মাৰ্ঘেৰিটাত কয়লাৰ চোৰাং বেহা বন্ধ হৈ থকা বুলি কলেও বাস্তৱত যে সেইয়া নহয় তাকে আজি কয়লা সহ ডাম্পাৰ জব্দ হোৱা খবৰে প্রমাণ কৰিলে ।
বিগত বৰ্ষৰ পৰা ক’ল ইণ্ডিয়া উৎপাদন বন্ধ থকাৰ পাছতো চোৰাং কয়লাৰ বেহা আজিও অব্যাহত আছে?
চোৰাং কয়লা ব্যৱসায়ীয়ে নতুন নতুন উপায়েৰে কয়লা সৰবৰাহ অব্যাহত ৰখাৰ অভিযোগ পোৱা উত্থাপন হৈ অহাৰ সময়তে আজি পুৱাই মাৰ্ঘেৰিটা আৰক্ষীয়ে গোপন সূত্রৰ পমখেদি বৰগোলাই অঞ্চলত জব্দ কৰে কয়লা ভৰ্তি এখন ডাম্পাৰ।
এ.এচ ০৬ বি চি ৭৯৮৫ নম্বৰৰ ডাম্পাৰ খন অবৈধ ভাবে কঢ়িয়াই অনা কয়লা সহ জব্দ কৰে আৰক্ষীয়ে |
জব্দকৃত চোৰাং কয়লা খিনি দুই কয়লা চোৰ ক্ৰমে অভিনাশ প্ৰধান আৰু পৱন সোনাৰে সৰবৰাহ কৰিবলৈ সাজু কৰিছিল বুলি আৰক্ষীৰ সূত্ৰত প্ৰকাশ।
গাড়ী খনৰ লগতে দুজন লোককো আৰক্ষীয়ে আটক কৰি দুই কয়লা চোৰৰ বিৰুদ্ধে অভিযান অব্যাহত ৰাখিছে বুলি জানিব পৰা গৈছে
। উল্লেখ যে লিডু, বৰগোলাই, নামদাং, জাগুন-নামফাই, নামটক, বমগাড়া, টিপং লালপাহাৰ আদি অঞ্চলত পুনৰ চোৰাং কয়লা বেহা সক্ৰিয় হৈ উঠিছে বুলি এক সূত্ৰত প্ৰকাশ।
অন্যহাতে শেহতীয়াকৈ মাৰ্ঘেৰিটা আৰক্ষীৰ নিম্নবৰ্গৰ বহুকেইজন আৰক্ষী জোৱানক ৰদ-বদল কৰা হৈছে ।
এক সূত্ৰই জানিবলৈ দিয়া অনুসৰি ইয়াৰে একাংশ আৰক্ষীয়ে কয়লা চোৰাৰ সৈতে গোপন অংকৰ মিতিৰালি স্থাপন কৰিছিল বুলি অভিযোগ উত্থাপন হোৱাত শীৰ্ষ আৰক্ষী বিষয়াই ইয়াৰ বিৰুদ্ধে ব্যৱস্থা গ্ৰহণ কৰে।