নৱবৰ্ষৰ আৰম্ভণিতে ভাৰতত কোভিডৰ টীকাকৰণ কাৰ্যসূচী আৰম্ভ কৰাৰ কথা। ইয়াৰ পূৰ্বে সোমবাৰ আৰু মঙলবাৰ অৰ্থাৎ ২৮ আৰু ২৯ ডিচেম্বৰত অসম, পঞ্জাৱ, অন্ধ্ৰ প্ৰদেশ আৰু গুজৰাটৰ প্ৰতিখনৰে দুখনকৈ জিলাত টীকাকৰণ প্ৰক্ৰিয়াৰ ড্ৰাই ৰাণ বা আখৰা আৰম্ভ কৰিব কেন্দ্ৰীয় স্বাস্থ্য মন্ত্ৰ্যালয়ে।
চৰকাৰৰ তৰফৰ পৰা জানিবলৈ দিয়া মতে আখৰাত কোনো ভেকচিন ব্যৱহাৰ কৰা নহয়, কেবল মাত্ৰ Co-WIN এপৰ জৰিয়তে নিৰীক্ষণৰ ব্যৱস্থা পৰীক্ষা কৰি চোৱা হ’ব।
এতিয়ালৈকে ভাৰত চৰকাৰে জৰুৰী ভিত্তিত কোনো ভেকচিনৰ অনুমোদন দিয়া নাই যদিও এই তালিকাৰ প্ৰথমতে আছে দেশৰ ছেৰাম ইনষ্টিটিউটে উৎপাদন কৰা অক্সফ’ৰ্ড য়ুনিভাৰ্ছিটি আৰু আষ্ট্ৰাজেনেকা সংস্থাৰ যৌথ প্ৰচেষ্টাৰ প্ৰস্তুত কৰা ভেকচিনটো।
ব্ৰিটেইন চৰকাৰে অনুমোদন দিয়াৰ পাছতে এই বেকচিন ভাৰতত প্ৰয়োগৰ অনুমোদন দিব কেন্দ্ৰীয় চৰকাৰে।
কোভিড-১৯ৰ টীকাকৰণ কাৰ্যসূচীৰ ৰূপায়ন কৰাৰ বাবে ইতিমধ্যে ৰাজ্যিক পৰ্যায়ত টীকাকৰণ বিষয়া, কোল্ড চেন বিষয়া, তথ্য, শিক্ষা তথা সংযোগী কৰ্মী হিচাপে ২,৩৬০জন স্বেচ্ছাসেৱকক প্ৰশিক্ষণ দিয়া হৈছে।
ভেকচিন ড্ৰাই ৰাণ বা আখৰাৰ সময়ত ভেকচিন প্ৰয়োগৰ বাহিৰে সকলো ব্যৱস্থা পৰীক্ষা কৰি চোৱা হ’ব। Co-WIN এপত তথ্য সন্নবিষ্ট কৰা হ’ব, ক’ল্ড ষ্ট’ৰেজৰ পৰা স্বাস্থ্যকেন্দ্ৰলৈকে ভেকচিন সৰবৰাহৰ ব্যৱস্থা পৰীক্ষা কৰি চোৱা হ’ব। লগতে টীকাকৰণ কেন্দ্ৰৰ সুৰক্ষা আৰু জন সমাৱেশ নিয়ন্ত্ৰণৰ ব্যৱস্থাও পৰীক্ষা কৰি চোৱা হ’ব।
টীকাকৰণৰ বাবে যিমান পাৰি অধিক কেন্দ্ৰ ব্যৱহাৰ কৰা হ’ব। জিলা হাস্পাতাল, সামূহিক স্বাস্থ্য কেন্দ্ৰ বা প্ৰাথমিক স্বাস্থ্যকেন্দ্ৰ, চহৰৰ টীকা কেন্দ্ৰ, বেচৰকাৰী স্বাস্থ্য কেন্দ্ৰ আৰু গাওঁৰ স্বাস্থ্যকেন্দ্ৰসমূহতো আখৰা চলোৱা হ’ব।
টীকাকৰণ কাৰ্যসূচীৰ ড্ৰাই ৰাণৰ উদ্দেশ্য হৈছে পৰিকল্পনাত আহিব পৰা সম্ভাৱ্য বাধা চিনাক্ত কৰা আৰু প্ৰয়োজনত পৰিকল্পনা সলনি কৰি চূড়ান্ত পৰ্যায়ত টীকাকৰণৰ প্ৰয়োগ সুনিশ্চিত কৰা।
টীকাকৰণ কাৰ্যসূচীৰ বিভিন্ন পৰ্যায়ত কিধৰণে সুকলমে কাম সম্পন্ন কৰা হ’ব তাৰ আভাস লোৱাৰ বাবেই সংশ্লিষ্ট কৰ্মী তথা বিষয়াসকলক প্ৰত্যক্ষ অভিজ্ঞতা উপলব্ধ কৰোৱাৰ বাবে এই আখৰাৰ ব্যৱস্থা কৰা হৈছে।
সেইদৰে, ভেকচিন ড্ৰাই ৰাণত জিলা আৰু ব্লক পৰ্যায়ত কঠোৰ নিৰীক্ষণ আৰু পুনৰ্মুল্যায়নৰ ব্যৱস্থা কৰা হৈছে। আখৰা সমাপ্ত হোৱাৰ পাছত কেন্দ্ৰ আৰু ৰাজ্য চৰকাৰক বিশদ প্ৰতিবেদন পঠোৱা হ’ব।
