া স্পিনাৰগৰাকীয়ে ৭৮৮ ৰেটিং পইণ্টেৰে তালিকাৰ সপ্তম স্থানত আছে। ইফালে ইংলেণ্ডৰ বিপক্ষে শৃংখলাত চমকপ্ৰদ প্ৰদৰ্শন দাঙি ধৰা আন এগৰাকী স্পিনাৰ কুলদীপ যাদৱৰো ৰেংকিঙত উত্তৰণ ঘটিছে।
কুলদীপে ১৫ টা স্থান আগুৱাই ঘোষিত তালিকাত ১৬ নং স্থানত উপনীত হৈছে। ইফালে বেটাৰৰ তালিকাত ভাৰতীয় দলৰ অধিনায়ক ৰোহিত শৰ্মা আৰু যুৱ তাৰকা যশস্বী জয়ছোৱালৰ উত্তৰণ ঘটিছে। ৰোহিত শৰ্মাই নতুন তালিকাত ৭৫১ ৰেটিং পইণ্টেৰে ষষ্ঠ স্থানত আছে।
ইফালে শেহতীয়া টেষ্ট শৃংখলাত অভিনৱ বেটিঙেৰে সকলোৰে দৃষ্টি আকৰ্ষণ কৰা জয়ছোৱালে দুটা স্থানৰ উত্তৰণ ঘটাই অষ্টম স্থানত উপনীত হৈছে। সম্প্ৰতি তেওঁৰ ৰেটিং পইণ্ট ৭৪০। আনহাতে ইংলেণ্ডৰ বিৰুদ্ধে শৃংখলাত অংশ নোলোৱা কোহলী এটা স্থানৰ অৱনতি ঘটাই নৱম স্থানত আছে।
সমান্তৰালভাৱে জাদেজা আৰু অশ্বিনে অলৰাউণ্ডাৰ ৰেংকিঙৰ শীৰ্ষ দুটা স্থান অক্ষুণ্ণ ৰাখিছে। অৱশ্যে আন এগৰাকী ভাৰতীয় তাৰকা অক্ষৰ পেটেলৰ এটা স্থানৰ অৱনতি ঘটিছে। শেহতীয়া তালিকাত অক্ষৰ পেটেল আছে ষষ্ঠ স্থানত।
