জনসংখ্যা বাঢ়ি অহাৰ লগে লগে সকলোতে কোলাহলপূৰ্ণ পৰিৱেশ বাঢ়ি আহিছে। কেৱল সেয়াই নহয়, নগৰ অঞ্চলত সেউজীয়া পৰিৱেশ বিচাৰি পোৱাটোৱেই কঠিন হৈ পৰিছে। যাৰ বাবে বহুতে চহৰৰ কোলাহল আৰু বিশৃংখলতাৰ পৰা আঁতৰি নিৰ্জন ঠাইত থাকিবলৈ পছন্দ কৰে। গতিকে, যদি আপুনি কোনো দূৰৈৰ নিৰ্জন দ্বীপত থাকিবলৈ সুযোগ পায় আৰু তাৰ বাবে আপোনাক দৰমহাও প্ৰদান কৰা হয় তেন্তে আপোনাৰ সিদ্ধান্ত কি হ’ব?
অবিশ্বাস্য যেন লাগিলেও আজি এই প্ৰতিবেদনত আমি আপোনালোকক এটা সোণালী সুযোগ উপস্থাপন কৰিবলৈ ওলাইছো। এই সন্দৰ্ভত পোৱা তথ্য অনুসৰি, এইবাৰ আয়াৰলেণ্ডে এনে এক সুযোগ আগবঢ়াইছে য’ত আপুনি এটা দ্বীপত থাকিব পাৰিব আৰু তাৰ বাবে আপোনাকো দৰমহা দিয়া হ’ব।
আয়াৰলেণ্ডৰ নতুন আঁচনিৰ অধীনত দেশখনে সাগৰৰ পাৰৰ কোনো এটা দ্বীপলৈ স্থানান্তৰিত হোৱা লোকসকলৰ বাবে অনুদান আগবঢ়াব। এই প্ৰকল্পটো “আমাৰ জীৱিত দ্বীপপুঞ্জ” নামৰ আঁচনিৰ অংশ। যিয়ে সেই দ্বীপসমূহত বাসিন্দাৰ সংখ্যা বৃদ্ধি কৰিবলৈ দৃঢ়প্ৰতিজ্ঞ।
ইফালে আইৰিছ চৰকাৰৰ এক বিবৃতি অনুসৰি এই প্ৰকল্পৰ লক্ষ্য হৈছে ভৱিষ্যতে দ্বীপসমূহত যাতে বাস কৰিব পৰা যায় আৰু উন্নয়ন কৰিব পৰা যায়। ইতিমধ্যে আয়াৰলেণ্ডে শেহতীয়াকৈ দেশখনৰ ৩০টা দূৰৱৰ্তী অফশ্ব’ৰ দ্বীপৰ যিকোনো এটাত বসতি স্থাপন কৰা লোকসকলৰ বাবে ৮৪ হাজাৰ ইউৰো পৰ্যন্ত বা প্ৰায় ৯০ হাজাৰ ডলাৰ (ভাৰতীয় মুদ্ৰাত প্ৰায় ৭৫ লাখ টকা) অনুদান দিয়াৰ কথা ঘোষণা কৰিছে।
ইয়াৰ উপৰিও জানিব পৰা গৈছে যে দ্বীপসমূহ কোনো দলঙেৰে সংযোগ কৰা হোৱা নাই। জনা যায় যে গোটেই বছৰটো তাত প্ৰায় তিনি হাজাৰ লোকে বাস কৰে।
মন কৰিবলগীয়া যে আয়াৰলেণ্ডত থাকিবলৈ আৰু কাম কৰিবলৈ ভিছা নথকা লোকসকলে এই সুবিধা লাভ কৰিবনে নাই সেয়া এতিয়ালৈকে স্পষ্টকৈ কোৱা নাই আয়াৰলেণ্ড চৰকাৰে।
