স্থানীয় ৰাইজৰ তৎপৰতাত আজি আবেলি গুৱাহাটী মহানগৰীৰ হেদেৎপুৰত চোৰাং তেলৰ ঘাটি উৎখাত কৰা হয়।
ৰাইজে চোৰাং তেলৰ ঘাটি উৎখাত কৰি এগৰাকী মহিলা সহ তিনিগৰাকী চোৰক আটক কৰি পল্টন বজাৰ আৰক্ষীক গটাই দিয়ে।
ৰাইজে আটক কৰা চোৰ তিনিগৰাকী হ’ল ক্ৰমে-ফুলং আলী, ৰাজীৱ আলম আৰু মনোৱাৰ হুছেইন।
মনোৱাৰ হছেইনৰ ঘৰ বৰপেটাত হোৱাৰ বিপৰীতে ৰাজীৱ আলমৰ ঘৰ বিহাৰত।
ইপিনে, আৰক্ষীয়ে চোৰ তিনিজনৰ স্বীকাৰোক্তিৰ ভিত্তিত চোৰাং তেলৰ ঘাটিৰ মাষ্টাৰ মাইণ্ড কালিয়া ওৰফে কুমুদ জামালক ভাড়াঘৰৰ পৰা আটক কৰে।
উল্লেখযোগ্য যে, ধৃত চোৰ কেইজনৰ লগতে আৰক্ষীয়ে বৃহৎ পৰিমাণত ৰে’লৰ পৰা চুৰি কৰি অনা ডিজেল জব্দ কৰে।
আনহাতে, আৰক্ষীয়ে আন এখন ৰিস্কাত চোৰাং তেল লৈ যোৱা অৱস্থাত তেল ভৰ্তি ৰিস্কাখন জব্দ কৰে। কালিয়া নামৰ তেল মাফিয়া গৰাকীয়ে ৰিস্কাখনত তেল সৰবৰাহ কাৰ্য্যত কেইটামান শিশুক জড়িত কৰিছিল।
আৰক্ষীৰ দলটোক দেখাৰ লগে লগে শিশু কেইটাই ৰিস্কা এৰি পলায়ন কৰে।
হেদাৎপুৰত দীৰ্ঘদিনৰ পৰা চোৰাং তেলৰ ৰমৰমীয়া বেহা চলি আছে বুলি ৰাইজে উল্লেখ কৰাৰ লগতে চোৰাং তেল সৰবৰাহৰ লগত জড়িত মাফিয়া কালিয়াই ড্ৰাগছৰ অবৈধ ব্যৱসায়ৰ লগতো জড়িত আছে বুলি অভিযোগ কৰে।
ৰাইজৰ অভিযোগ অনুসৰি কালিয়া ওৰফে কুমুদ জামালৰ প্ৰকৃত ঘৰ বিহাৰত৷ কালিয়াই বিজেপি কৰ্মী জাহাংগীৰ আহমেদ আৰ সুজাতা আহমেদ সিঙৰ ঘৰত ভাড়া থাকি চোৰাং তেলৰ ৰমৰমীয়া বেহা চলাই আহিছে।
