তিনিচুকীয়া জিলাৰ মাৰ্ঘেৰিটাৰ প্ৰতিষ্ঠিত ব্যৱসায়ী পঙ্কজ চৌধুৰীৰ বাসগৃহত শুকুৰবাৰে ৰাতিপুৱা ৯ বজাৰ পৰা “আয়কৰ” বিভাগে অভিযান চলায়।
পংকজ চৌধুৰী নিবেদিতা চাহ ফেক্টৰীৰ স্বত্বাধিকাৰী আৰু কয়লাৰ ব্যৱসায়ৰ লগত জড়িত বুলি জানিব পৰা গৈছে।
আয়কৰ বিসংগতিৰ সন্দেহতে এই অভিযান চলাইছে বুলি সন্দেহ কৰা হৈছে।
এক সূত্ৰই জানিবলৈ দিয়ামতে মাৰ্ঘেৰিটা লিডুৰ বহু চৰ্চিত কয়লাৰ বেহাৰ সৈতে পঙ্কজ চৌধুৰী জড়িত বুলি সন্ধেহ কৰা হৈছে।
উল্লেখ যোগ্য যে, প্ৰায় বিশ বছৰ পূৰ্বে মাৰ্ঘেৰিটাৰ কয়লা কৰ ফাঁকিৰে অবৈধভাৱে সৰবৰাহ কৰাৰ সৈতে চোধুৰীৰ নাম সাঙোৰ খাই পৰিছিল।
তেতিয়াৰ কংগ্ৰেছৰ শাসনাধিস্থ চৰকাৰ খনে সকলো কথা গাপ দিয়াৰ অভিযোগ উত্থাপন হৈছিল। কিন্তু ২০২১ ৰ নিৰ্বাচনৰ প্ৰাকমুহূৰ্ত্তত এনে ব্যৱসায়ীৰ ঘৰত কিয় আয়কৰ বিভাগে অভিযান চলালে তাকে লৈ এতিয়া সমগ্ৰ জিলাখনতে সৰৱ চৰ্চা চলিছে।
শুকুৰবাৰে অভিযানকাৰী দলটোৱে আভিযান কালত বহু গুৰুত্বপূৰ্ণ নথি পত্ৰ তন্ন তন্নকৈ পৰীক্ষা কৰাৰ লগতে কম্পিউটাৰৰ তথ্যও পৰীক্ষা কৰিছে বুলি জানিব পৰা গৈছে।
ৰাতিপুৱা ন বজাৰ পৰা মাৰ্ঘেৰিটা মিছন ৰোডস্থিত চৌধুৰীৰ বাসগৃহ সংলগ্ন কাৰ্যালয়ত মহিলা আৰক্ষী সহ দিল্লীৰ পৰা অহা আয়কৰ বিভাগৰ এটা বৃহৎ দলে অভিযান চলায়।
অভিযানৰ কালছোৱাত বাহিৰা লোক তথা সংবাদ মাধ্যমকো প্ৰবেশত বাধা আৰোপ কৰে আৰক্ষীয়ে।
চৌধুৰীৰ বাসগৃহটো আৰক্ষী সস্ত্ৰম হৈ থকা দেখা গৈছে যদিও স্থানীয় মাৰ্ঘেৰিটা আৰক্ষীৰ এজনো বিষয়া এই দলটোত নাই।
এই অভিযানকাৰি দলটোৰ বাতৰি লেখা সময়লৈকে এজনো সংবাদ মাধ্যমৰ সন্মুখলৈ অহা নায়।
