মৃত্যুদণ্ডৰ পৰা ৰক্ষা পোৱা ভাৰতীয় নৌসেনাৰ প্ৰাক্তন বিষয়া পূৰ্ণেন্দু তিৱাৰীক পুনৰ কাটাৰত গ্ৰেপ্তাৰ কৰা হৈছে। ভাৰতৰ বৈদেশিক পৰিক্ৰমা মন্ত্ৰালয়ে শুকুৰবাৰে এই তথ্য নিশ্চিত কৰে।
যোৱা ডিচেম্বৰ মাহত কাটাৰত আদালতৰ ৰায়দানৰ পাছত গ্ৰেপ্তাৰ কৰা হৈছিল পূৰ্ণেন্দু তিৱাৰীক।
ভাৰতৰ বৈদেশিক পৰিক্ৰমা মন্ত্ৰালয়ৰ এগৰাকী মুখপাত্ৰই জনোৱা মতে, যোৱা মাহত কাটাৰত দীৰ্ঘদিনীয়া গোচৰত তেওঁক গ্ৰেপ্তাৰ কৰা হৈছিল। যদিও এই গোচৰত আন কেইবাজনো লোকক গ্ৰেপ্তাৰ কৰা হৈছে, তথাপিও তেওঁলোক ভাৰতীয় নাগৰিক নহয়।
ভাৰতৰ বৈদেশিক পৰিক্ৰমা মন্ত্ৰালয়ে জনায় যে কাটাৰত থকা ভাৰতৰ দূতাবাস কমাণ্ডাৰ তিৱাৰী আৰু তেওঁৰ পৰিয়ালৰ সৈতে যোগাযোগত আছে। আদালতৰ ৰায়ৰ পিছতে তেওঁক গ্ৰেপ্তাৰ কৰা হয়। বৰ্তমান বিষয়টো বিচাৰাধীন, সেয়েহে আৰু অধিক মন্তব্য কৰাটো উচিত নহ’ব।
উল্লেখ্য যে ২০২২ চনৰ পৰা এই গোচৰ চলি আছে।২০২২ চনৰ আগষ্ট মাহত কাটাৰৰ চোৰাংচোৱা সংস্থাই ভাৰতীয় নৌসেনাৰ প্ৰাক্তন ৮জন বিষয়াক গ্ৰেপ্তাৰ কৰিছিল। তাৰ ভিতৰত পূৰ্ণেন্দু তিৱাৰী অন্যতম। ধৃত বিষয়াসকলে কাটাৰৰ এটা ব্যক্তিগত কোম্পানী (Dahra Global Technologies)ত কৰ্মৰত আছিল। তেওঁলোকৰ মূলতঃ কাটাৰৰ নৌসেনাক প্ৰশিক্ষণ দিয়াৰ দায়িত্ব আছিল।
সংবাদ মাধ্যমৰ খবৰ অনুসৰি তেওঁলোকে ইজৰাইলৰ হৈ চোৰাংচোৱাগিৰি কৰাৰ অভিযোগ উঠিছিল। ২০২৩ চনৰ অক্টোবৰ মাহত কাটাৰৰ আদালতে এই আঠজন ভাৰতীয় নাগৰিকক মৃত্যুদণ্ডৰ শাস্তি প্ৰদান কৰিছিল।
পৰৱৰ্তী সময়ত ভাৰত চৰকাৰৰ কূটনৈতিক প্ৰচেষ্টাৰ বাবে ২০২৪ চনৰ ফেব্ৰুৱাৰী মাহত আঠজনক মুকলি কৰি দিয়া হয়। তেওঁলোকৰ মুক্তিৰ পিছত নৌসেনাৰ প্ৰাক্তন সাতজন বিষয়া ভাৰতলৈ উভতি যায়। কিন্তু কমাণ্ডাৰ পূৰ্ণেন্দু তিৱাৰীক কাটাৰত থাকিবলৈ কোৱা হৈছিল। কিছু অভিযোগৰ বাবে তেওঁৰ বিৰুদ্ধে আইনী প্ৰক্ৰিয়া চলি আছিল।
পূৰ্ণেন্দু তিৱাৰী ভাৰতৰ মধ্যপ্ৰদেশৰ গোৱালিয়ৰৰ বাসিন্দা। তেওঁৰ ভগ্নীয়ে প্ৰধানমন্ত্ৰী নৰেন্দ্ৰ মোদী, বৈদেশিক পৰিক্ৰমা মন্ত্ৰী এছ জয়শংকৰ আৰু নৌসেনাৰ মুৰব্বীক ছ’চিয়েল মিডিয়া আৰু ৰাজহুৱাভাৱে একাধিকবাৰ আহ্বান জনাইছে যে তেওঁৰ ভাতৃক মানৱীয় কাৰণত অনতিপলমে মুকলি কৰি দি ভাৰতলৈ ঘূৰাই আনিব লাগে।
