আজিৰ ব্যস্ত নগৰীয়া জীৱনত প্লাষ্টিকৰ বটল আমাৰ এক অপৰিহাৰ্য অংগ হৈ পৰিছে। কঢ়িয়াই নিয়াৰ সুবিধা আৰু যিকোনো দোকানতে সহজে উপলব্ধ হোৱাৰ বাবে আমি প্ৰায়েই প্লাষ্টিকৰ বটলৰ পানী ব্যৱহাৰ কৰো। আনকি বহুজনে ঘৰতো বছৰ বছৰ ধৰি একেবোৰ প্লাষ্টিকৰ বটলতে পানী ভৰাই থয়। কিন্তু শেহতীয়া আন্তঃৰাষ্ট্ৰীয় গৱেষণা আৰু বিশ্ব স্বাস্থ্য সংস্থাৰ প্ৰতিবেদনে আমাক এক ডাঙৰ বিপদৰ সংকেত দিছে। বিশেষজ্ঞসকলৰ মতে ভুল প্ৰকাৰৰ প্লাষ্টিকৰ বটল দীৰ্ঘদিন ধৰি ব্যৱহাৰ কৰিলে কেন্সাৰৰ দৰে গুৰুতৰ ৰোগৰ সম্ভাৱনা বৃদ্ধি পাব পাৰে।
আচলতে বহুতো প্লাষ্টিকৰ বটল তৈয়াৰ কৰোঁতে বিচফেনল এ বা চমুকৈ বিপিএ আৰু ফ্থালেটছ নামৰ কিছুমান ৰাসায়নিক পদাৰ্থ ব্যৱহাৰ কৰা হয়। এই ৰাসায়নিক পদাৰ্থবোৰে আমাৰ শৰীৰৰ হৰম’নৰ স্বাভাৱিক ভাৰসাম্য নষ্ট কৰিব পাৰে। আন্তঃৰাষ্ট্ৰীয় কেন্সাৰ গৱেষণা সংস্থাৰ মতে প্লাষ্টিকত থকা ডিইএইচপি নামৰ এবিধ উপাদানে কেন্সাৰৰ সৃষ্টি কৰিব পাৰে। বিশেষকৈ ২০২১ চনৰ এক অধ্যয়নত দেখা গৈছে যে দীৰ্ঘদিন ধৰি শৰীৰত এই বিপিএ নামৰ ৰাসায়নিক বিধ প্ৰৱেশ কৰিলে স্তন আৰু প্ৰষ্টেট কেন্সাৰ হোৱাৰ আশংকা বহুগুণে বাঢ়ি যায়।
প্লাষ্টিকৰ বটলৰ ব্যৱহাৰ তেতিয়াহে অধিক বিপদজনক হৈ পৰে যেতিয়া আমি ইয়াত গৰম পানী ৰাখোঁ। গৰমৰ সংস্পৰ্শত প্লাষ্টিকৰ পৰা ক্ষতিকাৰক ৰাসায়নিক পদাৰ্থবোৰ দ্ৰুতগতিত পানীত মিহলি হৈ পৰে। একেদৰে ৰ’দত বহু সময় ধৰি থৈ দিয়া প্লাষ্টিকৰ বটলৰ পানী খোৱাটোও অতি ক্ষতিকাৰক। আমি প্ৰায়েই ব্যৱহাৰ কৰা এবাৰ ব্যৱহাৰযোগ্য বটলবোৰ বাৰে বাৰে ধুই ব্যৱহাৰ কৰি থাকো, যিটো আমাৰ স্বাস্থ্যৰ বাবে অত্যন্ত বিপদজনক হ’ব পাৰে। যদিও সকলো গৱেষণাই পোনপটীয়াকৈ প্লাষ্টিকৰ বটলক কেন্সাৰৰ একমাত্ৰ কাৰণ বুলি কোৱা নাই, তথাপিও ইয়াৰ যে এক গভীৰ সম্ভাৱনা আছে সেই কথা চিকিৎসকসকলে স্পষ্ট কৰি দিছে।
গতিকে এই মাৰাত্মক বিপদৰ পৰা হাত সাৰিবলৈ স্বাস্থ্য বিশেষজ্ঞসকলে আমাক কিছুমান সৰল পৰামৰ্শ দিছে। সম্ভৱ হ’লে প্লাষ্টিকৰ বটলৰ পৰিৱৰ্তে কাঁচৰ বটল বা ষ্টীলৰ বটল ব্যৱহাৰ কৰিব লাগে। ষ্টীল আৰু কাঁচৰ বটলত ৰাসায়নিক বিক্ৰিয়াৰ ভয় নাথাকে বাবে এইবোৰ অধিক নিৰাপদ। যদি প্লাষ্টিকৰ বটল ব্যৱহাৰ কৰিবই লগা হয়, তেন্তে কিনিবৰ সময়ত তাত বিপিএ ফ্ৰী বুলি লিখা আছে নে নাই সেয়া চাই লোৱা উচিত। লগতে পুৰণি হৈ যোৱা বা আঁচোৰ পৰা বটলবোৰ লগে লগে পেলাই দি নতুন আৰু উন্নত মানদণ্ডৰ পাত্ৰ ব্যৱহাৰ কৰিলেহে আমি সুস্থ হৈ থাকিব পাৰিম।
