ইয়াকে কোৱা হয় তীব্ৰ যুঁজ। অৱশেষত পাৰ্লেত ভাৰত বনাম দক্ষিণ আফ্ৰিকাৰ এদিনীয়া শৃংখলাৰ পৰিণাম ওলাল। টী-২০ শৃংখলাত বৰষুণ খলনায়ক হৈ নপৰা হ’লে হয়তো এই সিদ্ধান্ত ১-১ত অমীমাংসিত নহ’লহেঁতেন৷ কিন্তু এদিনীয়া শৃংখলাত সেয়া নাছিল। ৫০ অভাৰৰ ফৰ্মেটত দুয়োটা দলৰ মাজত ৩ মেচৰ শৃংখলাটো যথেষ্ট ৰোমাঞ্চকৰ আছিল।
টীম ইণ্ডিয়াই শক্তি প্ৰদৰ্শন কৰি জয়লাভ কৰে জো’বাৰ্গত। বেৰহাত প্ৰটিয়াছে শৃংখলাটোত সমতা স্থাপন কৰে। ফলত সকলোৰে দৃষ্টি ছিৰিজৰ নিৰ্ণায়ক মেচখনৰ ওপৰত আছিল। টীম ইণ্ডিয়াৰ প্ৰটিয়া ভ্ৰমণত এই খেলখন আছিল অতি ৰোমাঞ্চকৰ। অৱশেষত ভাৰতীয় শিবিৰে ২-১ ব্যৱধানত শৃংখলা জয় লাভ কৰি শেষ হাঁহি মাৰিলে৷ ২০১৮ চনৰ পিছত দক্ষিণ আফ্ৰিকাত অনুষ্ঠিত হোৱা এদিনীয়া শৃংখলাত টীম ইণ্ডিয়াই জয়লাভ কৰিলে।
টছত পৰাস্ত হোৱাৰ পাছত কে এল ৰাহুল বাহিনীয়ে প্ৰথমে বেটিং কৰে। প্ৰটিয়াছৰ বিৰুদ্ধে আন্তঃৰাষ্ট্ৰীয় কেৰিয়াৰৰ প্ৰথম শতক অৰ্জন কৰে সঞ্জু চেমছনে। তেওঁৰ লগতে টীম ইণ্ডিয়াৰ যুৱ যোদ্ধা তিলক ভাৰ্মাই প্ৰথম এদিনীয়া অৰ্ধশতক অৰ্জন কৰে। দক্ষিণ আফ্ৰিকাৰ বিৰুদ্ধে দ্বিতীয় টি-২০ত অভিষেক ঘটোৱা ৰিংকু সিঙে ছিৰিজৰ সিদ্ধান্তকাৰী মেচখনত ৩৮ ৰান সংগ্ৰহ কৰে। অধিনায়ক ৰাহুলৰ বেটৰ পৰা আহে ২১ ৰান। মুঠতে টীম ইণ্ডিয়াই ৮টা উইকেট হেৰুৱাই ২৯৬ ৰান সংগ্ৰহ কৰে।
২৯৭ ৰানৰ লক্ষ্য অনুসৰণ কৰি দক্ষিণ আফ্ৰিকাই ভাল আৰম্ভণি কৰে। ৰিজা হেণ্ড্ৰিক্স আৰু টনি ডি জৰ্জিৰ অপেনিং যুটিটোৱে ৫৯ ৰান সংগ্ৰহ কৰে। ইয়াৰ পাছতে তৃতীয় উইকেটত অধিনায়ক আইডেন মাৰ্কৰামৰ সৈতে যুটি বান্ধি ৬৫ ৰান সংগ্ৰহ কৰে টনীয়ে। এইটোৱেই হৈছে প্ৰটিয়াছৰ ডাঙৰ পাৰ্টনাৰশ্বিপ। তাৰ পিছত আৰু কোনো যুটিয়ে সেই অৰ্থত অধিক ৰান কৰিব নোৱাৰিলে। কিন্তু প্ৰটিয়াছ শিবিৰে ট্ৰফী ধৰি ৰখাৰ বাবে মেচখনত জয়লাভ কৰিবলৈ আপ্ৰাণ চেষ্টা কৰিছিল।
ভাৰতৰ তৰুণ যোদ্ধাসকলে মাৰ্কৰাম, মিলাৰ বাহিনীক চাপত পেলাইছিল। প্ৰটিয়াছৰ অধিনায়কগৰাকীয়ে ৩৬ ৰান সংগ্ৰহ কৰে। অ’পেনাৰ ৰিজা হেণ্ড্ৰিক্সৰ বাহিৰে কোনেও ডাঙৰ ৰান নাপালে। তেওঁ ৮৭টা বলত ৮১ ৰান সংগ্ৰহ কৰে। কেশৱ মহাৰাজে ২৭ বলত ১৪ ৰানৰ মন্থৰ ইনিংছ আৰু বেউৰাণ হেণ্ড্ৰিক্সে ২৬ বলত ১৮ ৰান সংগ্ৰহ কৰে। কিন্তু নিৰ্ধাৰিত ৫০ অভাৰলৈকে কোনেও দলটোক টানি নিব পৰা নাছিল। ৪৫.৫ অভাৰত ২১৮ ৰানতে প্ৰটিয়াছৰ ইনিংছ সমাপ্ত হয়।
ভাৰতীয় যুৱ বলাৰ অৰ্শদীপ সিঙে ৪টা উইকেট দখল কৰে। আবেশ খান আৰু ৱাশ্বিংটন সুন্দৰে ২টাকৈ উইকেট দখল কৰে। মুকেশ কুমাৰ আৰু অক্ষৰ পেটেলে ১টাকৈ উইকেট পায়। খেলখনত কোনো ভাৰতীয় বলাৰ খালী হাতেৰে উভতিব লগা নহ’ল। ৭৮ ৰানত জয়লাভ কৰাৰ উপৰিও টীম ইণ্ডিয়াই এদিনীয়া শৃংখলাটো ২-১ ব্যৱধানত জয়লাভ কৰে।
