মৰিগাঁও জিলাৰ মায়ঙৰ অন্তৰ্গত থেওভাঙা অঞ্চলত কলং নদীৰ বুকুত অবাধে চলিছে অবৈধ বালি খনন। স্থানীয় লোকসকলৰ অভিযোগ অনুসৰি বালি মাফিয়াই প্ৰশাসনৰ চকুৰ সন্মুখতে নদীখনৰ বুকু উদং কৰি পেলাইছে। কোনো ধৰণৰ অনুমতি নোহোৱাকৈয়ে দিন-ৰাতি একাকাৰ কৰি নদীখনৰ পৰা বালি নিষ্কাশন কৰি থকা হৈছে। যাৰ ফলত নদীৰ পাৰৰ লগতে সমগ্ৰ অঞ্চলটোতে এক ভয়াৱহ পৰিস্থিতিৰ সৃষ্টি হৈছে।
এই অবৈধ খনন কাৰ্যত অত্যাধুনিক ডিজেল চালিত মেচিন ব্যৱহাৰ কৰা হৈছে। গধুৰ যন্ত্ৰৰ জৰিয়তে নদীৰ অতি গভীৰলৈকে খান্দি বালি উলিওৱাৰ ফলত কলং নদীৰ বিশাল অংশৰ ক্ষতি হৈছে। গাঁওবাসীয়ে আশংকা প্ৰকাশ কৰিছে যে এনেদৰে চলি থাকিলে ভৱিষ্যতে খহনীয়া আৰু বানপানীয়ে চৰম সীমা অতিক্ৰম কৰিব। এই খননৰ ফলত পৰিৱেশৰ বিস্তৰ ক্ষতি হোৱাৰ উপৰিও নদীৰ স্বাভাৱিক পৰিৱেশ তন্ত্ৰ সম্পূৰ্ণৰূপে বিনষ্ট হৈ পৰিছে।
ইমান বৃহৎ পৰিসৰত এই কাৰ্যকলাপ চলি থকাৰ পাছতো নগাঁও সংমণ্ডল বন কাৰ্যালয়ৰ অধীনস্থ বন বিভাগৰ বিষয়া-কৰ্মচাৰীসকলে কোনো ধৰণৰ পদক্ষেপ গ্ৰহণ কৰা নাই বুলি ৰাইজে গুৰুতৰ অভিযোগ উত্থাপন কৰিছে।
অভিযোগ অনুসৰি, বিভাগীয় কৰ্তৃপক্ষৰ মৌনতাৰ সুযোগ লৈয়ে বালি মাফিয়াই এই লুণ্ঠন চলাই গৈছে। প্ৰতিদিনে বৃহৎ পৰিমাণৰ বালি ট্ৰাকযোগে গুৱাহাটী, মৰিগাঁও আৰু জাগীৰোডৰ দৰে ঠাইলৈ সৰবৰাহ কৰা হৈছে।
কলং নদীৰ দুয়োপাৰৰ বাসিন্দাসকলে নিজৰ চকুৰ সন্মুখতে নদীখন ধ্বংস হোৱা দেখি চৰম অসহায় অনুভৱ কৰিছে। আটাইতকৈ চিন্তনীয় বিষয়টো হ’ল যে এই খনন চলি থকা অঞ্চলটো বিশ্ববিখ্যাত পবিতৰা বন্যপ্ৰাণী অভয়াৰণ্যৰ নিচেই ওচৰত অৱস্থিত। ইয়াৰ ফলত অভয়াৰণ্যৰ বন্যপ্ৰাণী আৰু অঞ্চলটোৰ স্পৰ্শকাতৰ পৰিৱেশৰ ওপৰত দীৰ্ঘম্যাদী নেতিবাচক প্ৰভাৱ পৰাৰ সম্ভাৱনা আছে। স্থানীয় লোকসকলে এতিয়া চৰকাৰক এই বালিৰ বেহা বন্ধ কৰি নদীখন ৰক্ষা কৰিবলৈ কাতৰ আহ্বান জনাইছে।
