কমা নাই মাওবাদীৰ সন্ত্ৰাস। এইবাৰ মাওবাদীৰ আই ই ডি বিস্ফোৰণত মৃত্যুক আকোৱালি ল’লে চিআৰপিএফৰ এগৰাকী সেনা-জোৱানে।
বৃহস্পতিবাৰে নিশা ঝাৰখণ্ডৰ পশ্চিম সিংভূম জিলাত সংঘটিত হয় এই ঘটনা। ঝাৰখণ্ড জিলাৰ টুম্বাহাকা আৰু সৰজামবুৰু গাঁৱৰ মাজৰ জংঘল লেগুন এলেকাত চি আৰ পি এফৰ বিশেষ কোব্ৰা বেটেলিয়নৰ জোৱানসকলে মাওবাদীৰ বিৰুদ্ধে অভিযান চলাই থকাৰ সময়তে এই বিস্ফোৰণ সংঘটিত হয়।
বিস্ফোৰণত আহত দুজন হৈছিল চি আৰ পি এফৰ কনিষ্টবল ৰাজেশ কুমাৰ আৰু পৰিদৰ্শক ভূপেন্দ্ৰ কুমাৰ। বিস্ফোৰণত আহত হোৱাৰ পিছত দুজনক বিমানযোগে চিকিৎসাৰ বাবে ৰাঁচীলৈ লৈ যোৱা হয়। তাতেই মৃত্যু হয় ৰাজেশ কুমাৰৰ।
মৃত জোৱান ৰাজেশ কুমাৰৰ ঘৰ ছত্তীশগড়ত। ২০৯ নং কোব্ৰা বেটেলিয়নৰ সদস্য আছিল তেওঁ। আনহাতে আহত ভূপেন্দ্ৰ কুমাৰ এতিয়াও ৰাঁচীৰ এখন ব্যক্তিগত চিকিৎসালয়ত চিকিৎসাধীন হৈ আছে।
শনিবাৰে ঝাৰখণ্ডৰ মুখ্যমন্ত্ৰী হেমন্ত সোৰেনে মৃত জোৱানগৰাকীক শ্ৰদ্ধাঞ্জলি জ্ঞাপন কৰে।
এই ঘটনা সন্দৰ্ভত আৰক্ষীৰ আই জি অমল ভি হোমকাৰে কয়, ‘এই ঘটনা বৃহস্পতিবাৰে নিশা প্ৰায় ১১-১২ বজাত সংঘটিত হয়। মাওবাদীয়ে কোব্ৰা বাহিনীক আক্ৰমণ কৰিবলৈ আই ই ডি বিস্ফোৰণ কৰিছিল।”
এই ঘটনাৰ পিছত অঞ্চলটোত সেনা বাহিনীৰ নিয়োগ বৃদ্ধি কৰা হৈছে। সেই বনাঞ্চলত মাওবাদীৰ সন্ধানো অব্যাহত আছে বুলি আৰক্ষী বিষয়াগৰাকীয়ে জানিবলৈ দিয়ে।
প্ৰসংগক্ৰমে, বিগত কেইমাহমানত মাওবাদী প্ৰভাৱিত অঞ্চলটোত কেইবাজনো লোকৰ মৃত্যু হৈছে। বিগত আগষ্টত মাওবাদীৰ সৈতে হোৱা যুঁজত ঝাৰখণ্ড জাগুয়াৰ বাহিনীৰ দুই জোৱান নিহত হৈছিল। আনহাতে, ঝাৰখণ্ডৰ পশ্চিম সিংভূম জিলাৰ জংঘল অঞ্চলত ২০২৩ চনত ১৬টা এনকাউণ্টাৰত মুঠ ৯জন মাওবাদী নিহত হৈছিল। মাওবাদী কেন্দ্ৰীয় সমিতিৰ এজন সদস্যৰো মৃত্যু হৈছিল জুলাই মাহত।
