যোৱা বছৰৰ চেম্পিয়ন মেন ইন ব্লুৱে টি-২০ বিশ্বকাপৰ প্ৰস্তুতি ভালদৰে আগবঢ়াই নিছে। নিউজিলেণ্ডৰ বিৰুদ্ধে পাঁচখন খেলৰ শৃংখলাত জয়লাভ কৰিলে সূৰ্যকুমাৰ যাদৱৰ দলটোৱে। ভাৰতীয় দলটোৱে প্ৰতিখন মেচতে উজ্জ্বল প্ৰদৰ্শন আগবঢ়াইছে। এপষেকৰ পাছত ঘৰৰ মাটিত আৰম্ভ হ’ব টি-২০ বিশ্বকাপ। ভাৰতীয় ক্ৰিকেট অনুৰাগীয়ে তাত ভাৰতে খিতাপ দখল কৰাৰ আশা কৰিছে।
দেওবাৰে গুৱাহাটীত টছত জয়ী হোৱাৰ সৌভাগ্য হৈছিল ভাৰতৰ। সূৰ্য্যই প্ৰথমে ফিল্ডিং কৰাৰ সিদ্ধান্ত লয়। এই মেচত দললৈ ঘূৰি আহিছিল যশপ্ৰীত বুমৰাহ আৰু ৰবি বিষ্ণোই। টীম মনেজমেন্টৰ এই পদক্ষেপতে পৰাস্ত হয় নিউজিলেণ্ড।
মুঠ ৫টা উইকেট দখল কৰে বলাৰ দুগৰাকীয়ে। ৮ অভাৰত মাত্ৰ ৩৫ ৰানহে খৰচ কৰে। নিউজিলেণ্ডে টাইট বলিং চম্ভালি কেনেবাকৈ ১৫০ ৰান অতিক্ৰম কৰিবলৈ সক্ষম হয়। এই সৰু টাৰ্গেট অভিষেক শৰ্মা বাহিনীৰ বাবে চিন্তাৰ নাছিল। ভাৰতৰ বেটিং লাইন আপে বিস্ফোৰক গতিৰে ৰান সংগ্ৰহ কৰি ছিৰিজ জয় নিশ্চিত কৰে।
প্ৰথমে বেটিং কৰিবলৈ নমাৰ সময়ত খৰখেদাকৈ ৩টা উইকেট হেৰুৱাই নিউজিলেণ্ড বাহিনী যথেষ্ট বিপদত পৰিছিল। তাৰ পৰাই গ্লেন ফিলিপছ আৰু মাৰ্ক চেপমেনে নিউজিলেণ্ডক পুনৰ মেচখনলৈ ঘুৰাই আনিবলৈ চেষ্টা কৰে। তেওঁলোকে ৫১ ৰানৰ পাৰ্টনাৰশ্বিপ গঢ়ি তুলিছিল। অৱশ্যে প্ৰতিটো ৰানৰ বাবে সংগ্ৰাম কৰিবলগীয়া হৈছিল দলটো। ২০ অভাৰৰ শেষত নিউজিলেণ্ডৰ স্ক’ৰ ১৫৩ ৰান হয়। বুমৰাহে ৩, বিষ্ণোই ২, হাৰ্দিক ২, হৰ্ষিতে ১ টা উইকেট দখল কৰে।
১৫৪ ৰানৰ লক্ষ্য অতিক্ৰমৰ বাবে নামি সঞ্জু চেমছনে প্ৰথমটো বলতে আউট হৈছিল। তথাপি ভাৰতৰ ওপৰত ইমান চাপ নাছিল। অভিষেকে সচৰাচৰ কৰাৰ দৰে সংহাৰমূৰ্তি ধাৰণ কৰে। তেওঁৰ সংগী আছিল ঈশান কিষাণ, যিয়ে শেষৰখন খেলত অৰ্ধশতক অৰ্জন কৰিছিল। ঈশানে নিজৰ বেটৰ পৰা একেৰাহে দুটা ছয় মাৰে। অৱশ্যে তেওঁ ২৮ ৰানত আউট হয়।
তাৰ পৰাই অধিনায়কৰ সৈতে অভিষেক মেচখন খৰধৰকৈ শেষ কৰিবলৈ লাগি পৰিল। তেওঁ মাত্ৰ ২০টা বলতে ৩৪০ ষ্ট্ৰাইক ৰেটেৰে ৬৮ ৰান সংগ্ৰহ কৰে। যোৱা মেচৰ পিছত এই মেচতো অধিনায়কৰ অৰ্ধশতক আহিছে। বিশ্বকাপৰ পূৰ্বে তেওঁৰ ফৰ্মলৈ ঘূৰি অহাটোৱে ভাৰতীয় ক্ৰিকেট অনুৰাগীক সকাহ দিব।
সংক্ষিপ্ত স্কোৰঃ
নিউজিলেণ্ড: ১৫৩/৯ (ফিলিপছ ৪৮, বুমৰাহ ৩/১৭)
ভাৰতঃ ১৫৫/২ (অভিষেক ৬৮*, সূৰ্য্যকুমাৰ ৫৭*)
ভাৰতে ৮ উইকেটত জয়লাভ কৰে।
