আই পি এলৰ মঞ্চৰ পৰাই সমগ্ৰ বিশ্বতে সমাদৃত হৈছে বৈভৱ সূৰ্য্যবংশী। ২০২৫ চনৰ পিছত ২০২৬ চনৰ আই পি এল ছিজনতো তেওঁৰ উৎকৃষ্ট বেটিং প্ৰদৰ্শনে আপ্লুত কৰিছে। যোৱা আই পি এলত বৈভৱে অৰেঞ্জ কেপ লাভ কৰিছে।
কিন্তু সকলোৰে কৌতুহল ইমান কম বয়সতে তেওঁ কেনেকৈ ইমান শক্তিশালী হৈ উঠিছে! আনকি প্ৰতিখন মেচতে ৰাজস্থানৰ অ’পেনাৰগৰাকীয়ে যি ধাৰাবাহিকতা দেখুৱাইছে সেয়াও এক উল্লেখযোগ্য বিষয়। পাৱাৰ প্লে’ত কোনো দলৰ কোনো বলাৰকে ৰেহাই দিয়া নাছিল বিহাৰৰ ‘বিস্ময় বালক’জনে।
এইবাৰ আই আই এম ইন্দোৰত বৈভৱ সূৰ্য্যবংশীৰ ওপৰত গৱেষণা চলি আছে। তাত এই বেটছমেনৰ ওপৰত কৰা গৱেষণাৰ শিৰোনাম হৈছে ‘বৈভৱ সূৰ্য্যবংশী: মানসিকতা আৰু ব্যৱস্থাপনা(Vaibhav Sooryavanshi: Mindset and Management)।’
যোৱা আই পি এলত ১৭খন খেলত ৭০০ৰো অধিক ৰান সংগ্ৰহ কৰিছে বৈভৱে। ইয়াৰ উপৰিও তেওঁ এটা ছিজনত ৭২টা ছয়ৰ অভিলেখ গঢ়ে। দুশৰো অধিক ষ্ট্ৰাইক ৰেটত বেটিং কৰিছে। গৱেষকসকলে কেৱল তেওঁৰ বেটিং দক্ষতাৰ ওপৰতে নহয়, তেওঁৰ মানসিক কঠোৰতা, অনুশাসন আৰু সিদ্ধান্ত গ্ৰহণৰ ক্ষমতাৰ ওপৰতো প্ৰমাণপত্ৰ প্ৰদান কৰিছে।
বিহাৰৰ সমস্তিপুৰৰ এজন ল’ৰাই ঘৰৰ সন্মুখৰ এখন পথাৰত অনুশীলন কৰিছিল। তাৰ পৰাই ঘৰুৱা ক্ৰিকেটত ৰাজ্যিক দলৰ আৰু তাৰ পিছত ৰাজস্থান ৰয়েলছৰ স্কাউটৰ দৃষ্টি আকৰ্ষণ কৰিলে বৈভৱে। যিদৰে এটা সফল ষ্টাৰ্ট আপ কৰা হয়, বৈভৱৰ কেৰিয়াৰো ঠিক তেনেকুৱাই। গৱেষকসকলে বিষয়টো এনেদৰেই চাইছে। এই অধ্যয়নৰ বিষয়বস্তু হিচাপে বৈভৱ, তেওঁৰ পৰিয়াল, শৈশৱৰ প্ৰশিক্ষক, ৰাজস্থান ৰয়েলছৰ সহায়ক কৰ্মচাৰী আৰু ক্ৰীড়া মনোবিজ্ঞানীসকলৰ সৈতে বিতং সাক্ষাৎকাৰ অন্তৰ্ভুক্ত কৰা হ’ব।
বৈভৱে কেনেকৈ অনুশাসন, নিয়মানুৱৰ্তিতা, কঠোৰ পৰিশ্ৰম আৰু নিষ্ঠাৰ জৰিয়তে দিনক দিনে নিজকে গঢ়ি তুলিছে, সেই বিষয়েও আলোচনা কৰা হৈছে। এই সকলোবোৰ যিকোনো সফল ব্যক্তিৰ জীৱনত সফলতাৰ চূড়ান্ত পৰিমাপ হ’ব পাৰে।
মন কৰিবলগীয়া যে ৰাজস্থান ফাইনেলত প্ৰৱেশ নকৰিলেও আহমেদাবাদৰ নৰেন্দ্ৰ মোডী ষ্টেডিয়ামত ফাইনেল চাবলৈ গৈছিল বৈভৱ। আৰ চি বি বনাম গুজৰাটৰ খেলৰ অন্তত যেতিয়া বৈভৱ গেলেৰীৰ পৰা নামি খেলপথাৰত প্ৰৱেশ কৰিছিল তেতিয়া বিৰাট কোহলী তেওঁৰ সন্মুখত আছিল। ছুপাৰষ্টাৰ ক্ৰিকেটাৰগৰাকীক হাতযোৰ কৰি সম্ভাষণ জনোৱা দেখা গ’ল বৈভৱে। শিশু তাৰকাজনক দেখি বিৰাটে প্ৰথমে হাতখন জোকাৰিলে আৰু তাৰ পিছত সাৱটি ধৰিলে। দুয়োজনে যথেষ্ট সময় কথা পাতিলে। বৈভৱে হয়তো সেইদিনা আন্তঃৰাষ্ট্ৰীয় ক্ৰিকেটত কেনেকৈ সফল হ’ব পাৰি তাৰ শিক্ষা লৈছিল কিং কোহলীৰ পৰা।
