আহমেদাবাদত অনুষ্ঠিত হোৱা ২০২৬ বৰ্ষৰ টি-২০ বিশ্বকাপৰ ফাইনেলত নিউজিলেণ্ডৰ বিৰুদ্ধে খেলাৰ সময়ত এক অনাকাংক্ষিত কাণ্ডৰ বাবে ভাৰতীয় বলাৰ আৰ্শদীপ সিঙক মেচ মাচুলৰ ১৫ শতাংশ জৰিমনা বিহা হৈছে। আইচিচিৰ আচৰণ বিধিৰ স্তৰ ১ উলংঘা কৰাৰ বাবে তেওঁৰ বিৰুদ্ধে এই ব্যৱস্থা গ্ৰহণ কৰা হৈছে। এই নিয়ম অনুসৰি খেলপথাৰত কোনো খেলুৱৈৰ ওপৰত বা তেওঁৰ ওচৰলৈ বিপজ্জনকভাৱে বল নিক্ষেপ কৰাটো অপৰাধ হিচাপে গণ্য কৰা হয়। আৰ্শদীপে খেলৰ মাজত বেটছমেনৰ ফালে বল দলিওৱাৰ বাবে এই শাস্তি লাভ কৰিছে।
নিউজিলেণ্ডৰ ইনিংছৰ ১১ নম্বৰ অভাৰ চলি থকাৰ সময়ত এই ঘটনাটো সংঘটিত হৈছিল। আৰ্শদীপে ফিল্ডিঙৰ সময়ত বলটো সংগ্ৰহ কৰি বেটছমেন ডেৰিল মিচেলৰ ফালে অতি আক্ৰমণাত্মকভাৱে দলিয়াই দিছিল যিটো মিচেলৰ পেডত গৈ লাগিছিল। এই কাৰ্যৰ বাবে জৰিমনাৰ লগতে আৰ্শদীপৰ অনুশাসনমূলক অভিলেখত এটা ডেমেৰিট পইণ্টো যোগ কৰা হৈছে। বিগত ২৪ মাহৰ ভিতৰত এয়া তেওঁৰ প্ৰথমটো অনুশাসনমূলক ভুল হিচাপে লিপিবদ্ধ কৰা হৈছে।
মেচ ৰেফাৰী এণ্ডি পাইক্ৰফ্টে দিয়া এই সিদ্ধান্ত আৰ্শদীপে বিনাবাক্য সন্মতি জনোৱাত কোনো ধৰণৰ আনুষ্ঠানিক শুনানিৰ প্ৰয়োজন নহ’ল। অৱশ্যে খেলপথাৰত উত্তেজনাৰ সৃষ্টি হ’লেও অভাৰ শেষ হোৱাৰ পাছত দুয়োগৰাকী খেলুৱৈয়ে ইজনে সিজনৰ লগত হাত মিলাই সৌহাদ্যপূৰ্ণ আচৰণ প্ৰদৰ্শন কৰা দেখা গৈছিল। খেলখনত ভাৰতে নিউজিলেণ্ডক ৯৬ ৰানত পৰাস্ত কৰি তৃতীয়বাৰৰ বাবে টি-২০ বিশ্বকাপৰ খিতাপ দখল কৰিবলৈ সক্ষম হয়।
আইচিচিৰ নিয়ম অনুসৰি লেভেল ১ৰ অপৰাধৰ বাবে খেলুৱৈক সৰ্বাধিক মেচ মাচুলৰ ৫০ শতাংশ পৰ্যন্ত জৰিমনা বিহাৰ সুবিধা থাকে। যদি কোনো খেলুৱৈয়ে দুবছৰৰ ভিতৰত চাৰিটা বা তাতকৈ অধিক ডেমেৰিট পইণ্ট পায় তেন্তে তেওঁক নিৰ্দিষ্ট সময়ৰ বাবে খেলৰ পৰা নিষিদ্ধ কৰা হ’ব পাৰে। ভাৰতৰ বিজয় উৎসৱৰ মাজতে দলটোৰ অন্যতম মুখ্য বলাৰগৰাকীৰ ওপৰত বিহা এই শাস্তিয়ে ক্ৰিকেট মহলত চৰ্চা লাভ কৰিছে।
