বিগত ১২ বছৰৰ অভিলেখ ভংগ কৰি চলিত বৰ্ষত অসম তথা উত্তৰ-পূবত আটাইতকৈ লেহেমীয়া গতিৰে মৌচুমী জলবায়ুৰ আগমণ ঘটিছে।
ভাৰতীয় বতৰ বিজ্ঞান বিভাগে সদৰি কৰা মতে ঘূৰ্ণিবতাহ ‘বায়ু’ৰ প্ৰভাৱৰ ফলত সমগ্ৰ দেশত বৰষুণৰ পৰিমান সাময়িকভাৱে বন্ধ হৈ পৰাৰ ফলশ্ৰুতিত মৌচুমী জলবায়ুৰ আৰম্ভণিত পলম হৈছে। মৌচুমী জলবায়ুৰ আগমন লেহেমীয়া হোৱা বাবে উত্তৰ-পূবকে ধৰি দেশৰ বিভিন্ন অংশ প্ৰচণ্ড গ্ৰীষ্ম প্ৰবাহৰ সন্মুখীন হ’বলগীয়া হৈছে।
আনহাতে, সূত্ৰৰ পৰা লাভ কৰা খবৰ অনুসৰি অহা তিনি-চাৰিদিনৰ ভিতৰত সম্পূৰ্ণৰূপে মৌচুমী জলবায়ু উত্তৰ-পূব আৰু তামিলনাডুত প্ৰৱেশ কৰাৰ সম্ভাৱনা আছে আৰু তাৰ পাছত ক্ৰমে কৰ্ণাটক, গোৱাৰ ফাললৈ গতি কৰিব। গোৱাৰ পাছত অন্ধ্ৰপ্ৰদেশ, পশ্চিমবংগ আৰু ওড়িশালৈ মৌচুমী জলবায়ু প্ৰৱেশৰ পূৰ্ণ সম্ভাৱনা আছে।
বিগত বৰ্ষৰ তুলনাত চলিত বৰ্ষত দেশৰ মাত্ৰ ১০ ৰ পৰা ১৫ শতাংশ অংশতহে মৌচুমী জলবায়ুৰ প্ৰবেশ ঘটিছে। বিগত বৰ্ষৰ তুলনাত বৰ্তমানলৈ দেশত ৪৪ শতাংশ কম বৰষুণ হৈছে।
উত্তৰ-পূবত মৌচুমী জলবায়ুৰ আংশিক প্ৰৱেশ ঘটিছে যদিও বৰ্তমানলৈ ইয়াৰ প্ৰভাৱত বৰ বেছি পৰিমানে বৰষুণ হোৱা নাই।
বতৰ বিজ্ঞান কেন্দ্ৰৰ বিষয়াই উল্লেখ কৰা মতে চলিত বৰ্ষত দেশত নিৰ্ধাৰিত সময়তকৈ ১৫ দিন পলমকৈ মৌচুমী জলবায়ুৰ প্ৰৱেশ ঘটিছে।
বংগোপসাগৰত সৃষ্টি হোৱা নিম্ন চাপৰ ওপৰতে দেশত মৌচুমী জলবায়ুৰ প্ৰৱেশ নিৰ্ভৰ কৰে কিন্তু চলিত বৰ্ষত দেশত মৌচুমী জলবায়ুৰ প্ৰভাৱ সৃষ্টি কৰিব পৰা কোনোধৰণৰ নিম্ন চাপ বংগোপসাগৰত সৃষ্টি হোৱা পৰিলক্ষিত হোৱা নাই।