তিনিখন এদিনীয়া মেচৰ ছিৰিজটোত শ্ৰীলংকাৰ বিৰুদ্ধে কলম্বোৰ আৰ প্ৰেমদাসা ষ্টেডিয়ামত অনুষ্ঠিত প্ৰথমখন মেচত ৭ উইকেটত বিজয় সাৱ্যস্ত কৰিছে ভাৰতীয় ক্ৰিকেট দলে।
শিখৰ ধাৱানৰ অধিনায়কোচিত বেটিং আৰু নিজৰ অভিষেক মেচত ইষাণ কিষাণৰ দুৰ্দান্ত ইনিংছৰ সহায়ত ভাৰতে ছিৰিজটোত ১-০ ব্যৱধানত অগ্ৰগতি লাভ কৰিছে।
শিখৰ ধাৱানে ৯৫টা বলত ৮৬ৰাণ কৰাৰ বিপৰীতে ইষাণে ৪২টা বলত কৰে ৫৯ৰাণ।
অৱশ্যে, ভাৰতৰ ইনিংছৰ ভেটি গঢ়ি থৈছিল অপেনাৰ পৃথ্বি শ্ব’ই। আৰম্ভণিতে ধুমুহাৰ সৃষ্টি কৰি শ্ব’ই মাত্ৰ ২৪টা বলত ৪৩ৰাণৰ ইনিংছ খেলে।
শ্ৰীলংকাৰ বলাৰসকলৰ ভিতৰত একমাত্ৰ ধনঞ্জয় ডি ছিলভাই দুটা উইকেট লয়।
শ্ৰীলংকাই প্ৰথমে বেট কৰি নিৰ্দিষ্ট ৫০ অভাৰত ২৬২ ৰাণ কৰে। প্ৰত্যুত্তৰত ভাৰতে ৩৬.৪ অভাৰতে ৩টা উইকেট হেৰুৱাই ২৬৩ৰাণ কৰি বিজয় সাৱ্যস্ত কৰে।
দেওবাৰে অনুষ্ঠিত মেচখনত শিখৰ ধাৱানে এদিনীয়া আন্তৰ্জাতিকত ৬,০০০ৰাণ সম্পূৰ্ণ কৰাৰ কৃতিত্ব অৰ্জন কৰে। ধাৱান হৈছে এদিনীয়াত ৬হাজাৰ ৰাণ কৰা দশমগৰাকী ভাৰতীয় ক্ৰিকেটাৰ।
উল্লেখ্য যে মুখ্য প্ৰশিক্ষক ৰাহুল দ্ৰাবিড়ৰ তত্ত্বাৱধানত ভাৰতীয় দলৰ এই দমনীয় প্ৰদৰ্শন আগলৈও দেখিবলৈ পোৱা যাব বুলি ক্ৰীড়া বিশেষজ্ঞসকলে ব্যক্ত কৰিছে।
অহা ২০ জুলাইত ছিৰিজৰ দ্বিতীয়খন মেচ অনুষ্ঠিত হ’ব।
