আমেৰিকাত সন্ধানহীন হৈছে এজন ভাৰতীয় ছাত্ৰ। খবৰ অনুসৰি শেহতীয়াকৈ আমেৰিকাৰ বাৰ্কলেৰ পৰা নিৰুদ্দেশ হৈছে ছাকেট শ্ৰীনিবাসিয়া নামৰ এগৰাকী ২২ বছৰীয়া ভাৰতীয় ছাত্ৰ।
আমেৰিকাৰ আৰক্ষী বিভাগে জনোৱা মতে, ছাকেটক বিচাৰিবলৈ অনুসন্ধান অব্যাহত আছে। আমেৰিকাৰ আৰক্ষীয়ে আশংকা কৰিছে যে ছাকেটৰ জীৱন বিপদত পৰিছে। জানিব পৰা মতে, শেষবাৰৰ বাবে ৯ ফেব্ৰুৱাৰীত সন্ধিয়া ৫ বজাত ছাকেটক দেখা গৈছিল।
ছাকেটৰ সন্ধানত আৰক্ষীয়ে জাননী জাৰি কৰিছে। বৰ্ণনাত কোৱা হৈছে যে তেওঁৰ উচ্চতা ৬ ফুট ১ ইঞ্চি আৰু ওজন আছিল প্ৰায় ৭২ কিলোগ্ৰাম। চকু দুটাৰ ৰং বাদামী আৰু চুলি চুটি কৰি কটা।
ছাকেটৰ নিৰুদ্দেশক লৈ উদ্বেগ প্ৰকাশ কৰি ছান ফ্ৰান্সিস্কোস্থিত ভাৰতীয় কনছুলেট জেনেৰেলে এক বিবৃতি প্ৰকাশ কৰিছে। বিবৃতিটোত কোৱা হৈছে যে ছাকেট শ্ৰীনিবাসীৰ অন্তৰ্ধানত ভাৰতৰ কনছুলেট জেনেৰেল উদ্বিগ্ন হৈ পৰিছে।
ছাকেট কৰ্ণাটকৰ বাসিন্দা আৰু ইউ চি বাৰ্কলেৰ স্নাতকোত্তৰৰ ছাত্ৰ। কনছুলেটৰ তেওঁৰ পৰিয়াল আৰু স্থানীয় প্ৰশাসনৰ সৈতে অহৰহ যোগাযোগ অব্যাহত আছে ।
ছাকেট শ্ৰীনিবাসীয়ে বাৰ্কলেৰ কেলিফৰ্ণিয়া বিশ্ববিদ্যালয়ত ৰাসায়নিক আৰু জৈৱ আণৱিক অভিযান্ত্ৰিক বিষয়ত স্নাতকোত্তৰ ডিগ্ৰীৰ বাবে অধ্যয়ন কৰি আছিল। তেওঁৰ লিংকডইন প্ৰফাইল অনুসৰি তেওঁক ইয়াত এম এছ পিডিপি ২৬ কাৰ্যসূচীৰ অধীনত ভৰ্তি কৰা হৈছিল। তেওঁ ২০২৫ চনত আই আই টি মাদ্ৰাজৰ পৰা বি-টেক সম্পূৰ্ণ কৰি তাৰ পিছত বিদেশত অধ্যয়নৰ সুযোগ পাই কেলিফৰ্ণিয়া বিশ্ববিদ্যালয়ত নামভৰ্তি কৰে।
ছাকেট সন্ধানহীন হোৱাৰ পিছত তেওঁৰ ৰুমমেট বন্তাছ সিঙে ছ’চিয়েল মিডিয়াত সহায় বিচাৰি পোষ্ট কৰে। তেওঁৰ পোষ্টত কোৱা হৈছে যে ৯ ফেব্ৰুৱাৰীৰ পৰা নিৰুদ্দেশ হৈ আছে ছাকেট শ্ৰীনিবাসিয়া। শেষবাৰৰ বাবে তেওঁক বাৰ্কলে হিলছত দেখা গৈছিল। যদি কোনোবাই তেওঁৰ বিষয়ে জানে তেন্তে তেওঁলোকক জনাওক। তেওঁ কয় যে এইটো মোৰ বাবে অতি কঠিন সময়, কোনোবাই যদি সহায় কৰিব পাৰে তেন্তে অনুগ্ৰহ কৰি যোগাযোগ কৰক।
