তীব্ৰ যুঁজ দিও ৰাণী ৰামপালৰ নেতৃত্বৰ ভাৰতীয় মহিলা হকী দলে অলপৰ বাবে টকিঅ’ অলিম্পিকত পদকৰ বাবে বঞ্চিত হ’বলগা হ’ল।
তৃতীয় স্থান নিৰ্ণয়কাৰী মেচখনত গ্ৰেট ব্ৰিটেইনৰ হাতত পৰাজিত হোৱাৰ ফলত ব্ৰঞ্জৰ পদক হেৰুৱালে ভাৰতে।
খেলখনত কঠিন যুঁজ দিও ৪-৩ ব্যৱধানত হাৰিল ভাৰতীয় মহিলা দলটো।
কালি ৪১বছৰ পাছত অলিম্পিকত পদক জয় কৰি ইতিহাস ৰচনা কৰিছিল ভাৰতীয় পুৰুষৰ হকী দলটোৱে।
শুকুৰবাৰে ইতিহাস ৰচনাৰ সুযোগ আছিল ভাৰতীয় মহিলা হকী দলটোৰো। কিন্তু শক্তিশালী প্ৰতিপক্ষ গ্ৰেট ব্ৰিটেইনৰ হাতত পৰাজিত হৈ সেই স্বপ্ন ভংগ হ’ল।
আজিৰ মেচখনৰ প্ৰথম কোৱাৰ্টাৰত ভাৰতে সমানে যুঁজ দিছিল যদিও দ্বিতীয় কোৱাৰ্টাৰৰ আৰম্ভণিতেই গল কৰিবলৈ সক্ষম হয় ব্ৰিটেইনে।
দ্বিতীয় কোৱাৰ্টাৰৰ ১৬ আৰু ২৪ মিনিটত দুটাকৈ গলত পাছ পৰিবলগীয়া হয় ভাৰতীয় মহিলা দলটোৱে। তথাপি, মনোবল অটুট ৰাখি তীব্ৰ যুঁজ দিয়ে দলটোৰ খেলুৱৈসকলে।
প্ৰথম ৰিটাৰ্ণ গলটো কৰাৰ পাছত গুৰজিৎ কৌৰে তাৰ এক মিনিট পাছতেই পুনৰ এটা গলেৰে সমতা স্থাপন কৰে। সেয়াই নহয়, দ্বিতীয় কোৱাৰ্টাৰৰ শেহৰ পিনে সকলোকে আচৰিত কৰি বন্দনা কাটাৰিয়াৰ গলৰ সহায়ত ভাৰতে ১গলত অগ্ৰগতি লয়।
কিন্তু ভাগ্য উদয় নহ’ল ভাৰতীয় মহিলা হকী দলৰ। ৩৫ মিনিটত ব্ৰিটেইনে পুনৰ গল কৰি সমতা স্থাপন কৰে। তাৰ পাছত শেষ কোৱাৰ্টাৰৰ ৪৮মিনিটৰ মূৰত আন এটা গল কৰি আগবাঢ়ি যায় ব্ৰিটেইন।
অন্তিম ১২ মিনিটত প্ৰাণেপণে চেষ্টা চলাইও খেলখনলৈ ঘুৰি আহিবলৈ সক্ষম নহ’ল ভাৰত। ফলত ভাৰতীয় মহিলা হকী দলটো চতুৰ্থ স্থানতে সন্তুষ্ট থাকিবলগীয়া হ’ল।
অৱশ্যে সন্দেহ নাই, পদক জয় কৰিব নোৱাৰিলেও ভাৰতবাসীৰ হৃদয় জিনিয়েই দেশলৈ উভতিব মহিলা হকীৰ দলটোৱে।