চৈয়দ মুস্তাক আলী ট্ৰফীত সৰ্বাধিক ৰান সংগ্ৰহ কৰিও ৰাষ্ট্ৰীয় দললৈ প্ৰত্যাৱৰ্তনৰ বাবে আশাবাদী নাছিল ঈশান কিষাণ। কিন্তু কোনে জানিছিল যে ফিনিক্সৰ দৰে তেওঁ জাতীয় দললৈ ঘূৰি আহিব। তেওঁৱেই নিউজিলেণ্ডক দ্বিতীয় টি-২০ত ‘ভাল শিক্ষা’ দিলে। ৰায়পুৰৰ খেলপথাৰত যেনেকৈ তেওঁৰ বিস্ফোৰক ইনিংছ স্মৰণীয় হৈ ৰ’ল, তেনেদৰে সূৰ্যকুমাৰ যাদৱেও দীৰ্ঘ দিনৰ অন্তত অৰ্ধশতক অৰ্জন কৰে। ২৮টা বল বাকী থকা অৱস্থাতে নিউজিলেণ্ডে নিৰ্ধাৰিত কৰি দিয়া ২০৯ ৰানৰ লক্ষ্য অতিক্ৰম কৰে ভাৰতে।
অভিষেক শৰ্মাৰ বেটিং তাণ্ডৱেৰে জয়ৰে বিশ্বকাপৰ ‘প্ৰস্তুতি’ আৰম্ভ কৰিছিল টিম ইণ্ডিয়াই। সূৰ্যকুমাৰ যাদৱে নিউজিলেণ্ডৰ বিৰুদ্ধে পাঁচখন খেলৰ টি-২০ শৃংখলাৰ প্ৰথমখন মেচত ৪৮ ৰানত জয়লাভ কৰিছিল। এইবাৰ লক্ষ্য আছিল দ্বিতীয়খন মেচত জয় নিশ্চিত কৰা। সেই লক্ষ্যত টিম ইণ্ডিয়াই লেটাৰ মাৰ্ক লৈ পাছ কৰিলে।
ৰায়পুৰত টছত জয়লাভ কৰি সূৰ্যকুমাৰে নিউজিলেণ্ডক বেটিং কৰিবলৈ প্ৰেৰণ কৰে। নিউজিলেণ্ডে ভাৰতৰ সন্মুখত ২০৯ ৰানৰ লক্ষ্য নিৰ্ধাৰণ কৰিছিল। ৰাচিন ৰবীন্দ্ৰ আৰু মিচেল ছাণ্টনাৰৰ সৌজন্যত নিউজিলেণ্ডে ২০০ৰ সীমা অতিক্ৰম কৰে। ২৭টা বলত ৪৭ ৰান কৰি অপৰাজিত হৈ থাকে ছাণ্টনাৰ। কুলদীপ যাদৱে ৩৫ ৰানত ২ উইকেট দখল কৰে। হাৰ্দিক, হৰ্ষিত, বৰুণ, অভিষেক, ডুবেই এটাকৈ উইকেট দখল কৰে।
প্ৰত্যুত্তৰত ভাৰতে বেটিং কৰিবলৈ ওলাই অহাৰ সময়ত আৰম্ভণিতে অ’পেনাৰ সঞ্জু চেমছন (৬) আৰু অভিষেক শৰ্মা (০)ৰ উইকেট হেৰুৱাইছিল। ৬ ৰানত ২ উইকেট হেৰুওৱা ভাৰতক খেলৰ মাজলৈ ওভতাই আনে ঈশান কিষাণ আৰু অধিনায়ক সূৰ্যকুমাৰে। ২১টা বলত অৰ্ধশতক সম্পূৰ্ণ কৰে ঈশানে।
বাওঁহতীয়া বেটছমেনগৰাকীয়ে খেলি থকাৰ সময়তে সূৰ্য্যকুমাৰে এংকৰৰ ভূমিকা পালন কৰিছিল। তেওঁলোকৰ যুটীয়ে ১২২ ৰান সংগ্ৰহ কৰে। ঈশ সোধীৰ বলত ছয়টো মাৰিবলৈ গৈ ৩২টা বলত ৭৬ ৰান সংগ্ৰহ কৰি ড্ৰেছিং ৰুমলৈ উভতি আহে ঈশান। আউট হোৱাৰ পূৰ্বে তেওঁ ১১টা চাৰি আৰু চাৰিটা বিশাল ছয় মাৰে।
জীৱন হয়তো এনেদৰেই সলনি হ’ব পাৰে। কেইবছৰমান পূর্বে দ্বিশতক অর্জন কৰাৰ পাছত বহুতে ভাবিছিল যে ভাৰতীয় দলত ঈশান কিষানৰ স্থান নিৰাপদ, এসময়ত তেওঁলোকৰ ধাৰণা ভুল প্রমাণিত হৈছিল৷ বিচিচিআইৰ কেন্দ্ৰীয় চুক্তিৰ পৰা বাদ পৰাৰ লগতে জাতীয় দলৰ পৰাও বাদ পৰি আকৌ ফিনিক্স চৰাইৰ দৰে ঈশানৰ প্ৰত্যাৱৰ্তনৰ যুঁজ সঁচাকৈয়ে চাবলগীয়া।
ঈশান আউট হ’লেও ভাৰতৰ ৰান ৰেট কমি যোৱা নাছিল। সৌজন্যত অধিনায়ক। সূৰ্য্যই সম্পূৰ্ণ নিজস্ব ভংগীমাত বেটিং কৰে। ১৪ মাহৰ পাছত তেওঁ আন্তঃৰাষ্ট্ৰীয় ক্ৰিকেটত অৰ্ধশতক অৰ্জন কৰে। ২৩টা বলত ২২ সংখ্যক অৰ্ধশতক অৰ্জন কৰে। শিৱম ডুবে (৩৬)য়েও এক উপযোগী ইনিংছ খেলিছিল। এই যুটীত সূৰ্য্য আৰু ডুবেই ৮১ ৰান সংগ্ৰহ কৰে।
ভাৰতে জয়ী হ’বলৈ বেছি সময় অপেক্ষা কৰিব লগা নাছিল৷ সূৰ্যই ৩৭টা বলত ৮২ ৰান কৰি অপৰাজিত হৈ থাকে। তেওঁৰ ইনিংছত আছিল ৯টা চাৰি আৰু চাৰিটা ছয়। দুটা ডাঙৰ পাৰ্টনাৰশ্বিপ আৰু দুটা ডাঙৰ ইনিংছত ভাৰতে মাত্ৰ ১৫.২ অভাৰতে নিৰ্ধাৰিত লক্ষ্যত উপনীত হয়। ৰায়পুৰত অনুষ্ঠিত হোৱা শৃংখলাৰ ফলাফল এতিয়া ভাৰতৰ পক্ষত ২-০। দেওবাৰে অনুষ্ঠিত হ’ব তৃতীয়খন টি-২০।
সংক্ষিপ্ত স্কোৰঃ
নিউজিলেণ্ডঃ ২০৮/৬ (ছাণ্টনাৰ ৪৭, ৰাচিন ৪৪, কুলদীপ ৩৫/২)
ভাৰতঃ ২০৯/৩ (সূৰ্য ৮২*, ঈশান ৭৬, ঈশ সোধি ৩৪/১)
ভাৰতে ৭ উইকেটত জয়লাভ কৰে।
