লাডাখ পৰা ছিকিম আনকি অৰুণাচললৈকে শান্ত নহয় চীন-ভাৰতৰ সীমান্ত।
লাডাখ সীমান্তত যোৱা ১৫ জুনত হোৱা ৰক্তক্ষয়ী সংঘৰ্ষত ভাৰতৰ ২০ গাৰীক সেনা ছহিদ হোৱাৰ পিছতে দুই দেশৰ সেনাৰ পৰ্যায়ৰ কেবা লানি বৈঠকত কিছু সহমতত উপণীত হৈছিল।
সেই বৈঠকসমূহত সিদ্ধান্ত হৈছিল যে সীমান্তৰ বিবাদমান এলেকাৰ পৰা দুয়ো পক্ষই সেনা প্ৰত্যাহাৰ কৰিব।
সেই অনুসৰি ভাৰতে প্ৰকৃত নিয়ন্ত্ৰণ ৰেখাৰ বিবাদমান এলেকাৰ পৰা সেনা প্ৰত্যাহাৰ কৰিলে।
প্ৰথমাৱস্থাত চীনেই সেনা প্ৰত্যাহাৰ কৰিছিল যদিও বিভিন্ন সময়ৰ উপগ্ৰহীয় চিত্ৰত চীনে পুনৰ প্ৰকৃত নিয়ন্ত্ৰণ ৰেখাৰ সীমান্তৰ বিবাদমান এলেকাসমূহত সেনা মোতায়েন কৰিছে।
ভাৰতে বাৰে বাৰে ইয়াৰ প্ৰতিবাদ কৰি আহিছে যদিও চীনে ইয়াক উপেক্ষা কৰি আহিছে।
দেখা গৈছে যে দুই দেশৰ মাজৰ কূটনৈতিক বৈঠকেও কোনো সুফল দিয়া নাই।
ইয়াৰ পিছতে ভাৰতৰ সেনা বাহিনীৰ চিফ অৱ ডিফেন্স ষ্টাফ জেনেৰেল বিপিন ৰাৱাটে চীনক এক ইংগিতপূৰ্ণ সকীয়নি প্ৰদান কৰিছে।
জেনেৰেল ৰাৱাটে স্পষ্টৰূপে কৈছে যে, লাডাখত চীনৰ পিপ’লছ লিবাৰেশ্যন আৰ্মিৰ স্বভাৱ পৰিৱৰ্তন নহ’লে আমাৰ হাতত কেৱল সেনা অভিযানৰহে বিকল্প আছে।
সোমবাৰে জেনেৰেল ৰাৱাটতে দাবী কৰি কয় যে, কূটনৈতিক আৰু সামৰিকভাৱে ভাৰতে আলোচনা চলাই গৈছে। কিন্তু এতিয়াও ইয়াৰ কোনো সদৰ্থক ফলাফল পোৱা নাই।
জেনেৰেল ৰাৱাটৰ মতে, যদি বৈঠকৰ ফলাফল ব্যৰ্থ হয় তেতিয়া কেৱল চীনা সেনাৰ আগ্ৰাসনক প্ৰত্যুত্তৰ দিয়াৰহে ৰাস্তা খোলা থাকিব।
উল্লেখ্য যে, পূৰ্বৰে পৰা ভাৰতে সীমান্তৰ প্ৰকৃত নিয়ন্ত্ৰণ ৰেখাৰ সমস্যা আলোচনাৰ মাধ্যমেৰে মীমাংসা কৰাৰ পোষকতা কৰি আহিছে।
একাধিক বৈঠক ব্যৰ্থ হোৱাৰ পিছত চীনৰ আগ্ৰাসনক যথোচিত প্ৰত্যুত্তৰ দিয়া হ’ব বুলি ইয়াৰ পূৰ্বেও চীনক সতৰ্ক কৰি দিয়া হৈছিল।
ইফালে যোৱা শনিবাৰে লাডাখৰ পৰিস্থিতিক লৈ ৰাষ্ট্ৰীয় নিৰাপত্তা উপদেষ্টা অজিত ডোভাল, চিফ অৱ ডিফেন্স ষ্টাফ জেনেৰেল বিপিন ৰাৱাট, তিনি সেনা প্ৰধান ক্ৰমে জেনেৰেল এম এম নাৰাভন, এডমিৰেল কৰমবীৰ সিং আৰু এয়াৰ চিফ মাৰ্শ্বাল বি কে এছ বাদুৰিৱাৰ সৈতে প্ৰতিৰক্ষা মন্ত্ৰী ৰাজনাথ সিঙে এক বৈঠকত মিলিত হৈছিল।
উক্ত আঢ়ৈ ঘণ্টাজোৰা ৰুদ্ধদ্বাৰ বৈঠকত লাডাখৰ সমগ্ৰ পৰিস্থিতি সম্পৰ্কে আলোচনা কৰা হয় বুলি এক বিশেষ সূত্ৰই প্ৰকাশ কৰিছে।
