বিশ্ববজাৰত খাৰুৱা তেলৰ ক্ৰমৱৰ্ধমান মূল্য আৰু পশ্চিম এছিয়াত অব্যাহত থকা ভূ-ৰাজনৈতিক উত্তেজনাৰ মাজতে কেন্দ্ৰীয় চৰকাৰে ইন্ধন সুৰক্ষাৰ দিশত এক গুৰুত্বপূৰ্ণ পদক্ষেপ গ্ৰহণ কৰিছে। পেট্ৰ’লৰ সৈতে ৩০ শতাংশ পৰ্যন্ত ইথানল মিশ্ৰণৰ (ই-৩০) পথ প্ৰশস্ত কৰি ভাৰতীয় মানক ব্যুৰোৱে শেহতীয়াকৈ ই-২২, ই-২৫, ই-২৭ আৰু ই-৩০ ইন্ধনৰ বাবে নতুন কাৰিকৰী মানদণ্ডৰ অধিসূচনা জাৰি কৰিছে। বিকল্প শক্তিৰ ব্যৱহাৰ বৃদ্ধি আৰু তেল আমদানিৰ ওপৰত নিৰ্ভৰশীলতা হ্ৰাস কৰাই হৈছে এই পদক্ষেপৰ মূল লক্ষ্য।
হচৰকাৰী সূত্ৰ অনুসৰি, এই অধিসূচনাৰ জৰিয়তে কেৱল ভৱিষ্যতৰ ইন্ধন ব্যৱস্থাৰ বাবে প্ৰাথমিক কাৰিকৰী প্ৰস্তুতিহে সম্পন্ন কৰা হৈছে, যাতে পৰৱৰ্তী সময়ত প্ৰয়োজন সাপেক্ষে এই উচ্চ মাত্ৰাৰ মিশ্ৰিত ইন্ধন বজাৰত মুকলি কৰিব পৰা যায়। বৰ্তমান ই-৩০ পেট্ৰ’লৰ বিক্ৰী বাধ্যতামূলক কৰা হোৱা নাই যদিও চৰকাৰে যে ই-২০ (২০ শতাংশ ইথানল মিশ্ৰণ) লক্ষ্যৰ পৰা আৰু এখোজ আগুৱাই যোৱাৰ পৰিকল্পনা কৰিছে, সেয়া এই পদক্ষেপৰ জৰিয়তে প্ৰমাণিত হৈছে।
শেহতীয়াকৈ আমেৰিকা যুক্তৰাষ্ট্ৰ, ইজৰাইল আৰু ইৰাণৰ মাজত বৃদ্ধি পোৱা সামৰিক উত্তেজনাই বিশ্বৰ খাৰুৱা তেলৰ যোগান ব্যৱস্থালৈ তীব্ৰ ভাবুকি কঢ়িয়াই আনিছে। বিশ্বৰ প্ৰায় ২০ শতাংশ খাৰুৱা তেল সৰবৰাহ হোৱা হৰমুজ প্ৰণালীত সৃষ্টি হোৱা সংকটৰ আশংকাই ভাৰতৰ দৰে আমদানি-নিৰ্ভৰশীল দেশসমূহক বিকল্প শক্তিৰ উৎসৰ ওপৰত অধিক মনোনিৱেশ কৰিবলৈ বাধ্য কৰাইছে। এনে এক স্পৰ্শকাতৰ পৰিস্থিতিত দেশৰ শক্তি সুৰক্ষা নিশ্চিত কৰাৰ বাবে ইথানল মিশ্ৰণক এক শক্তিশালী আৰু নিৰ্ভৰযোগ্য বিকল্প হিচাপে গণ্য কৰা হৈছে।
উল্লেখ্য যে, কেন্দ্ৰীয় চৰকাৰে ইতিমধ্যে পেট্ৰ’লত ২০ শতাংশ ইথানল মিশ্ৰণৰ লক্ষ্য ২০৩০ চনৰ পৰিৱৰ্তে ২০২৫-২৬ বৰ্ষলৈ আগুৱাই আনিছে। আনহাতে, পুৰণি বাহনসমূহত ইথানলযুক্ত ইন্ধন ব্যৱহাৰ কৰিলে বাহনৰ মাইলেজ হ্ৰাস পোৱাৰ লগতে ইঞ্জিনৰ ৰক্ষণাবেক্ষণৰ ব্যয় বৃদ্ধি পাব পাৰে বুলি পূৰ্বৰে পৰা একাংশই উদ্বেগ প্ৰকাশ কৰি আহিছে। কিন্তু কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰী হৰদীপ সিং পুৰীয়ে এই সন্দৰ্ভত পূৰ্বেই স্পষ্ট কৰি দিছে যে ই-২০ ইন্ধন ব্যৱহাৰৰ ফলত বাহনৰ ইঞ্জিন বিকল হোৱা বা কোনো ধৰণৰ গুৰুতৰ কাৰিকৰী বিজুতি ঘটাৰ তথ্য বৰ্তমানলৈকে পোহৰলৈ অহা নাই।
দীৰ্ঘদিন ধৰি দেশৰ জৈৱ-ইন্ধন উৎপাদক প্ৰতিষ্ঠান আৰু উদ্যোগ খণ্ডই খাৰুৱা তেলৰ আমদানি হ্ৰাস আৰু দেশত ইথানলৰ ক্ৰমৱৰ্ধমান উৎপাদনৰ প্ৰতি লক্ষ্য ৰাখি ই-২২ আৰু তাতকৈ অধিক মাত্ৰাৰ মিশ্ৰণৰ অনুমোদন বিচাৰি চৰকাৰক দাবী জনাই আহিছিল। এই শেহতীয়া অধিসূচনাই দেশৰ শক্তি খণ্ডত এক গুৰুত্বপূৰ্ণ পৰিৱৰ্তনৰ সূচনা কৰাৰ লগতে ভৱিষ্যতৰ দিনবোৰত ইন্ধনৰ আমদানি নিৰ্ভৰশীলতা হ্ৰাস আৰু বহনক্ষম শক্তি সুৰক্ষাৰ ক্ষেত্ৰত কেনে সুদূৰপ্ৰসাৰী প্ৰভাৱ পেলায়, সেয়া পৰৱৰ্তী সময়ত লক্ষণীয় হ’ব।
