টি-২০ ক্ৰিকেটত ভাৰত আৰু দক্ষিণ আফ্ৰিকাৰ মাজত প্ৰতিদ্বন্দ্বিতাৰ দীঘল তালিকা নায়।
এতিয়ালৈ ভাৰত আৰু দক্ষিণ আফ্ৰিকাৰ মাজত মাত্ৰ ১৩ খন টি-২০ ক্ৰিকেট খেল অনুষ্ঠিত হৈছে যাৰ ভিতৰত ভাৰতে ৮ খন আৰু দক্ষিণ আফ্ৰিকাই ৫ খন খেলত জয় লাভ কৰাৰ বিপৰীতে দুখন খেল বৰষুণৰ বাবে পৰিত্যক্ত হয়।
কিন্তু ভাৰতে নিজৰ দেশৰ মাটিত আজিলৈ দক্ষিণ আফ্ৰিকাক টি-২০ খেলত পৰাস্ত কৰিবলৈ সক্ষম হোৱা নায়। দুয়োখন দেশৰ মাজত এতিয়ালৈ ভাৰতৰ মাটিত মাত্ৰ দুখন টি-২০ খেল অনুষ্ঠিত হৈছে আৰু দুয়োখনতে দক্ষিণ আফ্ৰিকা বিজয়ী হৈছে।
আনহাতে, কলকাতা (২০১৫) আৰু ধৰমশালা (২০১৯)ত অনুষ্ঠিত হোৱা খেল দুখন পৰিত্যক্ত হৈছিল।
আজি মোহালীত ভাৰত আৰু দক্ষিণ আফ্ৰিকাৰ মাজত টি-২০ শৃংখলাৰ দ্বিতীয়খন খেল অনুষ্ঠিত হ’ব।
আচৰিতভাৱে মোহালি ক্ৰিকেট ষ্টেডিয়ামত ভাৰতে কেতিয়াও টি-২০ খেলত পৰাস্ত হোৱা নায়। মোহালিত ২০০৯ আৰু ২০১৬ চনত ভাৰতে ক্ৰমে শ্ৰীলংকা আৰু অষ্ট্ৰেলিয়াক পৰাস্ত কৰিছিল।
এতিয়া কথাটো হ’ল ভাৰতৰ মাটিত টি-২০ খেলত দক্ষিণ আফ্ৰিকা কেতিয়াও পৰাস্ত হোৱা নাই বিপৰীতে ভাৰত টি-২০ খেলত মোহালিত কেতিয়াও পৰাস্ত হোৱা নায়।
আজি যিহেতু দুয়োটা দলেই পৰস্পৰৰ বিৰুদ্ধে অৱতীৰ্ণ হ’ব সেয়েহে যিকোনো এটা দলে নিশ্চিতভাৱে অভিলেখ গঢ়িবলৈ সক্ষম হ’ব।