অসম তথা উত্তৰ-পূৰ্বাঞ্চলৰ লগতে সমগ্ৰ দেশতে নাগৰিকত্ব সংশোধনী বিধেয়ক ২০১৬’ৰ বিৰুদ্ধে প্ৰতিবাদ চলি থকাৰ মাজতে শুকুৰবাৰে বিয়লি ৫ বজাত আই আই টি বোম্বেত অধ্যয়নৰত উত্তৰ-পূৰ্বাঞ্চল তথা ভাৰতৰ অন্য প্ৰান্তৰ ছাত্ৰ-ছাত্ৰীসকলে হাতে হাতে প্লেকাৰ্ড লৈ নাগৰিকত্ব আইন (সংশোধনী) বিধেয়ক, ২০১৬’ৰ তীব্ৰ বিৰোধিতা কৰি মৌন সমদল উলিয়ায় ৷
তদুপৰি, আই আই টি বোম্বেৰ শিক্ষক, ছাত্ৰ, কৰ্মচাৰী তথা আন আন নাগৰিকসকলক উক্ত বিধেয়কখনৰ ভয়াবহতা সম্পৰ্কে সচেতন কৰিবলৈ ইংৰাজী ভাষাত লিখা প্ৰচাৰ-পত্ৰও ‘নৰ্থ ইষ্ট কালেক্টিভ’ নামৰ ছাত্ৰ গোটৰ উদ্যোগত আই আই টি চৌহদৰ ভিতৰত বিতৰণ কৰা হয় ৷
প্ৰতিবাদকাৰী শিক্ষাৰ্থীসকলে কয়,’‘নাগৰিকত্ব আইন (সংশোধনী) বিধেয়ক ২০১৬’ৰ মূল লক্ষ্য হৈছে নাগৰিকত্ব আইন, ১৯৫৫’ৰ সংশোধন কৰি পাকিস্তান,আফগানিস্তান আৰু বাংলাদেশৰ হিন্দু, শিখ, বৌদ্ধ, জৈন, পাৰ্ছী আৰু খ্ৰীষ্টান ধৰ্মীয় লোকসকলক ভাৰতীয় নাগৰিকত্ব প্ৰদান কৰা ৷ অৰ্থাৎ মোদী চৰকাৰে এই বিধেয়কখনৰ জৰিয়তে ধৰ্মৰ ভিত্তিত ভাৰতীয় নাগৰিকত্ব প্ৰদান কৰাৰ বাট মুকলি কৰিব বিচাৰিছে।‘’
‘’এয়া ভাৰতীয় সংবিধানৰ ধৰ্মনিৰপেক্ষতা আৰু সমতাৰ ধাৰণাৰ প্ৰতি ভাবুকি ৷ সেয়ে প্ৰতিগৰাকী ভাৰতীয় নাগৰিকে সংবিধান ৰক্ষাৰ স্বাৰ্থতে এই বিধেয়কখনৰ বিৰোধিতা কৰিব লাগে,’’-শিক্ষাৰ্থীসকলে এইদৰে মন্তৱ্য কৰে।
তেওঁলোকে লগতে কয়, ‘’এই বিধেয়কখন বিশেষভাৱে অসমবিৰোধী ৷ কিয়নো ই ঐতিহাসিক অসম চুক্তিক অৱমাননা কৰিছে ৷ নাগৰিকত্ব সংশোধনী বিধেয়কখন আইনত পৰিণত হ’লে ভাৰতীয় সংবিধানৰ মূল ভেটিটো আঘাতপ্ৰাপ্ত হোৱাৰ লগতে অসমত থকা লাখ লাখ অবৈধ হিন্দু বাংলাদেশীয়ে ভাৰতীয় নাগৰিকত্ব পাব আৰু অসম চুক্তি তথা উচ্চতম ন্যায়ালয়ৰ তত্বাৱধানত চলি থকা ৰাষ্ট্ৰীয় নাগৰিকপঞ্জী (এন আৰ চি)খন অৰ্থহীন হৈ পৰিব ৷’’
