পাকিস্তানৰ প্ৰধানমন্ত্ৰীৰ সিংহাসন এৰিব লগা হোৱাৰ এমাহমান হ’ল। পাকিস্তানৰ প্ৰাক্তন প্ৰধানমন্ত্ৰী তথা পাকিস্তান তেহৰিক-ই-ইনচাফ (পিটিআই)ৰ মুৰব্বী ইমৰান খানে আমেৰিকা প্ৰশাসনৰ বিৰুদ্ধে তেওঁৰ অপসাৰণৰ আঁৰত দেশৰ বিৰোধী দলৰ সৈতে ষড়যন্ত্ৰ কৰাৰ অভিযোগ উত্থাপন কৰিছে।
এইবাৰ পাকিস্তানৰ প্ৰাক্তন প্ৰধানমন্ত্ৰীগৰাকীয়ে কয় যে তেওঁৰ শাসনকালত আমেৰিকাই পাকিস্তানৰ ভূমিত নিজৰ সেনা ঘাটি নিৰ্মাণ কৰিব বিচাৰিছিল আৰু তেওঁ ইয়াত সন্মত হোৱা নাছিল। তেতিয়াৰ পৰা আমেৰিকান প্ৰশাসনৰ সৈতে তেওঁৰ সম্পৰ্কৰ অৱনতি ঘটিবলৈ ধৰে।
ইমৰান খানে অলপতে বিদেশত বাস কৰা পাকিস্তানী নাগৰিকসকললৈ এটা ভিডিঅ’ বাৰ্তা পোষ্ট কৰিছে। পাকিস্তানৰ এখন আগশাৰীৰ দৈনিকৰ মতে, তেওঁ তাত আমেৰিকান সেনা ঘাটি নিৰ্মাণৰ প্ৰস্তাৱৰ কথা উল্লেখ কৰিছিল।
লগতে পঢ়ক: ভাৰত-বাংলাদেশ সীমান্তৰ পৰা ১৪ জন ৰহিংগীয়া লোকক আটক
ইমৰানে কৈছিল যে তেওঁ কেতিয়াও আমেৰিকা যুক্তৰাষ্ট্ৰৰ প্ৰস্তাৱত সন্মত নহ’লহেঁতেন। সেয়েহে তেওঁক অপসাৰণ কৰা হয়। ইমৰানে শেহতীয়াকৈ এটা পডকাষ্টতো একেটা কথাই কৈছিল। হোৱাইট হাউচে ইতিমধ্যে তেওঁ প্ৰধানমন্ত্ৰী হৈ থাকোতে পাকিস্তানৰ বিৰোধী দলসমূহৰ সৈতে মিত্ৰতা কৰি অপসাৰণ কৰাৰ অভিযোগ নাকচ কৰিছে যদিও ইমৰান এতিয়াও তেওঁৰ দাবীত অটল হৈ আছে।
যোৱা বছৰৰ জুনত এক সাক্ষাৎকাৰত ইমৰান খানে কৈছিল যে আমেৰিকাই আফগানিস্তানত সন্ত্ৰাসবাদ বিৰোধী অভিযান চলাবলৈ তেওঁলোকৰ দেশত ঘাটি নিৰ্মাণ কৰিব বিচাৰিছিল, কিন্তু তেওঁ এইটো হোৱাটো বিচৰা নাছিল। চীন আৰু ৰাছিয়াৰ সৈতে পাকিস্তানৰ বন্ধুত্ব আমেৰিকাই কেতিয়াও গ্ৰহণ কৰা নাই।
“আমেৰিকাই কেতিয়াও বিচৰা নাছিল যে পাকিস্তান চৰকাৰে নিজে সিদ্ধান্ত লওক। মই সদায় এটা বৈদেশিক নীতি বিচাৰিছিলো যি আন এখন দেশৰ বাবে নহয়, এই দেশৰ উন্নয়নৰ পক্ষপাতী। ”
ভিডিঅ’ বাৰ্তাটোত, ইমৰানে বৰ্তমানৰ পাকিস্তান চৰকাৰতো লক্ষ্য কৰি লৈছে। প্ৰধানমন্ত্ৰী শ্বাহবাজ শ্বৰীফক আক্ৰমণ কৰি তেওঁ কয় যে এতিয়া সমগ্ৰ দেশ দুৰ্নীতিগ্ৰস্ত মাফিয়াৰ হাতলৈ গৈছে।
অৱশ্যে, ইমৰানে তেওঁক আৰু তেওঁৰ দল পিটিআইক সমৰ্থন কৰা বিদেশৰ নাগৰিকসকলক ধন্যবাদ জনাবলৈ পাহৰা নাই। তেওঁ তেওঁৰ দল পিটিআইৰ বাবে প্ৰবাসীসকলৰ পৰা আৰ্থিক সহায় বিচাৰিছে। তেওঁ অহা ২০ মে’ত “ইছলামাবাদ চলো” অভিযানৰ পৰিকল্পনা কৰিছে।
