উত্তৰ প্ৰদেশৰ জৈন সম্প্ৰদায়ৰ এক ধৰ্মীয় অনুষ্ঠানত মঞ্চ ভাঙি এক ভয়ংকৰ দুৰ্ঘটনা সংঘটিত হয়। এতিয়ালৈকে পোৱা খবৰ অনুসৰি মঞ্চ ভাঙি পৰাত কমেও ৬ জন লোকৰ মৃত্যু হৈছে। আহত হৈছে ৫০ জনতকৈ অধিক লোক।
মঞ্চৰ তলত বহু লোক আবদ্ধ হৈ পৰাৰ আশংকা কৰা হৈছে। ফলত মৃতকৰ সংখ্যা আৰু অধিক বৃদ্ধি পাব পাৰে বুলি ধাৰণা কৰা হৈছে।
উত্তৰ প্ৰদেশৰ বাঘপাটত প্ৰতি বছৰে জৈন নিৰ্বাণ উৎসৱ পালন কৰা হয়। এই উৎসৱ বিগত ৩০ বছৰে পালন কৰি আহিছে। এই অনুষ্ঠানৰ অন্যতম আকৰ্ষণ হৈছে লাদ্দু মহোৎসৱ। সেই উদ্দেশ্যে বাঁহ আৰু কাঠেৰে ৬৫ ফুট উচ্চতাৰ এখন মঞ্চ নিৰ্মাণ কৰা হৈছিল।
মঙলবাৰে পুৱা প্ৰভু আদিনাথক লাদ্দু আগবঢ়োৱা হৈছিল। তেতিয়াই এই ভয়ংকৰ দুৰ্ঘটনা সংঘটিত হৈছিল।
জানিব পৰা মতে, লাদ্দু উৎসৱৰ সময়ত ভক্তসকলে একেলগে মঞ্চত উঠিছিল। বিপুল জনসমাগমৰ বাবেই মঞ্চ ভাঙি পৰিছিল।
সূত্ৰ অনুসৰি এই ঘটনাত ৬ জন লোকৰ মৃত্যু হয়। আহত হৈছে ৫০ জনতকৈ অধিক লোক। আশংকা কৰা হৈছে যে এতিয়াও বহু লোক মঞ্চৰ তলত আবদ্ধ হৈ আছে।
বাঘপাটৰ আৰক্ষী অধীক্ষক অৰ্পিত বিজয়বৰ্গিয়াই কয় যে, “ঘটনাৰ পিছতে আৰক্ষী আৰু এম্বুলেন্স সেই স্থানত উপস্থিত হয়। আহতসকলক চিকিৎসালয়লৈ লৈ যোৱা হৈছে। সামান্য আঘাতপ্ৰাপ্তসকলক চিকিৎসা কৰি ঘৰলৈ পঠিওৱা হয়। বাকীসকল চিকিৎসালয়ত চিকিৎসাধীন হৈ আছে।
জিলা দণ্ডাধীশ অস্মিতা লালে কয়, “বাঁহৰ মঞ্চ ভাঙি প্ৰায় ৪০ জন লোক আহত হয়। ইয়াৰে ২০জনক প্ৰাথমিক চিকিৎসা গ্ৰহণৰ পিছত ঘৰলৈ পঠিওৱা হৈছে, বাকীসকল চিকিৎসাধীন হৈ আছে।”
মুখ্যমন্ত্ৰী যোগী আদিত্যনাথে এই ঘটনাত নিহতসকলৰ পৰিয়াললৈ সমবেদনা জ্ঞাপন কৰিছে।
