স্বাধীনতা দিৱসত ৰাজ্যখনত উগ্ৰপন্থী সংগঠনসমূহে যাতে কোনো ধৰণৰ কূটাঘাটমূলক কাৰ্য্য সংঘটিত কৰিব নোৱাৰে তাৰ বাবে আৰক্ষী প্ৰশাসন সম্পূৰ্ণ সষ্টম হৈ পৰিছে। চোৰাংচোৱা বাহিনীৰ তথ্যৰ ভিত্তিত নিৰাপত্তা ব্যৱস্থা কটকটীয়া কৰি তোলা হৈছে। ইয়াৰ সমান্তৰালভাৱে আৰক্ষীয়ে ব্যাপক তালাচী অভিযান চলাইছে।
ইয়াৰ মাজতে দেওবাৰে বাক্সা জিলাৰ তামুলপুৰৰ চিকনিবাৰীত তামুলপুৰ আৰক্ষী আৰু সেনাৰ যুটীয়া অভিযানত এন ডি এফ বি (সং)ৰ এজন লিংকমেন আটক কৰা হয়। ধৃত লিংকমেনজনক শোণিতপুৰ জিলাৰ ৰিংকু স্বৰ্গীয়াৰী বুলি চিনাক্ত কৰা হৈছে। লিংকমেনজনৰ পৰা আৰক্ষীয়ে এটা ৭.২৫ চাইনীজ পিষ্টল উদ্ধাৰ কৰে।
উল্লেখযোগ্য যে যোৱা ১১ আগষ্টত তিনিচুকীয়া জিলাৰ বৰডুমচাৰ কলিয়াজানত আলফা (স্বা)ৰ লগত লিংকমেন হিচাপে জড়িত থকাৰ অভিযোগত সেনাই এজন লোকক আটক কৰিছিল। ধৃত লোকজনক জাগুন আৰক্ষী চকীৰ অধীনৰ ৱাৰা বস্তিৰ নিবাসী নাজিৰ আহমেদ বুলি চিনাক্ত কৰা হয়।
বৰডুমচা আৰক্ষী আৰু ২৩ নং পাঞ্জাব ৰেজিমেণ্টৰ যুটীয়া অভিযানত আটকাধীন লিংকমেনজনৰ কবলৰ পৰা সেনা-আৰক্ষীয়ে এটা পইণ্ট টু টু পিস্তল, ৫ জাঁই সক্ৰিয় গুলী আৰু এটা ম’বাইল ফোন জব্দ কৰিছিল।
আনহাতে, যোৱা ৭ আগষ্টত লখিমপুৰত জিলা আৰক্ষী অধীক্ষকৰ নেতৃত্বত চলা অভিযানত বিহপুৰীয়া-নাৰায়ণপুৰ আৰক্ষীয়ে নাৰায়ণপুৰৰ পৰা আলফা (স্বা)ৰ দুজনকৈ লিংকমেন আটক কৰিছিল। আটকাধীন দুই আলফাৰ লিংকমেনৰ স্বাধীনতা দিৱসত জিলাখনত ক’লা পতাকা আৰু আলফা (স্বা)ৰ পতাকা উত্তোলন কৰাৰ পৰিকল্পনা আছিল বুলি প্ৰকাশ পাইছিল।
এই সকলো ঘটনাক্ৰম লক্ষ্য কৰি স্বাধীনতা দিৱসত ৰাজ্যখনত কূটাঘাত সংঘটিত কৰাৰ বাবে উগ্ৰপন্থী গোটবোৰে যে প্ৰচেষ্টা অব্যাহত ৰাখিছে তাকেই প্ৰমান কৰে। অৱশ্যে এই সকলো ষড়যন্ত্ৰ ব্যৰ্থ কৰি তুলিবলৈ অসম আৰক্ষী প্ৰস্তুত বুলি আৰক্ষীৰ এক সূত্ৰই জানিব দিছে।