ভাৰতৰ মূলসুঁতিৰ কেতবোৰ সংবাদ মাধ্যম তথা দল-সংগঠনে এন আৰ চিক লৈ মিথ্যাচাৰ আৰু উদ্দেশ্যপ্ৰণোদিত অপপ্ৰচাৰ চলোৱাৰ বিৰোধিতা কৰি আই আই টি বোম্বেৰ অসমীয়া ছাত্ৰসকলে বক্তব্য প্ৰদান কৰে যে এন আৰ চি কোনো কাৰণতে মুছলমানবিৰোধী, বাঙালীবিৰোধী বা বহিঃৰাজ্যৰ ভাৰতীয় নাগৰিকবিৰোধী নহয়, ই মাথোঁ ১৯৭১ চনৰ ২৪ মাৰ্চৰ পাছত অসমলৈ অহা বিদেশী চিনাক্ত কৰিবৰ বাবে প্ৰস্তুত কৰা এক দস্তাৱেজ ৷
তেওঁলোকে স্পষ্ট কৰি দিয়ে ‘’এই বিধেয়কৰ জৰিয়তে লাখ লাখ হিন্দু বাংলাদেশীক নাগৰিকত্ব দিলে উত্তৰ-পূৰ্বাঞ্চল, বিশেষকৈ অসমৰ জনগাঁথনি সম্পূৰ্ণ সলনি হোৱাৰ লগতে ইয়াৰ ক্ষুদ্ৰ ক্ষুদ্ৰ জাতি-জনগোষ্ঠীসমূহৰ ভাষা-সংস্কৃতিৰ অস্তিত্ব সংকটাপন্ন হ’ব ৷’’
প্ৰতিবাদী ছাত্ৰসমাজে শাসকশ্ৰেণীৰ বিভাজনৰ ৰাজনীতি তথা সাম্প্ৰদায়িক এজেণ্ডাবোৰ প্ৰতিহত কৰিবলৈ সমূহ ৰাইজক ঐক্যবদ্ধ হ’বলৈ আহ্বান জনোৱাৰ লগতে ফেচিবাদী চৰকাৰ তথা তেওঁলোকৰ স্তাৱকসকলৰ প্ৰৰোচনাৰ প্ৰতি সঁহাৰি নিদি সম্পূৰ্ণ অহিংস আৰু গণতান্ত্ৰিক প্ৰক্ৰিয়াৰে বিধেয়কখনৰ বিৰুদ্ধে প্ৰতিবাদী আন্দোলন চলাই যাবলৈ সমূহ অসমপ্ৰেমী তথা গণতন্ত্ৰপ্ৰেমী ৰাইজক আহ্বান জনায় ৷
ত্ৰিপুৰাত চৰকাৰে বিধেয়কবিৰোধী জনসাধাৰণৰ গালৈ গুলী নিক্ষেপ কৰা আৰু অসমৰ বিধেয়ক বিৰোধী আন্দোলনৰ অগ্ৰণী কৰ্মী ডঃ হীৰেন গোহাঁই, অখিল গগৈ আৰু মনজিৎ মহন্তৰ বিৰুদ্ধে ষড়যন্ত্ৰমূলকভাৱে অসমৰ ফেচিবাদী চৰকাৰে ৰাষ্ট্ৰদ্ৰোহৰ গোচৰ জাপি দিয়া কাৰ্যক আই আই টি বোম্বেৰ ছাত্ৰ-ছাত্ৰীসকলে ধিক্কাৰ দিয়ে৷ এয়া বিধেয়কবিৰোধী আন্দোলন প্ৰশমিত কৰা বা ইয়াক অন্য দিশলৈ ধাৱমান কৰাৰ ফেচিবাদী চৰকাৰৰ চক্ৰান্ত বুলি অভিহিত কৰে শিক্ষাৰ্থীসকলে৷
আনহাতে, শিক্ষাৰ্থীসকলে নৰেন্দ্ৰ মোদী নেতৃত্বাধীন বিজেপি চৰকাৰে সাম্প্ৰদায়িক তথা অসমবিৰোধী বিধেয়কখন বাতিল নকৰা পৰ্যন্ত প্ৰতিবাদ কৰি যাব বুলি স্পষ্টভাৱে ঘোষণা কৰে৷
