ইৰান, ইজৰাইল আৰু আমেৰিকাৰ মাজত চলি থকা সামৰিক সংঘাতৰ প্ৰভাৱ এতিয়া ভাৰতৰ শক্তি যোগান ব্যৱস্থাত স্পষ্ট হৈ পৰিছে। পশ্চিম এছিয়াত উত্তপ্ত পৰিস্থিতিৰ বাবে প্ৰাকৃতিক গেছ আৰু এলএনজিৰ যোগান ব্যাহত হোৱাত দেশৰ বিভিন্ন উদ্যোগ খণ্ডই এক প্ৰকাৰ সংকটৰ সন্মুখীন হৈছে। ইয়াৰ ফলত কেৱল গেছৰ দামেই বৃদ্ধি পোৱা নাই, বৰঞ্চ যোগানৰ অভাৱত বহু উদ্যোগত উৎপাদন প্ৰক্ৰিয়াও স্থবিৰ হৈ পৰিছে।
মূলতঃ হৰমুজ প্ৰণালীৰ মাজেৰে চলি অহা জাহাজ চলাচলত বাধা আহি পৰাৰ ফলতেই এই শক্তি সংকটৰ সৃষ্টি হৈছে। এই জলপথটো বিশ্বৰ অন্যতম গুৰুত্বপূৰ্ণ শক্তি পৰিবহণ পথ, য’ৰ পৰা ভাৰতে বৃহৎ পৰিমাণৰ খাৰুৱা তেল আৰু গেছ আমদানি কৰে। এই পথত জাহাজ চলাচল মন্থৰ হৈ পৰাৰ বাবে এলএনজিৰ উপলব্ধতা কমি গৈছে, যাৰ পোনপটীয়া প্ৰভাৱ পৰিছে আদানি টোটেল গেছকে ধৰি কেইবাটাও গেছ যোগানকাৰী প্ৰতিষ্ঠানৰ ওপৰত। আদানি টোটেল গ্যাসে উদ্যোগিক গ্ৰাহকৰ বাবে গেছৰ দাম প্ৰায় তিনিগুণ বৃদ্ধি কৰিছে। এতিয়াৰ পৰা নিৰ্ধাৰিত পৰিমাণতকৈ অধিক গেছ ব্যৱহাৰ কৰিলে প্ৰতি ষ্টেণ্ডাৰ্ড কিউবিক মিটাৰত ১১৯ টকাকৈ দিব লাগিব, যিটো পূৰ্বে প্ৰায় ৪০ টকা আছিল।
এই সংকটে আটাইতকৈ বেছি প্ৰভাৱিত কৰিছে গুজৰাটৰ উদ্যোগসমূহক। গুজৰাট গেছ লিমিটেডে ইতিমধ্যে উদ্যোগসমূহক গেছৰ যোগানত কৰ্তন কৰাৰ কথা জনাইছে। ইয়াৰ ফলত ভটৱা, সানন্দ আৰু সুৰতৰ উদ্যোগিক অঞ্চলত উৎপাদন প্ৰভাৱিত হৈছে। বহু ৰাসায়নিক আৰু বস্ত্ৰ উদ্যোগ এতিয়া তেওঁলোকৰ উৎপাদন ক্ষমতাৰ মাত্ৰ ৪০ৰ পৰা ৫০ শতাংশহে চলাই নিব পাৰিছে। সানন্দত অৱস্থিত টাটা মটৰ্ছৰ দৰে প্ৰতিষ্ঠানৰ উৎপাদনতো ইয়াৰ প্ৰভাৱ পৰিব পাৰে বুলি আশংকা কৰা হৈছে।
বিশ্বৰ অন্যতম বৃহৎ চিৰামিক উৎপাদন কেন্দ্ৰ মৰবিত পৰিস্থিতি অধিক ভয়াৱহ হৈ পৰিছে। প্ৰপেন গেছৰ অভাৱত মৰবিৰ প্ৰায় এশটা চিৰামিক ইউনিট ইতিমধ্যে বন্ধ হৈ পৰিছে। যদি অতি সোনকালে যোগান ব্যৱস্থা স্বাভাৱিক নহয়, তেন্তে অহা কেইদিনমানৰ ভিতৰত আৰু চাৰিশৰো অধিক ইউনিট বন্ধ হৈ পৰাৰ সম্ভাৱনা আছে। উদ্যোগপতিসকলে এই পৰিস্থিতিক এক অস্তিত্বৰ সংকট বুলি অভিহিত কৰিছে, যাৰ ফলত লাখ লাখ শ্ৰমিকৰ জীৱিকা বিপন্ন হ’ব পাৰে। সমগ্ৰ পৰিস্থিতিৰ ওপৰত চৰকাৰ আৰু প্ৰতিষ্ঠানসমূহে তীক্ষ্ণ নজৰ ৰাখিছে যদিও পশ্চিম এছিয়াৰ অস্থিতিশীল পৰিস্থিতিয়ে ভাৰতৰ ঔদ্যোগিক ভেটিক কঁপাই তুলিছে।
