মাৰ্কিন যুক্তৰাষ্ট্ৰৰ ফেডাৰেল কৰ্তৃপক্ষই শেহতীয়াকৈ ভাৰতভিত্তিক এক আন্তঃৰাষ্ট্ৰীয় অপৰাধী চক্ৰৰ সৈতে জড়িত ২০০ৰো অধিক ৱেবছাইট ডমেইন জব্দ কৰিছে। অভিযোগ অনুসৰি, এই অবৈধ অনলাইন ফাৰ্মাচীবোৰে যোগান ধৰা ঔষধ সেৱন কৰি আমেৰিকাত অতি কমেও ছজন লোকৰ মৃত্যু হৈছে আৰু আন চাৰিজন লোক গুৰুতৰভাৱে অসুস্থ হৈ পৰিছে।
আমেৰিকাৰ ড্ৰাগ এনফৰ্চমেণ্ট এডমিনিষ্ট্ৰেচন চমুকৈ ডি.ই.এ.-ই (DEA) বুধবাৰে এক বিবৃতিত জনোৱা অনুসৰি, সমগ্ৰ দেশজুৰি চলোৱা অভিযানত এই চক্ৰটোৰ সৈতে জড়িত চাৰিজন ব্যক্তিক গ্ৰেপ্তাৰ কৰা হৈছে। ‘অপাৰেশ্যন মেল্টডাউন’ৰ (Operation Meltdown) অংশ হিচাপে নিউয়ৰ্কৰ পূব জিলাৰ ইউ.এছ. এটৰ্নী কাৰ্যালয়ৰ সহযোগত এই বৃহৎ পদক্ষেপ গ্ৰহণ কৰা হৈছে।
ডি.ই.এ.-ৰ ৰকি মাউণ্টেইন ফিল্ড ডিভিজনে ২০২২ চনৰ পৰাই এই ভাৰতভিত্তিক অপৰাধী সংগঠনটোৰ ওপৰত চকু ৰাখিছিল। ডি.ই.এ. ই জনোৱা মতে, এইধৰণৰ অবৈধ ড্ৰাগছ সৰবৰাহ চক্ৰসমূহ উৎখাত কৰিবলৈ তেওঁলোকে ভাৰত চৰকাৰৰ আইন বলবৎকাৰী সংস্থাসমূহৰ সৈতেও সক্ৰিয়ভাৱে সহযোগিতা আগবঢ়াইছে।
প্ৰাপ্ত তথ্য অনুসৰি, ২০২৬ চনৰ ২৭ জানুৱাৰীৰ পৰা চলোৱা এই বিশেষ অভিযানত চাৰিজন লোকক গ্ৰেপ্তাৰ কৰাৰ উপৰিও কেইবাটাও গুৰুত্বপূৰ্ণ আইনী নিৰ্দেশ জাৰি কৰা হৈছে। মাৰ্কিন চৰকাৰে বন্ধ কৰি দিয়া এই ২০০ৰো অধিক অনলাইন ফাৰ্মাচীয়ে কোনো বৈধ প্ৰেছক্ৰিপচন অবিহনে হাজাৰ হাজাৰ লোকক জাল বা নিম্নমানৰ ঔষধ যোগান ধৰি আহিছিল। তদন্তকাৰীসকলে জানিবলৈ দিছে যে এই চক্ৰটোৱে আমেৰিকাৰ বিতৰণ ব্যৱস্থাত অবৈধভাৱে অনুপ্ৰৱেশ কৰি গ্ৰাহকৰ জীৱন বিপদাপন্ন কৰি তুলিছিল।
এই তদন্তৰ সময়ত ডি.ই.এ.-ই হাজাৰ হাজাৰ গ্ৰাহকক চিনাক্ত কৰিছে আৰু অধিক তথ্য বিচাৰি এতিয়ালৈকে ২০,০০০ৰো অধিক লোকলৈ পত্ৰ প্ৰেৰণ কৰিছে। ডি.ই.এ.-ৰ প্ৰশাসক টেৰেন্স ক’লে এই সন্দৰ্ভত কয় যে, “এই ঘটনাই উদঙাই দিছে যে কেনেকৈ বহিঃৰাষ্ট্ৰৰ সৰবৰাহকাৰীয়ে ইণ্টাৰনেট আৰু আমেৰিকাৰ ভিতৰৰ কিছু লোকক ব্যৱহাৰ কৰি বৈধ ব্যৱসায়ৰ দোহাই দি বিপদজনক ড্ৰাগছৰ কাৰবাৰ চলাইছে। অবৈধ অনলাইন ফাৰ্মাচীসমূহে আমেৰিকান সমাজত বিষ বিয়পাইছে।”
ইতিপূৰ্বে ২০২৪ চনত ডি.ই.এ.-ই এক জনস্বার্থমূলক জাননী জাৰি কৰি আমেৰিকান নাগৰিকসকলক এনে অবৈধ অনলাইন ফাৰ্মাচীৰ পৰা সতৰ্ক কৰি দিছিল। এই ফাৰ্মাচীবোৰে আমেৰিকাৰ প্ৰতিষ্ঠানৰ দৰে দেখিবলৈ ভুৱা ৱেবছাইট এড্ৰেছ আৰু উন্নত ডিজাইন ব্যৱহাৰ কৰি গ্ৰাহকক প্ৰতাৰণা কৰিছিল। আচলতে এই ফাৰ্মাচীবোৰে যোগান ধৰা বহু ঔষধত ফেণ্টানাইল (fentanyl) বা মেথামফেটামিনৰ (methamphetamine) দৰে অত্যন্ত বিপদজনক ৰাসায়নিক পদাৰ্থ পোৱা গৈছে, যাৰ সেৱনে মৃত্যু পৰ্যন্ত মাতি আনিব পাৰে।
