আজি বিআৰ গাভাই মুখ্য ন্যায়াধীশ হোৱা দ্বিতীয়জন দলিত হিচাপে পৰিগণিত হয়। বুধবাৰে তেওঁ শপত গ্ৰহণ কৰে। ইয়াৰ পাছতে উচ্চতম ন্যায়ালয়ৰ ন্যায়াধীশসকলে তেওঁক অভিনন্দন জনায়। তেওঁলোকৰ ভাষণৰ প্ৰত্যুত্তৰত মুখ্য ন্যায়াধীশ গাভাইয়ে ‘জয় ভীম’ শ্লোগান প্ৰদান কৰে। মন কৰিবলগীয়া যে ‘জয় ভীম’ দলিত অধিকাৰ আন্দোলনৰ এক ব্যাপক শ্লোগান। মুখ্য ন্যায়াধীশ হৈ গাভাইয়ে নিজৰ দলিত পৰিচয়ৰ ওপৰত আলোকপাত কৰে।
বুধবাৰে দেশৰ ৫২ সংখ্যক মুখ্য ন্যায়াধীশ হিচাপে শপত গ্ৰহণ কৰে ন্যায়াধীশ বি আৰ গাভাইয়ে। বুধবাৰে ৰাষ্ট্ৰপতি ভৱনত শপত গ্ৰহণ কৰে। গাভাই ভাৰতৰ মুখ্য ন্যায়াধীশ হোৱা প্ৰথম বৌদ্ধ ধৰ্মাৱলম্বী হিচাপে পৰিগণিত হয়। শপত গ্ৰহণৰ অন্তত ৰাষ্ট্ৰপতি দ্ৰৌপদী মুৰ্মু, প্ৰধানমন্ত্ৰী নৰেন্দ্ৰ মোদীকে ধৰি বহুতে তেওঁক অভিনন্দন জনায়। নতুনকৈ শপত গ্ৰহণ কৰা মুখ্য ন্যায়াধীশগৰাকী ৰাষ্ট্ৰপতি ভৱনৰ পৰা উচ্চতম ন্যায়ালয়লৈ যায়। বি আৰ আম্বেদকাৰৰ প্ৰতিমূৰ্তিলৈ ফুলৰ শ্ৰদ্ধাঞ্জলি জ্ঞাপন কৰে। তাতে গাভাইক অধিবক্তা আদিয়ে আদৰণি জনায়।
পৰম্পৰা অনুসৰি আইন মন্ত্ৰালয়ে মুখ্য ন্যায়াধীশ সঞ্জীৱ খান্নাক তেওঁৰ উত্তৰাধিকাৰীৰ নাম প্ৰস্তাৱ কৰিবলৈ আমন্ত্ৰণ জনাইছিল। একেদৰে ন্যায়াধীশ খান্নাই বি আৰ গাভাইৰ নাম প্ৰস্তাৱ কৰে। আগন্তুক ছমাহৰ বাবে দেশৰ মুখ্য ন্যায়াধীশ হিচাপে থাকিব গাভাই। চলিত বৰ্ষৰ নৱেম্বৰ মাহত তেওঁ অৱসৰ ল’ব। ন্যায়াধীশ বালকৃষ্ণনৰ পাছতে দেশৰ দ্বিতীয়জন দলিত মুখ্য ন্যায়াধীশ হ’ব বি আৰ গাভাই।
২০০৩ চনত বম্বে উচ্চ ন্যায়ালয়ৰ অতিৰিক্ত ন্যায়াধীশ হিচাপে নিযুক্তি লাভ কৰা গাভাই ২০০৫ চনত স্থায়ী পদ লাভ কৰে।২০১৯ চনৰ পৰা উচ্চতম ন্যায়ালয়ৰ ন্যায়াধীশ হিচাপে কাৰ্যনিৰ্বাহ কৰি থকা গাভাই বিমুদ্ৰাকৰণৰ পৰা আৰম্ভ কৰি নিৰ্বাচনী বণ্ডলৈকে কমেও ৩০০টা গোচৰৰ সৈতে জড়িত আছিল। এতিয়া তেওঁ অহা ছমাহ দেশৰ মুখ্য ন্যায়াধীশ হিচাপে কাৰ্যনিৰ্বাহ কৰিব।
