আগষ্ট মাহত অনুষ্ঠিত হৈ যোৱা হকী বিশ্বকাপত ভাৰতীয় দলৰ গেৰুৱা ৰঙৰ জাৰ্ছীক লৈ সৃষ্টি হোৱা তীব্ৰ সমালোচনাৰ পাছত হকী ইণ্ডিয়াই এক গুৰুত্বপূৰ্ণ সিদ্ধান্ত গ্ৰহণ কৰিছে। ১৯ ছেপ্টেম্বৰৰ পৰা ৪ অক্টোবৰলৈ জাপানত অনুষ্ঠিত হ’বলগীয়া এছিয়ান গেমছত ভাৰতীয় হকী দলে পুনৰ পাৰম্পৰিক নীলা ৰঙৰ জাৰ্ছী পৰিধান কৰি খেলপথাৰত নামিব। প্ৰতিযোগিতাখনৰ বাবে নীলা ৰঙক প্ৰথম বিকল্প হিচাপে নিৰ্বাচন কৰাৰ বিপৰীতে গেৰুৱা ৰঙৰ জাৰ্ছীটোক দ্বিতীয় বিকল্প হিচাপে ৰখা হৈছে।
হিন্দুস্তান টাইমছত প্ৰকাশিত এক প্ৰতিবেদন অনুসৰি, এছিয়ান গেমছৰ বাবে ভাৰতীয় দলটোৰ বিদায় অনুষ্ঠানত হকী ইণ্ডিয়াৰ সভাপতি দিলীপ তিৰ্কীয়ে জাৰ্ছীৰ ৰং সন্দৰ্ভত স্থিতি স্পষ্ট কৰি দিয়ে। তেওঁ জানিবলৈ দিয়ে যে ভাৰতীয় অলিম্পিক সংস্থাই দলৰ কিটৰ ৰঙক লৈ কেইবাটাও বিকল্প আগবঢ়াইছিল আৰু তাৰ আধাৰতে হকী ইণ্ডিয়াই নীলা ৰঙক প্ৰথম বিকল্প হিচাপে নিৰ্বাচন কৰিছে। আনহাতে, দ্বিতীয় বিকল্প হিচাপে সুমথিৰা বা গেৰুৱা ৰঙক ৰখা হৈছে। যোৱা মঙলবাৰে, অৰ্থাৎ ৮ ছেপ্টেম্বৰত জাপানলৈ ৰাওনা হোৱাৰ পূৰ্বে এজন খেলুৱৈয়ে সংবাদ মাধ্যমৰ আগত প্ৰকাশ কৰে যে এইবাৰৰ আকাশী নীলা আৰু বগা ৰঙৰ সংমিশ্ৰণৰ জাৰ্ছীযোৰ ২০২৩ চনৰ হাংঝৌ এছিয়ান গেমছত পৰিধান কৰা জাৰ্ছীযোৰৰ সৈতেই প্ৰায় একে।
উল্লেখ্য যে, শেহতীয়াকৈ সমাপ্ত হোৱা হকী বিশ্বকাপত ভাৰতীয় দলটোৱে চিৰপৰিচিত নীলা জাৰ্ছীৰ পৰিৱৰ্তে সম্পূৰ্ণৰূপে গেৰুৱা ৰঙৰ জাৰ্ছী পৰিধান কৰিছিল আৰু বগা ৰঙক দ্বিতীয় বিকল্প হিচাপে ৰাখিছিল। সাধাৰণতে হকী দলসমূহে যিকোনো প্ৰতিযোগিতাৰ বাবে দুটা ৰঙৰ জাৰ্ছী ৰাখে। বিগত বহু দশক ধৰি ভাৰতৰ প্ৰধান জাৰ্ছীৰ ৰং নীলা হৈ আহিছে যদিও দ্বিতীয় বিকল্পটো সময়ৰ লগে লগে বগাৰ পৰা হালধীয়া আৰু শেহতীয়াকৈ গেৰুৱালৈ পৰিৱৰ্তন কৰা হৈছিল। ভাৰতীয় হকী দলৰ প্ৰধান পৃষ্ঠপোষক হৈছে ওড়িশা চৰকাৰ। চলিত বৰ্ষৰ জুলাই মাহত ওড়িশাৰ প্ৰাক্তন মুখ্যমন্ত্ৰী তথা বিজু জনতা দলৰ মুৰব্বী নবীন পট্টনায়কে অভিযোগ উত্থাপন কৰিছিল যে ৰাজ্যখনত শাসনলৈ অহা ভাৰতীয় জনতা পাৰ্টিৰ চৰকাৰখনেই হকী দলৰ জাৰ্ছীৰ ৰং নীলাৰ পৰা গেৰুৱালৈ সলনি কৰাৰ আঁৰত মুখ্য ভূমিকা পালন কৰিছে।
জাৰ্ছীৰ ৰং সলনি কৰাৰ এই পূৰ্বৰ সিদ্ধান্তটোক লৈ প্ৰাক্তন খেলুৱৈৰ লগতে সামাজিক মাধ্যমত ক্ৰীড়াপ্ৰেমীসকলে ব্যাপক ক্ষোভ উজাৰিছিল। সমালোচকসকলে অভিযোগ কৰিছিল যে বিগত এক দশক ধৰি শাসকীয় বিজেপি চৰকাৰে বিভিন্ন ক্ষেত্ৰত গেৰুৱা ৰঙক প্ৰাধান্য দি অহাৰ দৰেই ক্ৰীড়াক্ষেত্ৰখনকো গেৰুৱাকৰণ কৰাৰ প্ৰয়াস কৰিছে। ভাৰতীয় হকী দলৰ কমেও সাতগৰাকী প্ৰাক্তন অধিনায়ক, অলিম্পিক পদক বিজয়ী আৰু বিশ্বকাপ বিজয়ী দলৰ নেতৃত্ব বহন কৰা খেলুৱৈয়ে দশক পুৰণি নীলা জাৰ্ছী সলনি কৰি গেৰুৱা জাৰ্ছী গ্ৰহণ কৰাৰ প্ৰয়োজনীয়তা আৰু যৌক্তিকতাক লৈ গুৰুতৰ প্ৰশ্ন উত্থাপন কৰিছিল। অৱশেষত এই সৰ্বত্ৰ সমালোচনাৰ প্ৰতি সঁহাৰি জনাই হকী কৰ্তৃপক্ষই এছিয়ান গেমছৰ বাবে পুনৰ পাৰম্পৰিক নীলা ৰঙৰ জাৰ্ছীলৈ উভতি যোৱাৰ সিদ্ধান্ত গ্ৰহণ কৰিছে বুলি ধাৰণা কৰা হৈছে।
